Nawakáraꞌajeri mothoꞌojika yukuna riꞌimá najló marí ke iꞌimaká
9
Paineko chiyó Tupana laꞌarí rijluwa mapéjari keja Galilea teꞌeré Zabulón, eyá Neftalí, kele iꞌimakare eꞌiyá. Aꞌajná ñoꞌojó chami unká ñaké kalé riꞌimajika najló, Tupana laꞌajíkale neká palá rewá. Rejomi kajrú inaꞌukena pechu iꞌimajika palá nateꞌeré nakú. Ajopana teꞌeré toꞌoró juni jalomi, Mediterráneo rií, eyá ají ke Jordán paꞌanojo pitá ejená. Reyájena jemaꞌajeño kaja palá Tupana laꞌajíkare Zabulón, eyá Neftalí, kele teꞌeré nakú yukuna. Yenojo Galilea teꞌeré nakú ajopana inaꞌukena iꞌimaño, unká weꞌepílaño Tupana nakojé. Jemaꞌajeño kaja mékeka Tupana laꞌaká Zabulón, eyá Neftalí teꞌeré nakú.2 Kalajeruni chuwá iꞌimakaño, ke kaja rewájena iꞌimajika.
Neká penájemina amájeño kajrú mejámaꞌatani pataká nachá,
neꞌemaká piyá kalajeruni chu. a
3 Tupana, piká laꞌajé puꞌují wani napechu.
Puꞌují kaja napechu iꞌimajika pinaku.
Puꞌují wani inaꞌuké pechu,
kajrú nakaje nejátakare icha ñaꞌakana wakajé,
ke kaja napechu iꞌimajika.
Ñaké kaja napechu puꞌují,
natamákaꞌatakachu nakaje kawemí nojé pajlokaka wakajé.
Napechu iꞌimaká palá riwakajé ejé,
ke kaja napechu iꞌimajika palá pilaꞌajíkare neká nakú.
4 Puꞌují napechu iꞌimajika pinaku,
páchoꞌotajikale neká wakáraꞌaño najápaka najló mapeja liyá.
Chapú nalaꞌajika neká, raú ujwí wani napechu iꞌimajika.
Tejmuji nawakáraꞌajika nalaꞌaká nakaje.
Ilé kaje chiyá piꞌimataje neká, raú puꞌují napechu iꞌimajika pinaku.
Júpimi ke Madián eyájena laꞌajika neká chapú iꞌimajika.
Pikapichátaka neꞌemaká wakajé, puꞌují napechu iꞌimaká.
Ñaké kaja napechu iꞌimajika piño,
piꞌimatájika ee neká chapú nalaꞌajeño liyá.
5 Eyá suráana jiꞌimaꞌulami, nañaajíkarono chu nanaku,
piyuke naꞌarumakami, nérami iꞌimakare eꞌiyá,
kaje maká pikapichátaje keraꞌathani aú.
6 Ilé ke riꞌimajika najló, pajluwaja kerákoꞌopa mothoꞌojíkale maare weꞌiyá.
Tupana aꞌajeri wajló Riꞌirí, riꞌimakáloje wawakáraꞌajeri penaje.
Marí ke naꞌajika rií:
“Piyukeja wani nakaje nakú péchuri.
Tupana, unká na kalé cháꞌatakare.
Waraꞌapá, matajnako iꞌimakare.
Palá iꞌimakaño pajwaꞌatéchaka wakáraꞌajeri”,
ke naꞌajika rií.
7 David michú apumí chojé riyurejo wawakáraꞌajeri penaje.
Piyukeja ajopana teꞌeré eyájena, ajopana teꞌeré eyájena ke,
wakáraꞌajeri penaje riꞌimajika.
Eyá ñakeja wani rijwaꞌatéjena pechu iꞌimajika palá panakuwáaka.
Ñakeja wani riꞌimajika rileꞌejena inaꞌukena wakáraꞌajeri,
unká na kalé kaꞌajeri riká richiyá.
Palani purákaꞌaloji chuwá waja rilaꞌajé nakaje,
unká na kalé rilaꞌajé apoꞌojó.
Riwakajé, eyá aꞌajná ñoꞌojó, ñakeja rilaꞌajika palá wani.
Ilé ke Paminá wani laꞌaká palá nojé nakaje.
Weꞌepiri piyukeja nakaje laꞌakana nakojé,
rilaꞌajé inaꞌuké palá, íkiꞌija riwátakale neká.