16
1-2 E Job kemari rijló:“Kaja pulapé cha nomaꞌaká ajopana kemaká nojló ilé imaká ke kaja.
Majó iꞌijná iꞌimaká, ipalaꞌatákaloje nupechu nojló penaje,
eꞌiyonaja richaje wani ilaꞌaká nupechu kamuꞌují.
3 Unká mapeja purákaꞌaloji tajnálajo iꞌimajika.
Eyá nakaje, numakare nakú nutami nuꞌumaká ketana,
imá nakú piño apoꞌojó waja.
4 Meꞌetení iká amákela nopumí chojé chapú kaje yajwé,
marí nomaka riyajwé meꞌetení ke kaja ee,
ñaké kaja nupuraꞌakojla inaku,
ipuraꞌakó nunaku meꞌetení ke.
Rejéchami nukawitákajla nuwílaꞌaru,
nupuraꞌakóloje inaku weꞌepiri ke wani matajnako, nuwátaka ke penaje.
5 Nupuraꞌojla palani purákaꞌaloji aú inaku,
nupalaꞌatákaloje ipechu penaje,
raú ipechu iꞌimakáloje piño kaphí ijluwa.
6 Eꞌiyonaja kajrú marí kaje nakú puraꞌakano,
unká yakátala nojló kewini yajwé nomákare meꞌetení.
Eyá manumarú kaja iꞌimakana,
unká kaja jaꞌapátalajla nuliyá kewini yajwé nomákare.
7 Kaja Tupana tajata piyuke wani nutejmú,
rikaꞌá kaja nuliyá piyuke nujwákeꞌena.
8 Kaja rikaꞌá nuká kalajeruni chojé.
Kaja riyurí inaꞌuké kemaká nunaku mapeja:
‘Puꞌuwaré laꞌajeri riká’, ke”,
ke Job kemaká najló.