8
1-2 Rejéchami apú rijwákeꞌewe Bildad aꞌajipaká rimakare nakojé. Rimá rijló:“¿Meketana júpika chi pipuraꞌajiko re joꞌó kaja ilé ke?
Mapeja wani pipuraꞌakó.
Karená kaphí wani aphoꞌoká puraꞌátaka nakaje, keja pipuraꞌakó.
3 Tupana, piyukeja wani laꞌaká nakaje, unká apiyákala nakaje,
riꞌimaká piyá palá laꞌakaná chuwá.
4 Piyani michuna laꞌañó nakaje unká Tupana wátalare kaje iꞌimaká.
Riká chona riwajá neꞌemaká, puꞌuwaré nalaꞌakare lokópaꞌala.
5 Piꞌijnatá pipéchuwa Tupana nakú.
Riká weꞌepiri piyukeja nakaje laꞌakana.
Eko pimá rijló, riweꞌepíkaloje pimuꞌují penaje.
6 Ñakele piꞌimajika ee piño palá Tupana waꞌaté, raꞌajé piñathé,
piyani iꞌimakáloje piño piñakaré chu.
Palá pilaꞌajika lokópaꞌala raꞌajé piñathé.
7 Piyukeja pinane kapichákaro iꞌimaká iꞌimajeri wejápaja keja,
kajrú raꞌajíkare pijló ijlunami chojé”,
ke Bildad kemaká Jobjlo.