Tupana wakáraꞌajika inaꞌuké iꞌimatájeri penaje yukuna marí
61
Unká chiyó Tupana iꞌirí iphá marí ejaꞌawá nakojé, Tupana iꞌimá riyukuna Isaíasjlo iꞌimaká. Rimá:1 “Nujwaꞌaté Tupana Pechu,
wajápakaloje pajwaꞌatéchaka penaje.
Riwakáraꞌa nuká, nuꞌumakáloje palani yuku unká weꞌepílaño Tupana nakojejlo.
Riwakáraꞌa kaja nuká,
nupalaꞌatákaloje kamuꞌují péchurunajlo napechu.
Tupana jáchoꞌotari inaꞌuké puꞌuwaré laꞌakaná chiyá.
Riwakáraꞌa kaja nuká, nuꞌumakáloje najló palá Tupana laꞌajíkare neká yukuna.
Riwakáraꞌa kaja nuká, nuꞌumatákaloje inaꞌuké chapú nalaꞌajeño liyá.
2 Riwakajé Tupana, wapechu iꞌimakare chojé kaphí,
cháꞌatajeri chapú wanaku péchuruna.
Riwakáraꞌa kaja nuká, nupalaꞌatákaloje piyuke kamuꞌují péchuruna pechu. a
3 Nulaꞌajé Sión e iꞌimakaño nakú palá,
náchoꞌokoloje chapú kaje chiyá, puꞌují kaje chojé penaje.
Neyájikare apumí chojé, puꞌují napechu iꞌimajé.
Ujwí napechu iꞌimajika nakuwá ejomi,
nataneje nojló palá nulaꞌaká neká yale.
Neꞌemajé kaja aꞌawaná kajrú nojé,
Tupana ejátakare iꞌimaká ke,
inaꞌuké amákaloje raú nakaje Tupana laꞌakare palá wani penaje”,
ke Tupana iꞌimaká Isaíasjlo riyukuna iꞌimaká.