SALMOS
Naka laꞌarijla puꞌují iná pechu yukuna marí
1
Puꞌují péchuri inaꞌuké unká jemaꞌalá puꞌuwaré laꞌajeñó jaꞌapiyá,nakaꞌataka reꞌiyajé eꞌiyonaja.
Unká kaja rilaꞌalá puꞌuwaré, nalaꞌaká ke.
Unká kaja rilaꞌalá rijwákeꞌenawa laꞌaká
najluwa mapeja ke Tupana, iꞌichaño kaja rinaku.
2 Unká ñaké laꞌajeri kalé riká.
Marí ke rilaꞌaká:
Íkiꞌija riwátaka Tupana purákaꞌalo lanaꞌakéjami.
Ñakeja riꞌijnataka ripéchuwa rinaku weꞌechú, eyá lapí waꞌató.
3 Ilé ke laꞌajerí inaꞌuké iꞌimajeri paijí,
iná ejátakare juni turenawa palani teꞌerí iꞌimakare ewá, ke kaja,
rená chuwá arúkaꞌajika, unká kaja paná meríyaꞌalajo kiñaja.
Ke kaja riꞌimajika, riwátakale íkiꞌija Tupana purákaꞌalo,
ñakele piyukeja nakaje rilaꞌajíkare jáchoꞌojiko palá rijló.
4 Eyá puꞌuwaré laꞌajeñojlo, unká ñaké kalé nakaje iꞌimajika.
Aꞌawaná paná, mapeja karená ajátakare riwátaka ejo, keja neꞌemajika.
5 Tupana wajájikarena penájena neká, puꞌuwaré laꞌajeñó neꞌemakale,
ñakele unká neꞌemalaje pajñakani Tupana leꞌejena inaꞌukena waꞌaté.
6 Palá Tupana aꞌaká rinakojó nakaje palá laꞌajeñó laꞌakare,
ráchoꞌokoloje najló palá penaje.
Eyá puꞌuwaré laꞌajeñojlo,
unká ñaké kalé nakaje nalaꞌakare jáchoꞌoko.
Nakaje nalaꞌakare puꞌuwaré
pachá nakapichajo Tupana liyá.