Unká chiyó Tupana iꞌirí iꞌimá marí ejaꞌawá chu wakajé, Tupana iꞌimá inaꞌuké laꞌajika riká chapú yukuna. Riyukuna marí
53
¿Na laꞌajé kewaka piyuke nakaje weꞌemajíkare najló yukuna?¿Najlo chi Tupana aꞌá puꞌuwaká,
nakaje rikaja kalé weꞌepíkare laꞌakana?
2 Nakaje ijí iphaka makajreni teꞌeré eꞌiyá,
laꞌarí raꞌapárewa yaꞌajná teꞌerí eꞌiyajé,
ke kaja Tupana wátaka rijwaꞌaté jápajeri tawáꞌako.
Ñaké kaja ramaka rijwaꞌaté jápajeri laꞌajika lakaꞌapheji inaꞌuké waꞌaté.
Unká palani kalé ramákana iꞌimajika,
unká nawátala riká ramákana aú.
3 Nalaꞌá riká unká inaꞌukélari ke najluwa,
unká nawátala riká.
Kajrú wani ramájika chapú kaje yajwé, kewini yajwé waꞌató.
Kaja chapú kaje yajwé amákana aꞌá renó rinaku.
Marí ke ramájikale kajrú wani chapú kaje yajwé,
unká inaꞌuké wátala ramákana.
Kaja weká laꞌañó riká wajluwa, unká inaꞌukélari ke wani,
ñakele unká waꞌalá wanakojó riká.
4 Chapú kaje wamákarejla yajwé rijñaꞌá panaku wachaya,
wacháyaja kalé ramá piyukeja chapú kaje yajwé.
Weꞌejnatá wapéchuwa rinaku:
“Tupana wajari riká.
Riká wakáraꞌari nalaꞌaká riká chapú,
rilaꞌakáloje riká rijluwa mapéjari keja penaje”,
ke wapechu iꞌimaká rinaku.
5 Eꞌiyonaja unká ñaké kalé riꞌimaká rijló.
Puꞌuwaré walaꞌakare pachá, ramá kajrú wani chapú kaje yajwé.
Unkale wemaꞌalá Tupana jaꞌapiyá,
Tupana wajari riká wapumí chojé.
Puꞌuwaré walaꞌakare pachá, kewí nañaꞌatájika riká,
wapechu palaꞌakóloje Tupana waꞌaté raú penaje.
Ilé ke nalaꞌajika riká chapú,
weꞌemakóloje kapichákajo chiyá penaje.
6 Kapichájeño penájena weká piyukeja.
Ovéjana kapichako naminá liyá, ke kaja weká.
Kaja wapechu keja pajluwano, pajluwano ke,
walaꞌaká nakaje puꞌuwaré.
Eꞌiyonaja Tupana wajá Riꞌirí wapumí chojé,
puꞌuwaré walaꞌakare pachá,
ramákoloje wachaje raú penaje.
7 Chapú wani nalaꞌaká riká,
eꞌiyonaja kaja keja riyurika nalaꞌaká riká chapú;
unká meke rimalá najló, manumarú kaja riꞌimaká.
Oveja najñaꞌaká, ke kaja najñaꞌaká riká, nenókaloje riká penaje.
Unká oveja iꞌirí wáꞌala ralojlo
najñaꞌaká aú riká rinókelana ejo.
Unká kaja riwáꞌala ralojlo, napiroꞌokachu richijné.
Ñakeja kaja riꞌimaká rijló.
Unká meke rimalá najló, chapú nalaꞌaká riká wakajé.
8 Unká na pachá kalé nawáꞌa riꞌimaká.
Unká na rilaꞌalá puꞌuwaré, nawajákaloje riká penaje.
Unká kaja na iꞌimalá, ripuraꞌakóloje richaya penaje.
Unká na wo kaꞌaló rijwaꞌaté, nalaꞌaká aú riká chapú.
Nenó riká.
Nakapichata riká, puꞌuwaré ntámijimi ujwaꞌatéjena laꞌakare chaya. a
9 Rejomi natoꞌotá ritami ñakajelana chojé,
ajopana inaꞌukena, puꞌuwaré laꞌakaño michuna, tami awaꞌajé.
Unká wani rilaꞌalá puꞌuwaré, eꞌiyonaja nalaꞌá riká ñaké.
Unká kaja na waꞌaté kalé ripajlá.
10 Kaja keja Tupana wátaka ramaka chapú kaje yajwé.
Nenó riká, puꞌuwaré inaꞌuké laꞌakare chaya.
Ñakele riyurí nalaꞌaká riká chapú, piyukeja inaꞌukena chaya.
Raú Tupana yurí riꞌimaká matajnako,
ñakele riká amájeri rijwaꞌatéjena.
Ripalamane piyuke nakaje Tupana pechu nakú iꞌimakare jáchoꞌojero palá.
11 Kajrú wani ramaka chapú kaje yajwé,
rejomi palá Tupana pechu iꞌimajika rinaku.
Palá ripechu iꞌimajika, riweꞌepíjikale kaja kajrú rijwaꞌaté
jápajeri iꞌimatájika inaꞌuké kapichákajo liyá.
Puꞌuwaré nalaꞌakare chaya rijñaꞌá kajrú wani chapú kaje panaku.
12 Ilé ke rilaꞌakale palá, Tupana aꞌarí riká,
riꞌimakáloje ajopana, palá laꞌajeñó waꞌaté.
Ajopana, cháꞌatajeño palá laꞌakaná aú waꞌaté riꞌimajé,
riyuríkale richó ajopánajlo, nenókaloje riká penaje.
“Ajopana, puꞌuwaré laꞌajeñó, ke kaja riká”, ke napechu iꞌimaká rinaku.
Eꞌiyonaja ilé ke rilaꞌakare aú, rikaꞌá kajrú inaꞌukena nakiyá puꞌuwaré nalaꞌakare.
Ripuraꞌó kaja Tupana waꞌaté puꞌuwaré laꞌajeñó chaya.