Palá Tupana laꞌajika inaꞌuké wakajé nataneje marí ke
12
Riwakajé pimaje marí ke:“Palá wani pilaꞌaká nuká, Tupana.
Yurí piꞌimaká nujwaꞌaté iꞌimaká,
eꞌiyonaja kaja chuwa piyuchá jaꞌapá piliyá,
raú kaja pipalaꞌatá nojló nupechu.
2 Tupana iꞌimatari nuká kapichákajo liyá,
ñakele kaphí nupechu richojé.
Unká na piyá nukeroꞌoló.
Riká mejñátari nuká.
Riká laꞌarí peyajwé nuká, nutejmú iꞌimakáloje penaje.
Ñakele nuꞌumatájeri wani riká”.
3 Makajreni wani iná núrupi iꞌimakachu,
puꞌují iná pechu laꞌakó iná iꞌiraká aú juni.
Puꞌují ipechu ke imakajla Tupánajlo,
riꞌimatákaloje iká kapichákajo liyá penaje.
4 Tupana iꞌimatájika iká kapichákajo liyá ejéchami,
imájika marí ke:
5 “Ataní Tupánajlo, rilaꞌakale ijló kajrú wani nakaje.
Aꞌajla piyuke inaꞌukena, ejaꞌawá chu iꞌimakaño,
jemaꞌajla riyukuna”.
6 Sión eyájenajlo numá:
“Awíyoꞌo kaphí, puꞌují ipechu iꞌimakale.
Re Tupana, unká laꞌalá puꞌuwaré,
Israel lakénami pechu iꞌimakare chojé kaphí iꞌimakale ijwaꞌaté re.
Ijwaꞌaté meꞌetení Tupana, kajrú wani laꞌaká nakaje”.