2 —Piꞌijná chuwa kele kajruni wani pajimila Nínive ejo. Piꞌimichá najló nukapichátajika kele pajimila, piyuke rewá iꞌimakaño waꞌató yukuna. Kajrú wani puꞌuwaré nalaꞌakare yukuna iphaka majó nunaku, ñakele nukapichátaje neká ripachá.

3 Eꞌiyonaja unká Jonás jemaꞌalá Tupana jaꞌapiyá, raú ratáꞌajla riliyá ñaakajo, riꞌijnaká piyá riwakáraꞌaka riká ejo. Raú riwitúkaꞌa pajimila Jope punuma chojé, re riphata pajluwaja wapuru yewíchaja jáchoꞌoko pajimila Tarsis ejo. Najló raꞌá riwemiwa, nawáꞌakaloje riká najwaꞌató rejo. E kaja náchoꞌo reyá. 4 Kaja yaꞌajicha neꞌejnaká juni jalomi chuwá, rejéchami Tupana wakáraꞌaka karená aphoꞌoká kaphí wani, raú kajrú wani juni jalomi yokoꞌokó. Raú piyuke richu iꞌimakaño pechu iꞌimaká: “Chuwa kaꞌajná wapuru ta majákaꞌatajiko piyukeja waꞌapiyá”, ke. 5 Rejéchami kajrú wani wapuru jaꞌapátajeño keroꞌokó, raú pajluwano, pajluwano ke, puraꞌakó richiꞌinárikana ke iꞌimakare rijló waꞌaté, naꞌakáloje nañathé penaje. Eꞌiyonaja kajrú wani riyokola iꞌimaká, raú nakeñoꞌó nakaje nawapúrune chu iꞌimakare kupátakana piyukeja juni jalomi jakojé, ráchoꞌokoloje wejápaja penaje. Aꞌapona ke Jonás iꞌimaká manaꞌita kamátakajo nakú kawaká, apú ukapú nalamáꞌatakare chu nakaje, chu. Kaja matami rikamátako, 6 e wapuru chu jápajeño wakáraꞌajeri witúkaꞌari Jonás iꞌimaká kamátakajo nakú ejo. Riphaka rinaku ee, rimá rijló:

—¿Na chi pilaꞌá ta kamátakajo nakú manaꞌija? ¡Tapuraꞌaphá ta!, páchoꞌo kiñaja, pipuraꞌó Tupana, pipechu iꞌimakare chojé kaphí waꞌaté. Apala pipalamane raꞌajé rinakojó weká, riꞌimatákaloje weká kapichákajo liyá.

7 Aꞌapona ke wapuru chu jápajeño puraꞌakó pajwaꞌatéchaka, nemá:

—Wakaꞌachí yenoje mapeja papera kaje jítami lanaꞌakéjami, raú waweꞌepíkaloje na pachaka walaꞌaká chapú wani meꞌetení.

E kaja nakaꞌá papera kaje jítami yenoje, e raꞌó Jonás ií nakojé. Raú naweꞌepí ripachá riꞌimaká ñaké, e neꞌejná rijwaꞌaté puraꞌajó. 8 Nemá rijló:

—Pimá wajló, ¿na pachá chi wamá chapú kaje yajwé meꞌetení? ¿Na chi pijápakaꞌala kele, iꞌijnari wajwaꞌaté majó? ¿Mere eyaje chi piká? ¿Na chi piteꞌeré? ¿Na nakiyana chi piká?

9 Raú rimá najló:

—Hebreo jaꞌa nuká, kaphí nupechu Tupana chojé. Ejaꞌawá, jeꞌechú, juni jalomi, kaje maká keñoꞌótajeri riká numá nakú ijló.

10-11 Riꞌimá kaja najló riñaakó Tupana liyá yukuna. Ilé ke rimaká najló ejéchami, namaka richaje, richaje ke wani juni jalomi yokola iꞌimaká. Riká keroꞌótari wani najló, raú nemá rijló:

—¿Naje chi pilaꞌá ilé ke wani? ¿Meke chi walaꞌakajla piká chuwa, karená jaꞌapákaloje penaje?

12 Raú Jonás kemari najló:

—Ikaꞌá nuká juni jalomi jakojé, raú riyuríkaloje yokoꞌokajo. Nuweꞌepí nupachá ta karená noka weká kajrú wani.

13 Eꞌiyonaja ijnú nawátaka rikaꞌakana junápeje. Natáꞌajla leñákaje, nephákaloje riturenajo penaje, eꞌiyonaja richaje, richaje ke karená aphoꞌoká kaphí wani. 14 Unká meke nalaꞌalá, raú napuraꞌó Tupana waꞌaté, mawó nemaká rijló:

—Tupana, piyuríniña wakapichako piyukeja wani marí inaꞌuké pachá. Unkájika ee rilaꞌá puꞌuwaré, pimaniña wanaku: “Neká kapichátaño riꞌimaká”, ke. Piká, Tupana, laꞌarí piyukeja nakaje, pipechu nakú riꞌimaká ke.

15 Ilé ke napuraꞌakó Tupana waꞌaté ejomi, napatá Jonás, nakaꞌakáloje riká juni jalomi jakojé. Rejéchami karená jaꞌapaka. 16 Ilé ke wapuru chu jápajeño amaka aú, nephá wani Tupana jaꞌapí. Ñakele naꞌá piyukeja nakaje pechu Tupánajlo. Nemá kaja rijló: “Chuwa walaꞌajika piyuke nakaje piwátaka ke”.

17 Kaja nakaꞌá Jonás junápeje, rejé Tupana wakáraꞌari jiña kajruni wani ajmíloꞌoka riká. Riwó chu riꞌimá weji ke kala ketana.