3
1-2 Kaja ewaja manumarú kaja neꞌemaká, eꞌiyowá ke manaꞌí chiyó Job keñoꞌoká puraꞌakajo. Puꞌuwaré ripuraꞌakó weꞌechú kaꞌalá rimothoꞌokare iꞌimaká japi nakú, rimá:3 “Unká wani paala nojló kele lapí ta noló manoꞌokare japi iꞌimaká,
nukeñoꞌokáloje iꞌimakaje penaje.
Unká wani paala kaja nojló kele weꞌechú kaꞌalá ta nomothoꞌokare japi iꞌimaká.
10 Puꞌuwareni wani kaja kele lapí ta noló wáꞌakare japi nuꞌumaká.
Ripachá ta unká nuꞌumalole chapú kaje yajwé amákana liyá.
11 ¿Naje kaꞌajná unká nutakaꞌalá, noló wo chu joꞌó nuꞌumaká wakajé?
¿Naje kaꞌajná unká nomothoꞌolá matámiru iꞌimaká?
12 ¿Naje kaꞌajná re noló iꞌimá, yáꞌatayo nuꞌumaká rukujyú nakojé,
reyá aꞌajemi nuꞌurakáloje ruchuꞌuchure penaje?
13 Nomothoꞌoká iꞌimaká wakajeja nutakaꞌakela, palani riꞌimakajla nojló.
Raú manaꞌija nukajla kamátakajo nakú meꞌetení.
Unká na nakú nukawílaꞌalajla raú.
20 ¿Naje kaꞌajná Tupana yurí iná iꞌimaká marí ejaꞌawá chu,
iná ñaꞌakáloje kajrú chapú kaje yajwé panaku penaje?
¿Naje kaꞌajná raꞌá re joꞌó kaja iꞌimakaje, kewini yajwé amájeñojlo,
neꞌemakáloje re joꞌó kaja penaje?
21 Eyá wátari takaꞌakaje kiñaja, unká takaꞌalá,
rikulaka takaꞌakaje eꞌiyonaja.
Rikulajla rijluwa takaꞌakaje, iná kulaka nakaje kawemí nojé,
meꞌechú iꞌimakare, inajluwa ke kaja.
22 Ñakele najaꞌaká ritami wakajé, wakajeja kalé puꞌují ripechu.
23 Unká Tupana iꞌimalá inajlo, nakaje inajlo iꞌimajikare yukuna.
Itakeja wachá keja weká raú.
24 Unká nojñala noꞌojnewá,
chapú kaje yajwé ñaꞌakana panaku nakuja nuká.
Júpicha wani nuká ilé kaje waꞌaté.
25 Chapú kaje nukeroꞌojíkaro piyá iꞌimajika,
iꞌimari nuchá chuwaka.
26 Unká méñoꞌojo nuwatánaꞌala chuwá,
chapú kaje yajwé amákana liyá.
Unká kaja nupechu iꞌimalá manaꞌija nojló chuwa,
kawílaꞌakajo nakuja nuká”,
ke Job kemaká.