42
1-2 Kaja ewaja Job kemari marí ke Tupánajlo:“Nuweꞌepí piyukeja wani piweꞌepika nakaje laꞌakana;
unká na iꞌimalá unká piweꞌepílare laꞌakana.
3 Unká na kalé nuká, nulaꞌakáloje nujluwa unká kewaka ke kalé nakaje pilaꞌakare.
Raú iná weꞌepí unká nuweꞌepila nakaje nakojé.
Nupuraꞌó nakaje, unká nuweꞌepílare mékeka riꞌimajika nojló nakú.
Nakaje palá nojé wani, unká méñoꞌojo iná weꞌepílarejla nakojé, nakú nupuraꞌakó kaja.
4 Piká kemari nojló: ‘Pemaꞌá, nuwata purákaꞌaloji nakú kemakana pijló.
Paꞌajipá nojló nakaje nukejáꞌajikare piliyá yukuna nakojé’.
5 Maárejecha nakaje nemájikare pinaku aú ja kalé nuweꞌepike piká.
Eyá chuwa puꞌuwaká nomaka piká.
6 Ñakele chuwa nopáñaꞌako nakaje numakare nakú jaꞌapí.
Kaja nupajnoꞌotá nupéchuwa nakaje numakare nakú liyá.
Ñakele chuwa nuyáꞌako muꞌupé paꞌilá kaje eꞌiyá,
kamuꞌují nupechu iꞌimakale nunakuwá”,
ke Job kemaká Tupánajlo.
7 Tupana puraꞌaró Job waꞌaté paineko, rejomi rimá Elifazjlo: “Yurí wani nuká pijwaꞌaté, ñaké kaja yurí nuká kele iyamá pijwákeꞌena waꞌaté, unkale imalá kewaka nunaku, noꞌopiyá jemaꞌajeri Job kemaká nunaku ke. 8 Ñakele chuwa ijñaꞌá iyamá kuwáꞌata kele jémana pirakana achiñana, ñaké kaja kawayana pirakana. Kéchami iwáꞌaka neká nujwaꞌateje Job ejo, re ikáraꞌatakaloje nojló natami puꞌuwaré ilaꞌakare chaya. Rejomi nujwaꞌateje Job puraꞌajero ichaya nujwaꞌaté, nomákoloje ichaje penaje. Palani iwajákana iꞌimakajla, unkale ipuraꞌaló nunaku kewaka, nujwaꞌaté jápajeri Job puraꞌakó nunaku iꞌimaká ke kaja, eꞌiyonaja nomajo ichaje”, ke Tupana kemaká Elifazjlo.
9 Rejomi Elifaz, Bildad, eyá Sofar, kele iꞌijnaño, nalaꞌakáloje Tupana wakáraꞌaka nalaꞌaká ke penaje. Nephá Job nakú. E ripuraꞌó Tupana waꞌaté nachaya, raú Tupana aꞌá rinakojó ripurákaꞌalo.
10 Job puraꞌakó Tupana waꞌaté rijwákeꞌena chaya ejomi, palá wani Tupana laꞌaká piño riká, raú kajrú wani rinane iꞌimaká piño. Rinane kapicharo iꞌimaká, chaje ñóꞌopeka Tupana paꞌataka riká rijló rapumí chojé. 11 Raú piyuke rejena, reꞌewelona, eyá rijwákeꞌena, kele iꞌijnaño ramaje. Ñaké kaja júpimi ke ramákarena penájemina iꞌijnaká ramaje. Neká kajena awakaño piyuke riñakaré chojé, najñákaloje naꞌajnewá pajñakani rijwaꞌaté. Neká palaꞌataño ripechu, kajrú wani ramákale chapú kaje yajwé, Tupana wakáraꞌakare rijló iꞌimaká. Rejomi pajluwano, pajluwano ke, naꞌaká rijló naliñérute nakiyana. Ñaké kaja naꞌaká rijló anillo, oro nakiyá laꞌakanami.
12 Reyá aꞌajná ñoꞌojó, palá wani Tupana laꞌajika Job nakú. Júpimi rilaꞌajika riꞌimajika palá, chaje palaka rilaꞌajika riká riwakajé. Riwakajé catorce mil rileꞌejena ovéjana iꞌimaká, seis mil caméllona, dos mil jémana pirakana, mil kawaruna kajena, ke ripirana iꞌimaká riwakajé. 13 Riyani iꞌimaño kaja piño. Paꞌu kele iphata jiꞌimaji nakojé kele riyani iꞌimaká achiñana, eyá weji kele inaana iꞌimaká. 14 Pheꞌeruji ií iꞌimari Jemimá. Roꞌopejeru ií iꞌimari Quesía, eyá kaja penájeru ií raꞌá Queren-hapuc. 15 Paláruna wani riyani inaana iꞌimaká. Unká ajopana inaana iꞌimalá marí ejaꞌawá chu paláruna, neꞌemaká ke kaja. Naraꞌapá kemari kaja nanaku, rinane nakiyana yuríkoloje najló, achiñánajlo waꞌaté penaje, ritakaꞌaká ejomi.
16-17 Ilé kaje ejomi, júpija Job iꞌimaká piño ejaꞌawá chu. Ciento cuarenta jarechí ketana riꞌimaká ejaꞌawá chu. Kaja phíyuꞌuke wani riꞌimaká wakajé, ritakaꞌá iꞌimaká. Riwakajé kaja re rilakena iꞌimá; re kaja rilakena yaní iꞌimaká. Eyá nayani iꞌimaño kaja. Ritakaꞌaká piyá ramaka ñaké iꞌimaká.