—¿Mere eyá chi piphicha majó?

Raú rimá rijló:

—Mapeja chiraꞌakajo nakú nuká piyukeja ejaꞌawá nakuwá ají ñoꞌojó, ají ñoꞌojó ke.

3 Tupana kemari rijló:

—¿E pamaka nujwaꞌateje Job? Unká na apú iꞌimalá marí ejaꞌawá chu riká ke wani laꞌaká nakaje. Palá wani rilaꞌaká nupurákaꞌalo kemaká ke; palá wani laꞌajeri riká; unká na rilaꞌalá puꞌuwaré. Palá kaja ramaka rikó, rilaꞌaká piyá chapú ajopana inaꞌukena. Kaja piwakáraꞌa mapeja piyuke wani rinane kapichátakana riliyá, unká na rilaꞌalá eꞌiyonaja. Eꞌiyonaja unká wani rilaꞌalá puꞌuwaré, kaphí wani joꞌó ripechu iꞌimakale nochojé.

4 Eꞌiyonaja rimá Tupánajlo:

—Palá iná napona iꞌimakachu inajlo, manaꞌija iná palá. Iná aꞌatajla kaja piyuke iná nane, iná kapichako piyá. Kaja riwata piyuke nakaje aꞌakana pijló, pikapichátaka piyá riká. 5 Eyá piwakáraꞌakela rilaꞌakó ritami kaꞌajná, e pemaꞌajla mékeka ripuraꞌakó pinaku puꞌuwaré wani pijimaya iꞌimajemi.

6 Raú Tupana kemari Jiñá Chiꞌinárikanajlo:

—Ñaké riká, pilaꞌá rijwaꞌaté piwátajika ke, unká kalé nuwátala pikapichátaka riká.

7 Rejéchami raꞌapaka Tupana iꞌimaká eyá. Rejomi riwakáraꞌa Jobjlo kewini wani yaripu, ramákaloje riyajwé penaje. Piyuke rinapona nakuwá, piyuke riwílaꞌaru nakuwá waꞌató raphú iꞌimaká, ilé kaje nakú ritami wani riꞌimakáloje penaje. 8 Rakuwaná riꞌijná icheji kaꞌakelana ejo yáꞌajo, reyá rijñaꞌakáloje nakaje ipukeja iꞌimakare penájemi jitami, nakaꞌakare rejo nakiyá, raú rijarípaꞌakaloje raphú penaje. 9 Reꞌiyowá ke riyajalo kemaká rijló:

—¿Re joꞌó kaja chi pipechu palá laꞌakaná nakú? ¡Pipuraꞌó puꞌuwaré Tupana nakú, ripachá rikapichátakaloje piká penaje!

10 Raú Job kemari rojló:

—Inanaru, pipuraꞌaniño ta mapechúwaka wani, unká chiyó piꞌijnatá palá pipéchuwa. Puꞌují wapechu, Tupana wakáraꞌakachu wajló nakaje palani, raú wemano rijló: “Palá pilaꞌaká weká raú”, ke. Eta, ¿naje chi unká wemalá rijló ñakeja kaja, riwakáraꞌakachu wamaka chapú kaje yajwé wakajé?

Ilé ke Job amájika kajrú wani chapú kaje yajwé, eꞌiyonaja unká rilaꞌaké puꞌuwaré, unká kaja ripuraꞌakó puꞌuwaré Tupana nakú.

11 Re weji kele Job wákeꞌena iꞌimaká: Pajluwa ií iꞌimari Elifaz, Temán teꞌeré eyaje riꞌimaká. Eyá apú ií iꞌimari Bildad, riká iꞌimari pajimila Súah eyaje. Eyá apú ií iꞌimari Sofar, pajimila Naamat eyaje riꞌimaká. Nemaꞌaká mékeka Job amaka kajrú wani chapú kaje yajwé yukuna najló aú neꞌejná richaje, napalaꞌatákaloje ripechu, neyákaloje rijwaꞌaté penaje, neꞌemakáloje rijwaꞌaté meketánaja, ramaka kewini yajwé ketana. 12 E neꞌejná rejo. Yaꞌajnaya namá Job, eꞌiyonaja unká naweꞌepila na inaꞌukeka riꞌimaká, apoꞌojó wani ramákole. Kaja ewaja naweꞌepí naka riꞌimaká. Napechu laꞌakole kamuꞌují wani ramákana aú, nawíyoꞌo, rejéchami naꞌakó iyaje. Kamuꞌují wani napechu ke najiyoꞌotaka naꞌarumaká nanaku iꞌimakare. Rejomi nakaꞌá mapeja muꞌupé rewá yenoje, nakaꞌá kaja riká newílaꞌaru nakojé. 13 Rejomi nephá yáꞌajo teꞌerí eꞌiyajé rawaꞌajé. Pajluwaja jápakaje ketana neꞌemaká rijwaꞌaté mapeja. Unká napuraꞌaló rijwaꞌaté, naweꞌepíkale kajrú wani ramaka kewini yajwé.