Aꞌakachi wani Tupana. Riyukuna marí
55
Marí ke Tupana kemaká piyukeja inaꞌukénajlo:“Piyuke wátaño juni iꞌirakánajlo numá: ‘Majó iꞌirichá juni’.
Eyá unká liñeru iꞌimalárenajlo numá:
‘Majó, ijiꞌichá ijluwa trigo, ajñákaloje penaje.
Majó ijiꞌichá kajmú kaje jalá, jema pirakana chuꞌuchure waꞌaté,
unká riwemí iꞌimalaje ijló’.
2 ¿Naje chi ikaꞌá mapeja wani iliñérute,
unká aꞌajnejí penaje kalé iꞌimakare nakojé?
¿Naje chi ikaꞌá mapeja wani iliñérute nakaje,
unká laꞌalá iná pechu puꞌují nakojé?
Jemaꞌá palá noꞌopiyá, raú ajñaje palá nojé aꞌajnejí,
poꞌomá nojé wani.
3 Majó iꞌijná, aꞌá inakojó nupurákaꞌalo, raú iꞌimajé palá.
Nupuraꞌajó ijwaꞌaté nakaje nakojé, riꞌimakáloje ñaké ijló penaje.
Raú ráchoꞌokoloje, numaká rinaku Davidjlo iꞌimaká ke,
íkiꞌija nuwátakale riꞌimaká.
6 Ñakele numá ijló: Ikulá nuká ipechu aú.
Iwaꞌa kaja nojló, awaꞌá nuꞌumaká ketana.
7 Nuwata puꞌuwaré laꞌajerí pajnoꞌotaka ripéchuwa
puꞌuwaré rilaꞌakare liyá, rilaꞌakáloje palá penaje.
Nakaje riꞌijnatákare ripéchuwa nakú apoꞌojó nuliyá,
nuwata riyurika riliyó riká.
Paminá nuká. Ipaꞌó nuká ejo.
Nuká weꞌepiri kamuꞌují inaku.
Wechi nomako ichaje puꞌuwaré ilaꞌakare liyá.
8-9 Unká nuꞌujnatala nupéchuwa nakaje nakú,
iꞌijnataka ipéchuwa rinaku ke kaja.
Apoꞌojó nulaꞌaká nakaje ilaꞌakare liyá.
Jeꞌechú iꞌimaká teꞌerí chawa, ke kaja nupechu ipechu chawa.
Ñaké kaja nakaje nulaꞌakare iꞌimaká,
nakaje ilaꞌakare chaje”, ke Tupana kemaká.
10 “Juni, nieve waꞌaté, jaꞌaró jeꞌechú chiyá marí teꞌerí nakojé.
Rejomi unká ripaꞌaló piño kiñaja rapumí chuwá.
Paineko rejata teꞌerí, raú nakaje icha ijí iphákaloje palá penaje.
Riká tawáꞌaro palá, rejomi rarúkaꞌa.
Riká icha ijí iꞌimari piño inaꞌukejlo,
nejátakaloje riká apú ewá, apú ewá ke penaje.
Richa nakiyana kaja najñaꞌá najluwa, najñákaloje penaje.
Riká penaje juni, nieve waꞌaté, jaꞌaró teꞌerí eꞌiyajé.
11 Ñaké kaja nupurákaꞌalo, numakare nakú inaꞌukejlo.
Paineko inaꞌuké jemaꞌañó riká,
raú nalaꞌá nakaje nupechu nakú riꞌimaká ke.
Raú kaja nalaꞌá nakaje, nuwakáraꞌaka nalaꞌaká ke.
Riká penaje nuyurí nupurákaꞌalo inaꞌukejlo”,
ke Tupana kemaká.