Pikaja kalé, pajluwaja wachiꞌinárikana, Tupana
86
Tupana, pemaꞌá noꞌopiyá nakaje numájikare nakú pijló.Kamuꞌují wani nupechu nujluwa, kamuꞌují kaja nulaꞌaká.
2 Pamá nuká palá, piwátaka ke laꞌajeri nuꞌumakale.
Nuchiꞌinárikana piká.
Piꞌimatá nuká, pijwaꞌaté jápajeri nuꞌumakale,
pichojeja kalé kaja nupechu iꞌimakale kaphí.
3 Tupana, piweꞌepí numuꞌují.
Ñakeja nupuraꞌakono pijwaꞌaté, paꞌakáloje nuñathé penaje.
4 Tupana, pilaꞌá marí pijwaꞌaté jápajeri pechu puꞌují,
pijwaꞌateja kalé nupuraꞌono, paꞌakáloje nuñathé penaje.
5 Palájneꞌeke wani piká Tupana,
ñakele pamó iná chaje puꞌuwaré iná laꞌakare liyá.
Íkiꞌija kaja piwátaka piyukeja pijwaꞌaté puraꞌajeño.
6 Tupana, paꞌá pinakojó nakaje nupuraꞌakaro nakú pijwaꞌaté.
Pemaꞌá noꞌopiyá numájika kewá pijló, paꞌakáloje nuñathé penaje.
7 Chapú kaje yajwé nomájika wakajé, nupuraꞌajó kaja pijwaꞌaté, nuñathé aꞌajeri piꞌimakale.
8 Unká na apú chiꞌinárikanaji iꞌimalá piká ke.
Tupana, unká na apú iꞌimalá laꞌarijla nakaje pilaꞌaká ke kaja.
9 Tupana, piká keñoꞌótari piyukeja inaꞌukena ejaꞌawá chuwá iꞌimakaño, ajopana teꞌeré nakú, ajopana teꞌeré nakú ke iꞌimakaño.
Neká penájemina iphájeño pinaku, nalaꞌakáloje puꞌují napéchuwa pijló.
Napuraꞌakoloje kaja palá wani pinaku,
10 pikaja kalé pajluwaja iꞌimakale Iná Chiꞌinárikana.
Kajruni wani piká; kajrú kaja pilaꞌaká nakaje, pikaja kalé weꞌepíkare laꞌakana.
11 Tupana, pewíñaꞌata nuká, nakaje piwakáraꞌakare iná laꞌaká nakú, nulaꞌakáloje riká palá piwátaka ke. Paꞌá nuñathé, nuyurika piyá nuliyó piwátaka ke laꞌakana.
Pilaꞌá nupechu palá, nuphákaloje paꞌapija kalé penaje.
12 Tupana, nuwakáraꞌajeri piká, kaphí kaja nupechu pichojé,
ñakele pinákuja kalé nupuraꞌajó palá ñakeja wani.
13 Íkiꞌija wani piwátaka nuká, ñakele piꞌimatá nuká takaꞌakaje liyá.
Kaja liri chu keja nuꞌumaká, richiyá páchoꞌota nuꞌumaká.
14 Tupana, re neká laꞌañó nanakuwá ajopana cháꞌatajeño ke wani,
chapú péchuruna neká, unká kaja naꞌalá nanakojó piká.
Chapú nanakiyana amaka nuká; nawata nonókana.
15 Eyá piká, Tupana, inaꞌuké wani piká nujwaꞌaté.
Piweꞌepí kaja kamuꞌují nunaku.
Unká piyúchaꞌalo kiñaja iná cha, íkiꞌija wani kaja piwátaka inaꞌuké.
Pimaká nakaje nakú keja pilaꞌaká riká.
16 Paꞌá pinakojó nuká; piweꞌepí numuꞌují.
Piꞌimatá kapichákajo liyá nuká, pijwaꞌaté jápajeri nuꞌumakale.
Paꞌá nuñathé, kaphí nupechu iꞌimakáloje penaje.
17 Pilaꞌá nojló nakaje,
raú nuweꞌepíkaloje palá pilaꞌakare nuká nakojé.
Ñaké chapú nunaku péchuruna amájika ee paꞌaká nuñathé, napáñaꞌajo naꞌapiwá.
¡Tupana, paꞌá nuñathé, pipalaꞌatá kaja nupechu nojló!