Nakaje jenami, inaꞌuké iphákare jaꞌapí, yukuna marí
44
9 Piyukeja neká laꞌañó nakajena jenami, nephákaloje raꞌapí penaje, unká wemí iꞌimalá na penaje. Unká kaja na penaje kalé nakaje jenami nalaꞌakare, kajrú nawátakare. Piyukeja laꞌañó napéchuwa puꞌují nakaje jenami nalaꞌakárejlo, iꞌimaño mejluruna keja. Kaja mapechúruna ke wani nalaꞌaká nekó raú. “Unká napechu iꞌimalá”, ke Tupana pechu nanaku. 10 Puwíchaꞌari nakajena jenami, nephákaloje raꞌapí, iná iphaka iná chiꞌinárikana jaꞌapí ke kaja, kapichátari mapeja wani rileꞌejé weꞌechú kaꞌalá rilaꞌakana nakú. 11 Piyukeja laꞌañó puꞌují napéchuwa nakaje jenami nalaꞌakárejlo, laꞌañó nekó inaꞌuké mapechúruna ke wani. Inaꞌuké, weká keja kaja neká, laꞌañó nakaje jenami, nephákaloje raꞌapí penaje. Nawáꞌakela ajopana inaꞌukena jimaje neká, nemakáloje nanaku mékajenaka neká, mapeja wani neꞌemakajla rejéchami. Kajrú kaja nakurúkajikajla, nawakáraꞌajikale nawajákana.12 Waweꞌepí mékeka pejruꞌuwá nakú jápajeri jápaka pejruꞌuwá nakú. Paineko rijñaꞌá rikápojo pejruꞌuwá jawátajona. Rejomi rilaꞌá pejruꞌuwá, rijápakare nakú, imaꞌá kerápela chaje. Riweꞌepika palani riká ejéchami, rijñaꞌaká martillo rawátajona waꞌaté. Rejomi rikeñoꞌó nakaje jenami laꞌakana. Kajrú wani raꞌaká ritejmuwa, rilaꞌakáloje riká penaje. Ñakele unkachu pejruꞌuwá nakú jápajeri ajñala raꞌajnewá palá, kiñaja ritejmú tajnako. Eyá unkachu riꞌiralá juni, kiñaja rayaꞌakó. Ke pejruꞌuwá nakú jápajeri laꞌaká nachiꞌinárikana jenami najló.
13 Eyá palá kaja waweꞌepika mékeka aꞌawaná nakú jápajeri jápaka aꞌawaná nakú. Paineko rijñaꞌá palá aꞌawaná, rijápajikare nakú jená, rená ñaꞌajona aú. Rejomi rilanaꞌá rinaku kalá aú, kecha makapúkuchini lanaꞌajona aú rilanaꞌá riká piyuke rawátajika riká ewá. Rejomi rikeñoꞌó rinaku jápakana. Palá rilaꞌaká inaꞌuké jenami; palá ramako, inaꞌuké ke kaja. Riñapátakaja rilaꞌakana ejomi, riyáꞌata riká nawakákaꞌalo ñakarelana chojé, nalaꞌakare chu puꞌují napéchuwa rinaku. Ke aꞌawaná nakú jápajeri laꞌaká nachiꞌinárikana jenami najló.
14 Eyá apú kaꞌajná ejátari palá nojé aꞌawaná. Riká tawáꞌaro kiñaja, juni jaꞌakole palá richaje. Raú júpichami re rijló kajrú aꞌawaná, riꞌikakáloje penaje. Rejomi rirá riká, rilaꞌakáloje nakaje raú penaje. Riwátajika ee, rikulá apú aꞌawaná palá nojé, ejaꞌawá eꞌiyowá iꞌimakare. Ramá riká palá, riwátaka ke chijleka, rejéchami riꞌikaká riká rijluwa. 15 Riká aꞌawaná nakiyana najñaꞌá, naphoꞌotákaloje raú, naꞌanapakáloje raú penaje. Rinakiyánaja kaja neꞌiyajena ñaꞌañó, neꞌemátakaloje pan raú penaje. Eyá rikaja kaja aꞌawaná nakiyana neꞌiyajena ñaꞌañó, nalaꞌakáloje najluwa nachiꞌinárikana jenami. Rijimaje najlámaꞌo, nephákale raꞌapí.
16 Rinakiyana aú kaja naphoꞌotá, neꞌemákaloje riꞌimi richá penaje. Najñá riꞌimi nawátaka ejé, palá napechu raú. Naꞌanapá kaja keraꞌathani awaꞌá, nemá rinaku: “Meke palá wani waꞌanapaká keraꞌathani awaꞌá. Palani nuká, kaja unká ipeꞌení iꞌimalá nojló chuwa”. 17 Eyá rikaja kaja aꞌawaná jepoꞌoná nakiyá nalaꞌá najluwa nakaje jenami, nephákaloje raꞌapí penaje. Rijló nemá: “Piꞌimatá weká kapichákajo liyá, wachiꞌinárikana piꞌimakale”.
18 Inaꞌuké ilé ke laꞌajeñó unká weꞌepila nakaje nalaꞌakare nakojé, raú mejluruna keja neká. Kamachá newílaꞌaru najló, raú unká méñoꞌojo naweꞌepila naka kewaka. 19 Unká kaja napechu iꞌimalá najluwa, naweꞌepíkaloje palá nakaje nalaꞌakare nakojé. Ilé ke napechu iꞌimakale, unká nemalá: “Marí aꞌawaná nakiyana wajñaꞌá iꞌimaká, waphoꞌotákaloje raú penaje. Rinakiyana aú ja kaja weꞌemata wajluwa pan, riꞌimi waꞌaté, wajñákaloje penaje. Eyá repoꞌonami nakiyana aú ja kaja walaꞌá wajluwa wachiꞌinárikana jenami, wephákaloje raꞌapí penaje”. Renami nalaꞌakárejlo nalaꞌá puꞌují napéchuwa, unká nemalá nakú: “Aꞌawaná jepoꞌonámija ta kaji”, ke. 20 Waweꞌepí kewaka unká na penaje kalé nakaje nalaꞌakare. Iná ajñákela pailá iná aꞌajnewá, unká raꞌalajla iná eꞌiyajé. Keja kaja nakaje nalaꞌakare. Mapeja wani nemaꞌaká pajlakaje purákaꞌaloji jaꞌapiyá, ñakele unká ilé kajena iꞌimalajo kapichákajo liyá. Unká naliyá iꞌimalá, naweꞌepíkaloje nakaje jenami nakapi iꞌimakare, unká iná chiꞌinárikana kalé riká.