Palá Tupana puraꞌakó nanaku
40
Tupana, ipechu iꞌimakare chojé kaphí, kemari marí ke:“Ipalaꞌatá nuleꞌejena inaꞌukena pechu.
2 Ipuraꞌó palá ipechu ke, Jerusalén eyájena waꞌaté.
Imá najló: ‘Kaja chuwa mapeja ajopánajlo jápakana tajnó ijló’, ke.
Kaja naꞌá puꞌuwaré nalaꞌakare wemí.
Kaja nuwajá neká piyuke nakaje nalaꞌakare puꞌuwaré pachá”.
3 Nemaꞌajé pajluwaja inaꞌuké awíyoꞌoka desierto chu:
4 “Chuwa ipalaꞌatá ipéchuwa palá, wawakáraꞌajeri pe.
Ipajnoꞌotá kaja ipéchuwa Tupana ejo, puꞌuwaré ilaꞌakare liyá”. a
5 Ilé ke ilaꞌajika ee, Tupana yaꞌatájeri rikó ijló palá wani.
Piyuke inaꞌukena amaje ñaké riká.
Kaja rikoja Tupana kemaká rinaku ñaké.
6 Nemaꞌajé kaja pajluwaja kemaká: “Pawíyoꞌo”, ke.
Raú numá rijló: “¿Meke chi numájika nowíyoꞌoko?”
Marí ke pimájika: “Jimichi keja piyuke inaꞌuké iꞌimajika,
unká neꞌemalaje júpija.
Aꞌawaná iwí, phuꞌuteni chuwá iꞌimakare, ke neká.
Riká ñaꞌarí panaku meketánaja,
keja kaja najñaꞌajika panaku”.
7-8 Mapeja Tupana meríyaꞌataka jimichi,
aꞌawaná iwí kaje maká,
riwakáraꞌakale karená aphoꞌoká reꞌiyajé.
Ñakele kewaka, jimichi keja piyukeja inaꞌukena Tupánajlo.
Piyukeja jimichi meríyaꞌako, ñaké kaja aꞌawaná iwí,
rejomi kaja unká na iꞌimalá.
Eyá unká ñaké kalé Tupana, kaphí wapechu iꞌimakare chojé, purákaꞌalo. Ñakeja wani Ripurákaꞌalo iꞌimajika matajnako.
25 Tupana, unká laꞌalá puꞌuwaré, kemari:
“¿Na nakú chi imajla, imakáloje nunaku: ‘Rejenowaja riká nujwaꞌaté’, ke?
Unká na iꞌimalajla nuká ke,
kajrú wani nulaꞌakale nakaje.
26 Iyakaꞌo jeꞌechú chaje,
amá mékeka piyukeja nakaje reꞌiyowá iꞌimakare.
¿Na keñoꞌótari piyukeja wani nakaje jeꞌechú chu iꞌimakare?
Nuká kalé keñoꞌótari riꞌimaká.
Rejomi nutamákaꞌata iwijrina palá
pajluwano, pajluwano ke.
Eyá noꞌó kaja neí pajluwano ke nanakojó.
Nuká waja laꞌarí piyuke ñaké.
Kajrú wani nuweꞌepíkale nakaje laꞌakana,
unká kaja nuyurila nanakiyana kapichako.
27 Israel, Jacob lakénami, ¿naje akhaꞌá piyukeja nakaje maná?
¿Naje imá nunaku?:
‘Chuwa unká Tupana aꞌalá rinakojó chapú kaje yajwé wamákare.
Kaja unká raꞌalá rinakojó weká’ ”,
ke Tupana kemaká.
28 Unká kaꞌajná jemaꞌalá riyukuna.
Riká Tupana, ñakeja wani iꞌimajika,
keñoꞌótari piyukeja wani nakaje iꞌimaká,
unká wo iꞌijnalá, rilaꞌakachu nakaje, unká kaja rayaꞌaló.
Kajrú wani péchuri riká.
29 Raꞌá tejmuji kaja jayaꞌakáñojlo.
Rilaꞌá kiñaja jayaꞌakaño pechu kaphí,
natejmú iꞌimakáloje piño raú penaje.
30 Walijímakana iꞌimakaño jayaꞌañó kaja, nawó iꞌijná kaja.
Katejmúruna wani iꞌimakaño waꞌató
jaꞌañó teꞌerí jimaje natejmú tajnákochu.
31 Eyá kaphí Tupana chojé péchuruna,
tejmú iꞌimajeri ñakeja wani.
Perina, katejmúruna, unká jayaꞌalaño,
ajraño yenuwa, ke kaja neꞌemajika.
Jechoꞌokajo nakú neꞌemajé, eꞌiyonaja unká nayaꞌalajo.
Jaꞌapákaje nakú neꞌemajé, eꞌiyonaja unká nawó iꞌijnalaje,
Tupana aꞌajíkale najló wajé tejmuji.