JOB
Job yukuna marí
1
Us teꞌeré nakú pajluwa inaꞌuké iꞌimaké, rií iꞌimari Job. Palá laꞌajerí riꞌimajika, palá wani kaja remaꞌajika Tupana jaꞌapiyá. Unká na rilaꞌaké puꞌuwaré, Tupana wátajika ke rilaꞌajikale nakaje. Palá kaja ramájika rikó, rilaꞌaká piyá chapú ajopana. 2 Iyamá kuwáꞌata kele Job yaní iꞌimaká achiñana, eyá inaana iꞌimaño weji kele. 3 Pirájina miná wani riꞌimaká. Kajrú ripirana iꞌimaká: siete mil ovéjana, eyá tres mil caméllona, eyá mil jémana pirakana, eyá quinientos rikawarútena iꞌimaká. Kajrú kaja rijwaꞌaté jápajeño iꞌimajika, ñaké kaja rinane iꞌimajika, raú richáꞌatake piyuke ajopana rinane aú.4 Ñakeja Job yaní awakájikono nekámika ke pajwaꞌatéchaka, apú neꞌewé ñakaré chojé, apú neꞌewé ñakaré chojé ke, najñákaloje naꞌajnewá pajwaꞌatéchaka penaje. Nawakájiko kewá nayukupéraꞌakeno kaja weji kele neꞌewelona. 5 Ilé kaje nañapátajika ejomi, naraꞌapá wáꞌakerino namaná. Eyá muní ke rapókeno lapiwá, rikáraꞌatakaloje riyani chaya ripirana nakiyana pajluwano, pajluwano ke chaya, rilamáꞌatakaloje piño neká palá Tupánajlo raú. Rilaꞌaké ñaké neká, ripechu iꞌimajíkale nanaku: “Apala napechu nakuwaja napuraꞌó puꞌuwaré Tupana nakú”, ke.
6 E pajluwape Tupana waꞌatéjena, jeꞌechú chiyájena, awakaño Tupana jimaje. E arukátari Tupana jaꞌapiyá jemaꞌajeño rijló, nakaje unká nalaꞌalare palá chona, iphari kaja rejé najwaꞌaté. (Jiñá Chiꞌinárikana riká). 7 Rijló Tupana kemá:
—¿Mere eyá chi piphicha majó?
Raú Jiñá Chiꞌinárikana kemari:
—Mapeja nuchiraꞌakó ejaꞌawá chuwá, ají ñoꞌojó, ají ñoꞌojó ke.
8 Raú Tupana kemari rijló:
—¿E pamaka nujwaꞌateje Job? Unká na apú iꞌimalá marí ejaꞌawá chu riká ke wani, laꞌarí palá nuwátaka ke. Nupurákaꞌalo kemaká ke laꞌajerí riká, ñakele palá laꞌajerí riká. Unká na rilaꞌalá puꞌuwaré, palá kaja ramaka rikó, rilaꞌaká piyá chapú ajopana inaꞌukena.
9 Raú rimá Tupánajlo:
—Palá wani joꞌó rilaꞌaká kewaka nakaje piwátaka ke, paꞌakale riñathé. 10 Kajrú kaja pimejñátaka riká, riyani waꞌaté, na laꞌaká piyá neká chapú. Raú pilaꞌá neká palá, paꞌá kaja riñathé, kajrú wani rinane iꞌimakáloje penaje. Piká aꞌarí riñathé, piyukeja nakaje rilaꞌakare aú ráchoꞌokoloje palá rijló penaje. Unká kaja na apú iꞌimalá riteꞌeré eꞌiyowá cháꞌatari riká rematena aú. 11 Ilé kaje rinane pikaꞌakela riliyá piyuke, ripuraꞌojla puꞌuwaré pinaku pijimaya iꞌimajemi.
12 Raú Tupana kemari rijló:
—Ñaké riká. Pilaꞌá piwátaka ke piyuke nakaje Job kapi iꞌimakare waꞌaté; riká kalé unká wani nuwátala pikapichátaka.
Rejéchami Jiñá Chiꞌinárikana jaꞌapaka Tupana iꞌimaká eyá.
13 E apú wakajé manaꞌija Job yaní, achiñana iꞌimaká neꞌewelona waꞌaté, naꞌajnewá ajñakana nakú neꞌewé pheꞌejrí ñakaré chu. 14 Eꞌiyowá ke, pajluwa Job waꞌaté jápajeri iphaka rinaku riñakaré ejé rijló kemaje:
—Manaꞌija weꞌemichaka pimena eꞌiyá, ajopana waꞌaté, teꞌerí mojyoꞌokana nakú jémana waꞌaté. Eyá re kaja pikawarútena iꞌimichá, aꞌajnare ke wawaꞌá jimichi ajñakana nakú. 15 Eꞌiyowá ke manaꞌí chiyó sebéona nakiyana iphíchaka wanaku. Neká jatiꞌiyaño piyuke pematena, pikawarútena waꞌaté, rejomi nenótiya piyuke nujwaꞌaté iꞌimichákaño michuna. Irajú aú najoꞌotiya neꞌiyajé. Nukaja kalé iꞌimicharó naliyá, nuꞌujnatákaloje majó pijló riyukuna penaje —ke rimaká Jobjlo.
16 Unká chiyó ritajata riyukuna iꞌimakana palá rijló, eꞌiyowá ke, apú rijwaꞌaté jápajeri iphaka piño rinaku rijló kemaje:
—Kajrú wani pichaní jaꞌachako ovéjana amájeño iꞌimichaka ejé. Riká nótiyari piyuke wani pileꞌejena ovéjana, nawaꞌaphena iꞌimakaño michuna waꞌató. Nukaja kalé iꞌimicharó riliyá, nuꞌujnatákaloje pijló riyukuna penaje.
17 Unká chiyó ritajata palá riyukuna iꞌimakana, eꞌiyowá ke, apú rijwaꞌaté jápajeri iphaka piño rinaku rijló kemaje:
—Kajrú caldéona iphíchaka wanaku wajwaꞌaté nókajo, neká jatiꞌiyaño piyuke pileꞌejena caméllona. Nenótiya kaja irajú aú piyuke nujwaꞌaté iꞌimichákaño michuna. Nukaja kalé iꞌimicharó naliyá, nuꞌujnatákaloje pijló riyukuna penaje.
18 Unká chiyó ritajata palá rijló riyukuna iꞌimakana, eꞌiyowá ke, apú iphaka piño rinaku rijló kemaje:
—Manaꞌija piyani iꞌimichaka neꞌewelona waꞌaté kajmoꞌokajo nakú neꞌewé peꞌejrí ñakaré chu. 19 E manaꞌí chiyó desierto chiyá karená iphicha kaphí wani, nañakaré neꞌemichaje chu nakojé. Riká kojnoꞌotíyari nañakaré nachá, nótiyari piyuke wani piyani michuna. Nukaja kalé iꞌimicharó, nuꞌujnatákaloje pijló riyukuna penaje.
20 Maárejechami kamuꞌují wani Job pechu laꞌakó; kamuꞌují ripechu ke rijiyoꞌotaka raꞌarumaká rinaku iꞌimakare. Rijaraꞌá kaja riwilá, rejomi rijlámaꞌo teꞌerí jimaje, rilaꞌakáloje ripéchuwa palá Tupánajlo penaje. 21 E rimá:
—Maꞌarumakaru nuphaka marí ejaꞌawá nakojé, nomothoꞌoká iꞌimaká wakajé. Ñakele ñakeja kaja nóchoꞌojiko piño rinakiyá, nuphaka rinakojé iꞌimaká keja kaja. Tupana aꞌarí kajrú wani nojló nakaje iꞌimaká, eyá rikaja kaja kaꞌarí piño nuliyá riká. Eyá meꞌetení rikiꞌichá nuliyá piyuke nakaje raꞌakare nojló iꞌimaká. Ñakele Tupánaja kalé palájneꞌeke wani.
22 Ilé ke Job amaka kajrú wani chapú kaje yajwé, eꞌiyonaja unká rilaꞌalá puꞌuwaré, unká kaja ripuraꞌaló puꞌuwaré Tupana nakú.