Tupana wajari inaꞌuké, ripalaꞌatá kaja napechu. Riyukuna marí
57
14 Rejéchami Israel lakénami jemaꞌajika marí puraꞌakajo:15 Tupana, ajopana chaje wani iꞌimaká, matajnako wani iꞌimajika, unká wani laꞌalá puꞌuwaré, kemari rinakuwá marí ke:
“Yenú nopukuna, rewá unká puꞌuwaré laꞌakaná iꞌimalá.
Re nuká, re kaja nuká kamuꞌují laꞌakaño waꞌaté pechu nanakuwá:
‘Mapeja iꞌimakaño weká’ ke, waꞌaté kaja nuká.
Eyá chapú kaje yajwé amájeño waꞌaté, re kaja nuká,
nulaꞌakáloje napechu najló kaphí,
naweꞌepíkaloje raú palá neꞌemajika aꞌajná ñoꞌojó chami.
16 Unká ñakeja wani kalé numájika nuleꞌejena inaꞌukena nakú:
‘Unká paala laꞌajeñó neká’, ke.
Unká kaja nuyúchaꞌalajo nachá júpija wani.
Marí ke nulaꞌakela neká, piyuke inaꞌuké,
nukeñoꞌótakarena, pechu laꞌakojla ujwí nuliyá.
17 Nuleꞌejena inaꞌukena, Israel lakénami, laꞌaká pachá puꞌuwaré,
nuyúchaꞌo nachá meketánaja iꞌimaká.
Ilé ke nalaꞌaká pachá nuwajá neꞌemaká, rejomi nuyurí neꞌemaká.
Unká wani nemaꞌaké noꞌopiyá iꞌimajika,
kaja napechu keja wani nalaꞌajika puꞌuwaré nojé nakaje.
18 Kaja nomá meke laꞌajéñoka,
eꞌiyonaja unká nuwajálaje neká kajrú wani.
Nulamáꞌataje napechu.
Noꞌojé najló watánaꞌakaje, napechu watánaꞌakaloje palá penaje.
Nupalaꞌataje kamuꞌují péchurunajlo napechu, napechu iꞌimakáloje palá penaje.
19 E numaje piyukéjajlo:
Nuká laꞌajeri nuleꞌejena inaꞌukena pechu palá,
nakawílaꞌako piyá na nakú.
Ke riꞌimajika yaꞌajnawa iꞌimakáñojlo, maárowa iꞌimakáñojlo waꞌató.
Nupalaꞌataje nuleꞌejena inaꞌukena pechu.
20 Eyá unká ñaké kalé puꞌuwaré laꞌajéñojlo.
Juni jalomi kaja yokoꞌokajo iꞌimaká, keja neká.
Unká juni jalomi iꞌimalá manaꞌija,
kaja yokoꞌokajo nakuja riká,
raú riyokola aú rikojloꞌó puꞌuwaré nojé kajakaꞌapé riturenawa,
raú puꞌuwaré nojé nakaje yuró reꞌiyowá.
21 Ñaké kaja puꞌuwaré laꞌajeñó iꞌimaká ejaꞌawá chu,
unká neꞌemalá palá”, ke Tupana kemaká nanaku.