15
1-2 Rejomi Elifaz kemari piño marí ke Jobjlo:“Unká kapechuni iꞌimaká aꞌajipalá mapeja purákaꞌaloji aú.
Unká kaja ripuraꞌaló richayo mapeja purákaꞌaloji aú.
3 Unká ripuraꞌaló mapeja.
Unká kaja rimalá nakaje, unká na penaje kalé iꞌimakare nakú,
rikaꞌátakaloje ajopana eꞌiyajé raú.
4 Eꞌiyonaja piká kapichátari piliyó Tupana jaꞌapí iphákana,
kaja pipechu nakú:
‘Unká na penaje kalé iná weꞌepí iná tukumó
nakaje laꞌakaná Tupana wátaka ke’.
5 Kaja puꞌuwaré piꞌijnataka pipéchuwa,
raú pipuraꞌó ilé ke,
pipajlákaloje wajwaꞌaté palani purákaꞌaloji aú penaje.
6 Unká na penaje kalé numá pijló:
Puꞌuwaré pilaꞌaká, ke.
Kaja iná weꞌepíkale ñaké laꞌajérika piká,
nakaje pimíchaje nakú aú.
7 ¿Meke chi piꞌijnataka pipéchuwa pinakuwá:
‘Unká chiyó nuꞌumá, unká na apú inaꞌuké iꞌimalá nupiyá’, ke?
‘Unká kaja ipuré iꞌimaké, nuꞌumaká piyá’,
¿ke chi pipechu pinakuwá?
8 Apala piꞌijnatá kaja kaꞌajná pipéchuwa pinakuwá:
‘Tupana jenakú laꞌajerí nuká’, ke,
‘nukaja kalé iꞌimakale kapechuni wani marí ejaꞌawá chu’,
ke kaꞌajná piꞌijnataka pipéchuwa.
9 ¿Na chi kaꞌajná piweꞌepí nakojé, unká waweꞌepílare nakojé?
10 Kaja pheñawilana weká,
raú palá wapechu mékeka marí ejaꞌawá chu iꞌimakana nakú.
Paraꞌapá michú weꞌepíjika marí kaje nakojé,
chaje waweꞌepika rinakojé.
11 Tupana wátari pipechu palaꞌatákana,
eꞌiyonaja unká paꞌalá pinakojó riká.
Ñaké kaja weká puraꞌakojla pijwaꞌaté palá kachuwa,
12 eꞌiyonaja piyakaꞌo wachaje yuríkeꞌela piyuchá akuwaná.
13 ¿Naje piyúchaꞌo Tupana cha, pipuraꞌakóloje rinaku apoꞌojó wani?
14 Unká na inaꞌuké iꞌimalá, unká laꞌalá puꞌuwaré.
Tupana kaꞌarí piyuke wani inaꞌuké cha puꞌuwaré nalaꞌakare.
15 Unká kaja Tupana pechu iꞌimalá rijwaꞌatéjena,
jeꞌechú chiyájena nakiyana nakú:
‘Neká palá laꞌajeñó wani’, ke.
16 Chaje wani ramaka inaꞌuké: puꞌuwaré laꞌajeñó, ke,
wachuwájena weꞌemakale, puꞌuwaré laꞌajeñó.
Icheji puꞌuwareni, keja weká.
Wechi iná iꞌiraká juni, iná núrupi chu makáraꞌakochu,
ke kaja weká wéchiruna puꞌuwaré laꞌakanajlo.
17 Pemaꞌá, nakaje numájikare nakú pijló,
palá nuweꞌepikale rinakojé, nomákale riꞌimaká.
18 Nakaje kapechúruna wani iꞌimakaño jewíñaꞌatakare iná nakú riká,
nachiꞌiná michuna liyá nemaꞌakale riyukuna iꞌimaká.
19 Najló marí teꞌerí yuró iꞌimaká.
Nekámika ke neꞌemajika,
unká ajopana teꞌeré eyájena iꞌimaké najwaꞌaté.
Neká jewíñaꞌataño weꞌemaká marí ke:
20 Puꞌuwaré laꞌajeñó iꞌimaño chapú ajopana laꞌakana nakuja.
Unká ilé kajena iꞌimalá jupi marí ejaꞌawá chu,
meketánaja neꞌemaká.
Neꞌemaká ketana, kajrú namaka chapú kaje yajwé”,
ke Elifaz kemaká rijló.