11
Jesé iꞌimari David jaraꞌapá.Riká David lakénami eꞌiyayá, pajluwa kerákoꞌopa mothoꞌojeri,
riꞌimakáloje piyukeja wani wakáraꞌajeri penaje.
2 Ñakeja wani Tupana Pechu iꞌimajika reꞌiyá.
Raꞌajé kaja rijló péchuji, riꞌimakáloje kapechuni wani penaje,
riweꞌepíkaloje raú piyuke nakaje nakojé penaje.
Riweꞌepeje kaja palá rijwaꞌatéjena wakáraꞌakana.
Riweꞌepeje nakaje laꞌakana Tupana wátaka ke.
Palá wani riphájika Tupana jaꞌapí.
3 Riweꞌepeje mékajenaka inaꞌukeka neká;
unká rimalaje mapeja inaꞌuké nakú
mékajenaka neká namákana aú ja.
Unká kaja rimalaje na nakú: “Marí kajena neká”, ke,
nawajákana nakú.
4 Unká na aꞌalárena ñathé, ñathé raꞌajé,
ajopana laꞌaká piyá neká chapú.
Rimaje kaja mékeka rijló nakaje nalaꞌajíkare iꞌimajika:
palani kaꞌajná, unká paala kaꞌajná.
Ripuraꞌajó kaja kamuꞌují laꞌakaño chaya,
ajopana laꞌaká piyá neká nawátaka ke,
pajimato nalaꞌakáloje inaꞌuké nakú palá rewá penaje.
Ripurákaꞌalo aú ja riwajaje
laꞌañó chapú ajopana inaꞌukena, raú kaja rikapichátaje unká inaꞌukélaruna.
5 Palá kaja riweꞌepíjika ritukumó mékeka inaꞌuké wakáraꞌakana kewákaje purákaꞌalo chuwá.
Ñakeja wani rilaꞌajika inaꞌuké nakú palá.
Meke nakaje iꞌimajika aꞌajná ñoꞌojó chami yukuna marí
6 Riwakajé kaja manaꞌija juwálake kaje iꞌimajika oveja iꞌirí waꞌaté, palá napechu iꞌimajika panakuwáaka.
Eyá yawi, ejaꞌawá eꞌiyowaje,
watánaꞌajeri manaꞌija kawayá pirakana iꞌirí awaꞌá.
Riwakajé kaja manaꞌija jema pirakana iꞌirí tawáꞌajiko león awaꞌá;
manaꞌija najñájika naꞌajnewá pawaꞌáchaka.
Manaꞌikena neꞌemajika riwakajé,
mapeja yuwají kamuꞌujini chiraꞌátajika neká riwátajika ewá.
7 Palá jema pirakana iꞌimajika oso waꞌaté.
Eyá nayani iꞌimajíkaño, watánaꞌajeño manaꞌija pawaꞌáchaka.
Riwakajé león ajñájeri kaja jimichi,
jema pirakana ajñaka riká ke.
8 Manaꞌija kaja yuwají kátajiko jeí awaꞌá,
unká rajmaꞌalaje riká.
Rarúkaꞌajejla riyátheꞌela jeí ñakaré chojé,
eꞌiyonaja unká rajmaꞌalaje riká.
9 Tupana leꞌejé ipuré nakú unká na iꞌimalaje
wátari nalaꞌakana chapú rewá.
Ilé ke riꞌimajika riwakajé, piyukeja wani inaꞌukena,
ajopana teꞌeré nakuwá, ajopana teꞌeré nakuwá ke, jemaꞌajeño Tupana jaꞌapiyá.
10 Riwakajé pajluwaja Jesé lakénami amátaje
ajopana teꞌeré eyájena wakáraꞌajeño,
raú neꞌejnajé riteꞌeré ejo ramaje.
Palá wani rapukuna riꞌimajíkare chu iꞌimajika.