Riká Tupana iꞌiwapakare inaꞌuké eꞌiyayá, riꞌimakáloje inaꞌuké wakáraꞌajeri penaje yukuna marí
2
¿Naje inaꞌuké, unká wani weꞌepílaño Tupana nakojé,yúchaꞌajo wani nawakáraꞌajeri cha?
¿Naje kaꞌajná neꞌejnataje kaja napéchuwa rikapichátakana nakú?
¿Naje kaꞌajná nawata nakaje,
unká na penaje kalé iꞌimakare laꞌakana?
2 Piyukeja ajopana chaje wakáraꞌakaño awakájiko pajñakani,
rejomi nalaꞌakáloje nakaje apoꞌojó,
neꞌemakana wani wakáraꞌajika nalaꞌaká liyá.
Pajñakani napechu iꞌimajika chapú
neꞌemakana wani Tupana iꞌiwapakare nakú.
3 Nawíyoꞌoje kaja marí ke:
“Cureti aú pi jepoꞌokéjana weká keja rijwaꞌaté.
Iꞌijná wáchoꞌocho richiyá.
Wáchoꞌocho kaja ripurákaꞌalo, repoꞌokare aú weká, chiyá”.
4 Kajrú Tupana, jeꞌechú chiyá iꞌimakana, iꞌichaká nanaku.
5 Rejomi rikeroꞌótaje najló riyuchá aú.
Yurí rimájika najló:
6 “Kaja noꞌó pajluwaja piyuke inaꞌuké wakáraꞌajeri penaje.
Nuleꞌejé yenuri, Sión e iꞌimakare, jiꞌiwata nakú riꞌimajé”.
7 Chuwa nuꞌumajika ijló meke
nuwakáraꞌajeri Tupana kemaká nunaku yukuna, rimá:
“Chuwa inaꞌuké weꞌepíjika Nuꞌurika piká,
eyá naweꞌepeje kaja Paraꞌapá nuká. a
8 Pimá nojló, nuyuríkaloje pijló piyukeja inaꞌukena ejaꞌawá chuwa iꞌimakaño,
ajopana teꞌeré, ajopana teꞌeré eyájena ke,
piꞌimakáloje nawakáraꞌajeri wani penaje.
Yaꞌajnó iꞌimakaño waꞌató nuyureje pijló,
neꞌemakáloje pileꞌejena inaꞌukena penaje.
9 Iná kutiware, pejruꞌuwá nakiyá laꞌakanami, aú iná kapichátaka poꞌorí,
ke kaja páchoꞌotajika inaꞌukena wakáraꞌajeño ajopana teꞌeré eyá,
ajopana teꞌeré eyá ke, neꞌemakana kaje iꞌimakana chiyá”,
ke rimaká nunaku iꞌimaká.
10 Piyuke wakáraꞌaño meꞌetenijlo numá:
Iweꞌepí palá nakaje numakare nakú ijló nakojé.
11-12 Ilaꞌá ipéchuwa puꞌují iwakáraꞌajeri wánijlo;
iphá raꞌapí, ijlámaꞌo kaja rijimaje, iphákale raꞌapí.
Ilé ke ilaꞌajika riká, riyúchaꞌako piyá.
Apala riyuchá akuwaná rikapichátajla iká,
kiñaja wani riyúchaꞌakole.
Puꞌují wani péchuruna neká kulaño riká,
riꞌimakáloje namejñátajeri penaje.