Jonás puraꞌakó Tupana waꞌaté
2
Jiña wo chiyá iꞌimajemi Jonás puraꞌó Tupana waꞌaté marí ke:2 “Nupechu iꞌimichá: ‘¿Kaja chi nukapiícho?’, ke.
Raú nowíyoꞌoko nuꞌumichaka pijló chapú kaje yajwé nomíchaje yukuna.
E pemiꞌichá noꞌopiyá palá nupuriꞌichako pijwaꞌaté.
Kaja takaꞌakaje penaje nuꞌumichákajla aú nupuriꞌichó pijwaꞌaté.
E pemiꞌichá noꞌopiyá palá, nakaje numíchaje nakú pijló.
3 Kaja pikiꞌichá nuká juni jalomi iphuta chojé.
Taꞌakheni wani chuwá nuꞌumichá,
riyokola, kajruni wani piwakáriꞌichaje, jaꞌapíchari kaja nuchawa.
4 Nupechu iꞌimichá kaja pinaku:
‘Kaja kaꞌajná rikiꞌichá nuká riꞌimaká eyá’, ke.
Chuwa kaꞌajná kaja unká nomálaje piño riñakaré, riꞌimakare chu.
5 Kaja yaꞌajná wani nuꞌumichá juni iphuta chu.
Piyuke jewechí, juni iphuta chuwá iꞌimakare,
jepoꞌotíyaka nuwílaꞌaru.
6 Nuwitúkiꞌichaka juni iphuta chojé ee, nupechu iꞌimichá:
Chuwa kaja nuꞌumajika matajnako wani rileꞌejé wajákelana chu, ke.
Eꞌiyonaja piká, Tupana, piyukeja nakaje miná iꞌimakare,
iꞌimatíyari nuká kapichákajo chiyá.
7 Nupechu iꞌimichaka: ‘Nukapichako chuwaka’, ke,
e nuweꞌepicha piká, Tupana.
Kaja nupurákaꞌalo, numakare nakú pijló meꞌetení,
iphicha pinaku, piñakaré piꞌimakare chu ejo.
8 Eyá nakaje jenami chojé pechu iꞌimakaño kaphí papumí chojé ke,
unká laꞌalá nakaje piwátaka ke.
9 Eyá nuká, puꞌují nupechu pinaku, palá wani pilaꞌakale nuká.
Ñakele noꞌojé pijló nakaje piwátakare.
Nulaꞌajé kaja nakaje numakare nakú pijló iꞌimaká.
Pikaja kalé, Tupana, weꞌepiri nuꞌumatákana kapichákajo chiyá”,
ke Jonás puraꞌakó Tupana waꞌaté jiña wo chiyá iꞌimajemi.
10 E Tupana wakáraꞌari jiña chilákaka riká juni turenaje, raú richilaka riká keꞌepé nakojé.