Meke Tupana wátaka inaꞌuké laꞌaká, neꞌetakó naꞌajné liyá wakajé, yukuna marí
58
E Tupana kemari piño nojló:“Pawíyoꞌo kaphí wani, pikeroꞌoniño ñaké awíyoꞌokana piyá,
rimejé jemaꞌakóloje luwiluwí mejé ke kaja.
Pakhaꞌá kaja nuleꞌejena inaꞌukena puꞌuwaré nalaꞌakare chona.
2 Weꞌechú kaꞌalá keja neꞌejnataka napéchuwa nunaku.
Eyá puꞌují kaja napechu,
naweꞌepíkale palá nakaje nuwátakare nalaꞌaká nakojé.
Marí ke nujwaꞌatéjena pechu, palá laꞌakaño pechu ke kaja:
Unká yurílaño naliyó nupurákaꞌalo kemaká ke laꞌakana,
ke kaja nalaꞌaká nekó najwaꞌaté, palá laꞌajeñó ke.
Ñakele puꞌují napechu ke neꞌejnataka napéchuwa nunaku.
3 Eꞌiyonaja nemá: ‘¿Na penaje weꞌetaó waꞌajné liyá,
ñaké unká Tupana aꞌalá rinakojó weká?
¿Na penaje chi wajñaꞌá meꞌepijí panaku,
wapechu iꞌimakáloje rinákuja raú penaje?
Mapeja walaꞌaká ñaké, unkale raꞌalá rinakojó weká’,
ke nemaká nunaku.
4 Iꞌitakó aꞌajné liyá wakajé,
pajwaꞌatéchaka akhaꞌákakano nakú iká,
jimaje inoko pajwaꞌatéchaka.
Kaphí itujlaꞌátaka pekowáaka puꞌuwaré wani.
Ilé ke ilaꞌakale iꞌitakó aꞌajné liyá wakajé aú,
unká noꞌolá nunakojó ipurákaꞌalo
ipuraꞌakochu nujwaꞌaté, noꞌokáloje iñathé penaje.
5 ¿Meke ipechu nakú, iná iꞌitakó iná aꞌajné liyá wakajé?
Iná amá kewini yajwé,
riwakajé kaja iná akúwaꞌata iná wílaꞌaru kawakaje,
palá riꞌimakáloje nojló penaje.
¿Ke chi ipechu nakú riká?
Riwakajé kaja aꞌano inakuwá aꞌarumaká puꞌuwareni costal nakiyá laꞌakanami,
rijwaꞌaté itoꞌokóloje paꞌilá eꞌiyá penaje.
¿Ilé ke ilaꞌaká wakajé chi imá nakú:
‘Waꞌajné liyá weꞌetaó chuwajá,
riꞌimakáloje palá Tupánajlo penaje?
Ñakele chuwajá palani Tupánajlo’, ke ipechu rinaku.
6 ¡Unká wani nuwátala piyuke nakaje ilaꞌakare ilé ke!
Nojló marí ke laꞌakana palani iꞌitakó aꞌajné liyá wakajé:
Riwakajé nuwata aꞌaká inaꞌuké ñathé.
Riwakajé kaja nuwata ipuraꞌakó inaꞌuké chaya,
ajopana wajaka piya mapeja neká.
Re kaja inaꞌuké nakiyana,
kaphí nawakáraꞌaka najwaꞌaté jápajeño jápaka najló,
eꞌiyonaja wejápaja ñani naꞌaká najló najápakaꞌala wemí,
raú unká méñoꞌojo náchoꞌolo kamuꞌují kaje iꞌimakana chiyá.
Ilé kajena aꞌajé ñathé,
nakariwátena wakáraꞌaka piyá neká kaphí wani.
Jáchoꞌota neká naliyá, najápakaloje najluwa,
nawátaka ke penaje.
Itajata iliyó inaꞌuké laꞌakana chapú.
7 Aꞌá kaja aꞌajné nakiyana ñaꞌañó meꞌepijí panákujlo,
unkale naꞌajné iꞌimalá.
Imá kaja unká ñakaré iꞌimaláñojlo,
nakúwaꞌakoloje ijwaꞌaté iñakaré chu penaje.
Aꞌá kaja aꞌarumaká nakiyana unká aꞌarumaká iꞌimalájeñojlo.
Iyuríniña inakiyana ñathé aꞌakana.
8 Rejéchami piyuke inaꞌuké amájika palá ilaꞌakare.
Iná amaka mejámaꞌatani jáchoꞌoko lapiyami,
ke kaja namájika nakaje ilaꞌakare.
Ilé kaje laꞌakana aú palá wani ilaꞌajika.
Raú aphú, inapona nakuwá iꞌimakare, palaꞌajó ijló kiñaja.
Palá ilaꞌajíkare yukuna jemaꞌajero méñoꞌojo iꞌijnajika ewá.
Nuꞌujnajé kaja ijwaꞌaté.
9-10 Ipuraꞌajiko ee nujwaꞌaté, noꞌojé nunakojó ipurákaꞌalo.
Eyá kaphí imájika ee nojló, noꞌokáloje iñathé penaje,
numaje ijló: ‘Maare nuká’, ke.
11 Ñakeja nuꞌumajika jenakú laꞌakana nakú.
Noꞌojé ñóꞌope aꞌajnejí ijló, desierto chuwá iꞌimaká wakajé.
Noꞌojé kaja iñathé, iꞌimakáloje peyajwéruna wani penaje,
inapona iꞌimakáloje ijló katejmuni.
Nakaje icha ijí, iná ejátakare iná mená eꞌiyá,
iphari palá, tawáꞌaro palá,
arúkaꞌakari palá nojé richa, ke kaja iꞌimajika palá.
Muthú, ñakeja wani juni jeñoꞌokare chiyá,
ke kaja iꞌimajika nakaje laꞌakana palá nakú.
12 Inakiyana laꞌajeño piño rapumí chuwá nakaje
napichátakare júpimi iꞌimaká.
Nemaje inaku: ‘Kurara, jipa nakiyá laꞌakanami, laꞌajeñó neká’, ke.
Kurara, nakajyaꞌatákare júpimi iꞌimaká, ilaꞌajé piño rapumí chojé.
Pají, nakajyaꞌatákare júpimi iꞌimaká, ilaꞌajé kaja rapumí chojé.
‘Nañakaremi, nakajyaꞌatákare júpimi iꞌimaká apumí chojé laꞌajeñó neká’,
ke nemájika inaku”, ke Tupana kemaká najló.
Watánaꞌakaje jená wakajé yukuna marí
13 Marí ke Tupana kemaká watánaꞌakaje iꞌimaká wakajé nakú:
14 “Marí ke ilaꞌajika ee, puꞌují ipechu iꞌimajika,
nupalamane iꞌimajíkale.
Nuká aꞌajeri iñathé, iꞌimakáloje ajopana chaje.
Palá ipechu iꞌimajika iteꞌeré, aꞌajuta Jacob yuríkare ijló iꞌimaká nakú”,
ke Tupana kemaká nanaku.