Isaías kemari mékeka rikeñoꞌoká Tupana Purákaꞌalo jaꞌapátajeri iꞌimakana yukuna marí
6
Weꞌemakana Uzías michú takaꞌaká iꞌimaká wakajé, nomá Tupana yáꞌako rapukuna, jeꞌechú yenú wani iꞌimakare chu. Raꞌarumaká, riwajlé chu akúwaꞌakaro, manoꞌotá riñakaré riꞌimakare chu. 2 Eyá richawa ke ajopana rijwaꞌatéjena iꞌimaká keraꞌathani ke. Pajluwa kuwáꞌata kele nayuphé iꞌimaká nanakuwá. Iyamá nayuphé aú napáraꞌa najimá, iyamá aú kaja napáraꞌa neꞌemá, eyá apú iyamá aú najá. 3 Neká kemaño pajlokaka:“Palá laꞌajeri, palá laꞌajeri, palá laꞌajeri Tupana.
Paminá wani riká, piyukeja laꞌajeri kaja riká.
Piyuke ejaꞌawá chuwá ripalacha”,
ke nemaká pajlokaka.
4 Ilé ke nanúrupi mejé jemaꞌakó, rejéchami Tupana ñakaré numaná ñakaꞌatako, waꞌaté ke ija iꞌimaká piyukeja riñakaré chuwá. 5 Raú nuꞌujnatá nupéchuwa: “Meke chapú wani nulaꞌajika chuwaka. Chuwa nutakaꞌajika, nomíchakale palá wani wawakáraꞌajeri Tupana. Piyuke wani weꞌepika nakaje laꞌakana riká. ¿Eyá nata nuká, nomákaloje riká penaje? Puꞌuwaré puraꞌajero nuká. Ñaké kaja ajopana inaꞌukena, nuꞌumakárena waꞌaté, puraꞌakó puꞌuwaré nakaje nakú”.
6 Rejéchami pajluwaja, keraꞌathani ke iꞌimakaño nakiyana, ajari nuꞌumaká ejo. Kerápela patajona iꞌimá rikapi, raú rijñaꞌá kerápela altar nakiyá. 7 Riká aú rijapa nunuma nakú, e rimá nojló:
“Piyakaꞌo, marí kerápela aú nujápicha piture.
Kaja nukiꞌichá piliyá puꞌuwaré pilaꞌakare.
Kaja Tupana amicha pichaje, puꞌuwaré pilaꞌakare liyá”.
8 Rejomi nomaꞌaká Tupana kemaká:
“¿Na chi nuwakáraꞌaje?
¿Na kaꞌajná jaꞌapátajeri wapurákaꞌalo yukuna ajopánajlo?”
Raú numá rijló:
“Maare nuká, piwakáraꞌa nuká”.
9 Raú rimá nojló:
“Piꞌijná chuwa, pimá piyuke inaꞌukénajlo:
Jemaꞌajejla riyukuna,
eꞌiyonaja unká iweꞌepílaje meke kemakánaka riꞌimajika.
Amájejla piyukeja nakaje,
eꞌiyonaja unká iweꞌepílaje meke kemakánaka riká.
10 Pikechíraꞌa napechu, pitá kaja neꞌejwí,
nemaꞌaká piyá riyukuna.
Papáraꞌa kaja nejlú, namaka piyá nakaje nulaꞌajíkare,
naweꞌepika piyá meke kemakánaka riká,
napajnoꞌotaka piyá napéchuwa puꞌuwaré nalaꞌakare liyá nuká ejo, nulamáꞌataka piyá napechu najló”,
ke rimaká nojló. a
11 Raú numá rijló:
“Tupana, ¿meketana júpika riꞌimajika najló ñaké?”
Rimá nojló:
“Piyuke marí pajimila yuríjiko kajyaꞌatákeja.
Unká na iꞌimalaje rinaku, unká kaja nañakaré iꞌimalaje,
kaja piyuke desierto ke riꞌimajika ejená.
12 Tupana kaꞌajeri nateꞌeré naliyá.
Meñaru wani nateꞌeré iꞌimajika rejomi.
13 Apala nanakiyánaja kalé iꞌimajeño re,
eꞌiyonaja neká kaja kapichájeño.
Aꞌawaná iꞌikakejami ke neꞌemajika, riꞌilámija kalé yuréjero”.
(Eyá riꞌilami keja rileꞌejena inaꞌukena keñoꞌojé piño wajé ke iꞌimakana.)