Jataní Tupánajlo wajé jataníkaje
96
Jataní Tupánajlo wajé jataníkaje.Piyukeja iká, ejaꞌawá chu iꞌimakaño, jataní Tupánajlo.
2 Ipuraꞌó palá rinaku; weꞌechú kaꞌalá keja iꞌimaká ajopánajlo riꞌimataka iká kapichákajo liyá yukuna.
3 Ipuraꞌó kaja palá nakaje riweꞌepíkare laꞌakaná nakú;
iꞌimá riyukuna piyukeja inaꞌukena marí ejaꞌawá chu iꞌimakañojlo.
4 Ilé kaje nakuja ipuraꞌó, piyuke wani laꞌajeri Tupana iꞌimakale.
Richáꞌata piyuke ajopana chiꞌinárikana.
5 Unká na penaje ajopana chiꞌinárikana iꞌimalá, rikaja kalé Tupana keñoꞌótari jeꞌechú iꞌimaká.
6 Riꞌimaká ewá, re kajrú palá nojé mejámaꞌatani;
rewá kaja nalaꞌá kajrú wani nakaje palá; jimáreni wani kaja Tupana ñakaré.
7 Piyuke inaꞌukejlo numá:
Ipuraꞌó palá Tupana nakú, riweꞌepíkale piyuke wani nakaje laꞌakana nakojé.
8 Ilé kaje riꞌimakale, iphá raꞌapí.
Imujlúkaꞌajika kewá riñakaré chojé,
ijñaꞌá ijwaꞌató nakaje, aꞌakáloje rijló riká penaje.
10 Imá ajopana teꞌeré eyájena, ajopana teꞌeré eyájenajlo marí ke:
Piyuke inaꞌuké wakáraꞌajeri wani Tupana.
Kaja riyurí ejaꞌawá pajluwa rapukuna chojé,
unká na kalé atatárijla riká reyá.
Rejenowaja rilaꞌaká palá piyukeja inaꞌukena, riwakáraꞌakarena nakú palá.
11 Ejaꞌawajlo, jeꞌechujlo waꞌaté numá: Ipechu iꞌimá puꞌují.
Eyá juni jalómijlo numá kaja: Pilaꞌá kajrú pimejewa;
piyukeja pakú iꞌimakaño waꞌató laꞌaré namejewa.
12 Eyá puꞌuthenijlo numá kaja:
Pipechu iꞌimá puꞌují; pinaku iꞌimakaño waꞌató laꞌaré kaja puꞌují napéchuwa.
Eyá aꞌawaná ejaꞌawá chu iꞌimakárejlo, numá kaja: Awíyoꞌo, puꞌují ipechu iꞌimakale.
13 Ilé ke ilaꞌajika Tupana jimaje, riphájika majó wakajé.
Riká waícha majó, riꞌimakáloje piyukeja ejaꞌawá chu iꞌimakaño wakáraꞌajeri penaje.
Piyuke inaꞌuké, ejaꞌawá chu iꞌimakaño, wakáraꞌajeri riꞌimajika.
Palá riwakáraꞌajika neká kewákaje purákaꞌaloji chuwá.