Tupana waꞌaté jápajeri yukuna marí
42
Marí ke Tupana kemaká pajluwa rijwaꞌaté jápajeri nakú:“Nojló nakaje laꞌajerí riká.
Ajopana eꞌiyayá nuꞌuwapá nujluwa riꞌimaká.
Íkiꞌija nuwátakare riká.
Puꞌují kaja nupechu rinaku.
Rijló noꞌojé nupechu.
Palá nulaꞌakare inaꞌuké nakú yukuna riꞌimajé piyuke inaꞌukénajlo:
ajopana, ajopana teꞌeré eyájenajlo ke.
2 Unká rakhaꞌákalajo ajopana waꞌaté;
unká kaja rawíyoꞌolaje najló.
3 Raꞌajé chapú kaje yajwé amájeño ñathé,
raꞌajé kaja ujwí péchuruna ñathé.
Ilé ke rilaꞌajika, palá laꞌajeñó wakáraꞌajeri riꞌimajíkale.
Rejomi unká puꞌuwaré laꞌakaná iꞌimalaje.
4 Unká riwatánaꞌalaje, unká kaja ripechu laꞌalajo ujwí,
aꞌajná piyukeja inaꞌukena iꞌimajika palá pajwaꞌatéchaka,
reyá aꞌajná ñoꞌojó.
Piyukeja inaꞌukena, ejaꞌawá chu iꞌimakaño,
aꞌajeño kaja nanakojé ripurákaꞌalo”.
5 Tupana keñoꞌótari jeꞌechú,
riꞌimakáloje piyuke ejaꞌawá chawa penaje.
Rikeñoꞌota kaja teꞌerí, piyuke nakaje iphákare reꞌiyayá waꞌató.
Raꞌá kaja kajmuchaji, tejmuji waꞌaté inaꞌukejlo,
ejaꞌawá rikeñoꞌótakare chu iꞌimakáñojlo.
Riká penájemi kemari marí ke rijwaꞌaté jápajerijlo:
6 “Nuká, Tupana, iꞌiwapari piꞌimaká nujluwa,
piꞌimakáloje inaꞌuké iꞌimatájeri,
pipalamane neꞌemakóloje kapichákajo liyá penaje.
Noꞌojé piká, piꞌimakáloje palá inaꞌuké waꞌaté.
Pipalamane inaꞌuké weꞌepéjeño mékajeka nuká.
7 Nuwata paꞌaká inaꞌuké mejlurúnajlo amákaje.
Páchoꞌotaje kaja inaꞌuké, inaꞌuké wajákelana,
kalajeruni iꞌimakare chu chiyá.
8 Nukaja kalé iꞌimajeri inaꞌuké wakáraꞌajeri wani.
Ñakele unká nuyurílaje napuraꞌakó ajopana chiꞌinárikana nakú,
napuraꞌakó nunaku ke kaja.
Unká kaja nuyurílaje nephaka nakaje jenami jaꞌapí nopumí chojé.
9 Amá chuwa mékeka nakaje,
numakare nakú júpimi iꞌimaká jáchoꞌoko,
numakare rinaku iꞌimaká chuwá.
Ñakele chuwa numájika piño ijló wajé nakaje nakú.
Kaja nuꞌumá ijló riyukuna,
iweꞌepíkaloje rinakojé unká chiyó riꞌimá ñaké”,
ke Tupana kemaká rijwaꞌaté jápajeri nakú.