4
1-2 Rejéchami Elifaz, rijwákeꞌena nakiyana, keñoꞌoká rijwaꞌaté puraꞌakano, rimá rijló:“Nuweꞌepí meꞌetení pijwaꞌaté puraꞌakano kawílaꞌarijla pinaku,
eꞌiyonaja unká meke laꞌajé weꞌemalá meꞌetení pawaꞌá mapeja manumarú kaja.
3 Kajrú pewíñaꞌatajika ajopana inaꞌukena iꞌimajika.
Ujwí péchuruna pilaꞌakeno pechu puꞌují najló.
5 Eyá chuwa pikeroꞌokó, kaja chuwa unká pipechu iꞌimalá,
júpimi pipechu iꞌimajika ke kaja, pamákale kajrú wani chapú kaje yajwé.
6 Palá wani pemaꞌajika Tupana jaꞌapiyá iꞌimajika.
Ripurákaꞌalo kemájika ke pilaꞌajíkano,
raú palá waja piyuke nakaje pilaꞌajíkare jáchoꞌojikono pijló.
Eta chuwa, ¿naje chi unká pipechu iꞌimalá richojé kaphí?
7 Piꞌijnatákajla pipéchuwa:
Apala piweꞌepí pajluwaja inaꞌuké yukuna, laꞌakeri palá iꞌimajika,
rejomi kaꞌajná Tupana kapichata riꞌimaká michú.
Nuweꞌepí unká nakaje iꞌimalá ilé ke, palá laꞌajéñojlo.
8 Nakaje, piyukeja nomákare nalaꞌaká marí ejaꞌawá chu nuꞌumaká ketana,
jewíñaꞌatari nuká kajrú nakaje nakú.
Raú nuweꞌepí iná laꞌakachu kaꞌajná chapú ajopana,
iná nókachu kaꞌajná neká,
rejomi iná laꞌaká neká, keja kaja ajopana laꞌajika iná.
9 Ñakele piyukeja puꞌuwaré inaꞌuké laꞌakare yúchaꞌatari wani Tupana,
ripachá rikapichata ñaké laꞌajeñó”,
ke Elifaz kemaká rijló.