Wajé ejaꞌawá, jeꞌechú waꞌaté, Tupana keñoꞌótajikare yukuna marí
65
17 Tupana kemari:18 “Ipechu iꞌimajé puꞌují ñakeja wani nakaje nulaꞌajíkare nakú,
nukeñoꞌótajikale piño wajé pajimila Jerusalén.
Keyajúparuna iꞌimajika ilé pajimila nakú.
19 Puꞌují nupechu iꞌimajika ilé pajimila nakú,
ñaké kaja nupechu iꞌimajika nuleꞌejena inaꞌukena re iꞌimajíkaño nakú.
Re kaja unká inaꞌuké iyálaje,
unká kaja nawíyoꞌolaje kewini yajwé.
20 Re unká kerákoꞌopana, wajé mothoꞌojíkaño,
takaꞌalaje meketánaja iꞌimajemi.
Unká kaja pheñawilana takaꞌalaje,
unká chiyó riphá rená chojé najló.
Natakaꞌajika ee cien jarechí cha neꞌemajika wakajé,
walijímakana joꞌó neꞌemajika.
Natakaꞌakela, unká chiyó nephátala cien jarechí cha,
nuwajákarena neꞌemakajla.
21-22 Pají nalaꞌajíkare chu neꞌemajé,
unká na kaꞌalaje riká naliyá.
Najmaꞌajé kaja kajmú icha nejátajikare,
unká apú kaꞌalaje riká naliyá.
Júpija nuleꞌejena inaꞌukena iꞌimajika ejaꞌawá chu riwakajé.
Aꞌawaná iꞌimaká ketana júpika,
ke neꞌemajika wajé ejaꞌawá iꞌimajíkare chu.
Nakaje nalaꞌajíkare najluwa yuréjero najló,
palá napechu iꞌimakáloje raú penaje.
23 Unká najápalaje mapeja riwakajé.
Unká kaja nayani takaꞌalaje,
unká chiyó nephá palá nená chojé,
neꞌemakale nuleꞌejena inaꞌukena yaní, nulaꞌakárena palá.
Ñaké kaja nayani iꞌimajika palá.
24 Nemájika yámona nojló nakaje nakú,
nulaꞌakáloje najló penaje, nulaꞌajé riká,
natajátaka piyá nujwaꞌaté puraꞌakano.
25 Riwakajé yawi, ejaꞌawá eꞌiyowaje, oveja iꞌirí waꞌaté,
kele ajñájeño naꞌajnewá pawaꞌáchaka.
León ajñaje jimichi, jema pirakana ajñaka riká ke kaja.
Jeí ajñaje teꞌerí.
Nuleꞌejé pajimila, yenuri nakú iꞌimakare eꞌiyá,
unká na kalé laꞌajeri chapú re”,
ke Tupana kemaká wajé jeꞌechú, ejaꞌawá waꞌaté iꞌimajíkare nakú. a