Tupana, piꞌimatá piño weká
85
Tupana, palájneꞌeke wani piká, piyuke pileꞌejena inaꞌukena waꞌaté.Kaja pilaꞌá piño puꞌují piyuke Israel michú lakénami pechu.
2 Pamó kaja piyuke puꞌuwaré pileꞌejena inaꞌukena laꞌakare chaje.
3 Kaja palá pipechu wanaku meꞌetení,
kaja piyuchá jaꞌapá piliyá.
4 Tupana, weꞌematájeri piká, ñakele piꞌimatá weká meꞌetení.
Piyúchaꞌaniño re joꞌó kaja wachá.
5 ¿Júpija chi piyúchaꞌajiko wachá re joꞌó kaja?
6 ¿Unká chi piyurílaje weꞌemaká júpija marí ejaꞌawá chu,
raú pileꞌejena inaꞌukena pechu iꞌimakáloje palá pinaku penaje?
7 Tupana, piꞌimatá weká, raú waweꞌepíkaloje íkiꞌija piwátaka weká.
8 Nomaꞌajé nakaje Tupana kemájikare nakú.
Palá rijwaꞌatéjena iꞌimakáloje pajwaꞌatéchaka yukuna riꞌimajé,
Ripurákaꞌalo kemaká ke laꞌajéñojlo,
nalaꞌaká piyá piño nakaje mapechúwaka.
9 Kewaka, wawaꞌá wani Tupana,
riꞌimatákaloje raꞌapí iphájeño kapichákajo liyá.
Piyukeja nakaje rilaꞌakare amájero puꞌuwaká wajló
marí teꞌerí weꞌemakare nakú.
10 Marí ke riꞌimajika ee, íkiꞌija inaꞌuké wátajika pekowáaka.
Kewaka kaja napurákaꞌalo iꞌimajika rejéchami.
Palá laꞌakaná nakuja neꞌemajé,
raú palá kaja napechu iꞌimajika panakuwáaka.
11 Marí ejaꞌawá chu nakeñoꞌojé kewaka kemakana pajlokaka,
eyá jeꞌechú chiyá aꞌajemi Tupana laꞌajé inaꞌuké nakú palá.
12 Riwakáraꞌaje juni jaꞌakó,
raú ñóꞌope nakaje wejátajikare icha iꞌimakáloje wajló.
13 Paineko kalé walamáꞌataje palá ripé,
raú lamáꞌatakeja ke ripé iꞌimakáloje penaje.