Mékeka iná iꞌijnataka, apala ke, iná péchuwa Tupana nakú
77
Kaphí nupuraꞌakó Tupana waꞌaté, remaꞌakáloje noꞌopiyá penaje.2 Kamuꞌují nupechu iꞌimaká wakajé, nukaꞌá nupechu Tupana ejo.
Eyá unká nuyurila rijwaꞌaté puraꞌakano,
lapí waꞌató nupuraꞌó rijwaꞌaté.
Eꞌiyonaja unká nupechu watánaꞌala palá nojló.
3 Nuꞌujnataka nupéchuwa Tupana nakú ejéchami, nuyaka.
Kajrú nuꞌujnataka nupéchuwa rinaku,
waꞌató ke ujwí nupechu laꞌakó.
4 Tupana, unká piyurila nukamátako,
kaja kechíraꞌakeja ke nupechu nojló,
rinakojé unká méñoꞌojo nupuraꞌaló palá.
5 Nuꞌujnatá kaja nupéchuwa mékeka nuꞌumajika júpimi iꞌimajika nakú.
6-7 E nuweꞌepí palá notaníjikano lapí iꞌimajika,
palá kaja nuꞌujnatájikano nupéchuwa.
Numá nupechu nakuwaja:
¿Ñakeja wani chi Tupana yúchaꞌajiko wachá?
¿Unká chi rilaꞌalaje piño palá wanaku?
8 Kaja kaꞌajná íkiꞌija wawátakana tajnó.
Kaja kaꞌajná nakaje rimakare nakú, rilaꞌakáloje wajló penaje tajnó.
9 Kaja kaꞌajná Tupana pechu kapicháñaa palájneꞌeke wani iꞌimakana.
¿Kaja chi riyúchaꞌo wachá?
Raú kaꞌajná unká riweꞌepila chuwa inaꞌuké muꞌují weꞌepíkana.
10 Nuꞌujnatákachu nupéchuwa Tupana, ajopana chaje iꞌimakare nakú, nupechu iꞌimá rinaku:
“Chuwaka kaꞌajná unká Tupana laꞌalaje piño wanaku palá,
júpimi rilaꞌajíkano wanaku iꞌimajika, ke”.
Kewini wani nojló ñaké nupéchuwa iꞌijnatákana.
11-12 Ñakele marí ke laꞌakana palani:
Nuꞌujnataje nupéchuwa palá piyukeja,
naka rilaꞌajíkare palá júpimi iꞌimajika nakú,
nakaje unká méñoꞌojo apú laꞌalárejla kaje.
13 Tupana, unká wani laꞌalá puꞌuwaré piká.
Unká apú chiꞌinárikanaji iꞌimalá piká ke wani,
weꞌepiri piyukeja wani nakaje laꞌakana nakojé.
14 Piká, Tupana, laꞌarí kajrú nakaje,
unká wani apú weꞌepílare laꞌakana kaje.
Nakaje pilaꞌakare aú piyuke inaꞌuké ejaꞌawá iꞌimakaño weꞌepika mékajeka piká.
15 Kajrú wani piweꞌepíkale nakaje nakojé,
piꞌimatá Israel lakénami,
José lakénami waꞌaté, Egipto eyájena liyá iꞌimaká.
16 Juni jalomi amaka piꞌimaká wakajé,
rikeroꞌó pipiyá iꞌimaká.
Juni iphuta chu iꞌimakare waꞌató, kurúkari raú.
17 Kajrú juni jaꞌakó juni juwákaꞌala eꞌiyayá;
kajrú pichaní mejé iꞌimaká;
kajrú pichaní apíroꞌoka jeꞌechú chiyá;
18 kajrú wani pichaní majákaꞌako mejé jemaꞌakó.
Pichaní kamaré amaro piyuke ejaꞌawá chuwá,
kajrú kaja teꞌerí ñakaꞌakó.
19 Pijmeꞌetá papuwá juni jalomi eꞌiyowá iꞌimaká,
rejomi pikuwaꞌa najwaꞌaté kajruni juni jalomi jiwami chuwá,
eꞌiyonaja unká na iphátala papumí re iꞌimaká.
20 Piwaꞌa pileꞌejena inaꞌukena iꞌimaká,
ovéjana amájeri wáꞌaka rileꞌejena ovéjana, ke kaja.
Moisés, Aarón waꞌaté, wáꞌaño neꞌemaká pijló.