Tupana purákaꞌalo yukuna marí
119
Puꞌují péchuruna, ñakeja iꞌimakaño palá laꞌakaná nakú,palá nemaꞌakale Tupana purákaꞌalo lanaꞌakéjami,
newíñaꞌatakare neꞌemaká nakú jaꞌapiyá.
2 Puꞌují Tupana purákaꞌalo aꞌajeño nanakojó pechu,
nawátakale Tupana jaꞌapiyaja kalé jemaꞌakana.
3 Unká napechu nakú na puꞌuwaré laꞌakaná iꞌimalá.
Tupana wátaka ke laꞌajeñó neꞌemakale, puꞌují napechu.
4 Piká wakáraꞌari piyukeja nakaje laꞌakana palá,
pipurákaꞌalo kemaká rinaku chuwá.
5 Aꞌajla nomaꞌajla palá wani pipurákaꞌalo jaꞌapiyá,
nulaꞌakáloje nakaje rimaká ke waja.
6 Rejéchami kaja unká na jaꞌapí kalé nopáñaꞌalajo,
palá wani nomaꞌajíkale pipurákaꞌalo jaꞌapiyá.
7 Nuweꞌepíjikaja piyuke pipurákaꞌalo, palá wani iꞌimakare inajlo nakojé, e kaja nupuraꞌajó palá wani pinaku.
8 Nuwata pipurákaꞌalo kemaká ke laꞌakana.
Pipechu kapicháñaaniña wani nuká.
9 ¿Na chi walijímakana laꞌajla, neꞌemakáloje palá laꞌajeñó penaje?
Pipurákaꞌalo kemaká ke chuwá nakaje laꞌakana ja kalé laꞌarijla neká palá laꞌajeñó.
10 Íkiꞌija wani nuwátaka paꞌapiyá jemaꞌakana, nulaꞌakáloje palá penaje.
Piyuríniña nuyurika nuliyó pipurákaꞌalo jaꞌapiyá jemaꞌakana.
11 Piyukeja nupechu nakú waja pipurákaꞌalo,
nulaꞌakáloje rimaká ke penaje,
nulaꞌaká piyá nakaje puꞌuwaré, unká piwátalare kaje.
12 Palá wani laꞌajeri piká, Tupana, pewíñaꞌata nuká pipurákaꞌalo nakú.
13 Nuká iꞌimajeri paꞌapiyá piyukeja nakaje pimájikare nakú nojló yukuna ajopánajlo.
14 Puꞌují wani nupechu iꞌimajika,
nuweꞌepíjika piyukeja pipurákaꞌalo nakojé
ejéchami nulaꞌakáloje palá raú.
Kajrú iná nane iꞌimaká wakajé, puꞌují iná pechu iꞌimaká.
Chaje wani nupechu iꞌimajika puꞌují riwakajé.
15 Nakaje, piwakáraꞌakare iná laꞌaká, nakuja nuꞌujnataje nupéchuwa,
rikaja kalé laꞌakale puꞌují iná pechu.
Noꞌojé kaja nunakojó nakaje pimakare nakú,
nulaꞌakáloje piwátaka ke riká.
16 Puꞌují nupechu iꞌimajika pipurákaꞌalo nakú,
unká wani nupechu kapicháñaalaje riꞌimajika.
17 Piyurí marí pijwaꞌaté jápajeri iꞌimaká júpija marí ejaꞌawá chu.
Palá nomaꞌajika pipurákaꞌalo jaꞌapiyá.
18 Paꞌá nojló puꞌuwaká piyukeja nakaje,
palá wani pewíñaꞌatakare nakú iná.
19 Ajopana teꞌeré eyaje keja nuká marí teꞌerí nakú.
Pilaꞌaniña nojló puwicha pipurákaꞌalo nakojé weꞌepíkana.
20 Apú cháꞌatakare penájemi keja nuweꞌepika nunakuwá weꞌechú kaꞌalá keja,
nuwátakale kajrú pipurákaꞌalo nakojé weꞌepíkana.
21 Piká akhaꞌarí laꞌañó nanakuwá nakaje nakojé
weꞌepéjeño ke wani napurákaꞌalo aú.
Piká akhaꞌarí kaja puꞌuwaré laꞌajeñó,
unkale naꞌalá nanakojó pipurákaꞌalo.
22 Neká puraꞌañó kajrú nunaku puꞌuwaré,
nalaꞌá kaja nuká unká inaꞌukélari ke wani najluwa.
Pamá nuká palá napurákaꞌalo liyá,
noꞌoká piyá nunakojó riká,
pipurákaꞌaloja kalé noꞌokale wani nunakojó.
23 Inaꞌuké wakáraꞌajeño nakiyana wátajeño nulaꞌakana chapú,
eꞌiyonaja marí pijwaꞌaté jápajeri iꞌijnatájeri ñakeja wani ripéchuwa pipurákaꞌalo nakú.
24 Puꞌují nupechu pipurákaꞌalo nakú,
nonakú laꞌajeri ke riꞌimakale nojló.
25 Kaja nupechu eꞌeloka wani nujluwa chuwaka.
Piyurí nuꞌumaká re joꞌó kaja marí ejaꞌawá chu,
pimaká nunaku iꞌimaká ke.
26 Kaja nuꞌumá pijló piyuke nakaje nulaꞌakare iꞌimaká yukuna.
Paꞌá kaja pinakojó nuꞌumaká,
ñakele chuwa pewíñaꞌata nuká re joꞌó kaja pipurákaꞌalo nakú.
27 Paꞌá nojló weꞌepíkaje,
nuweꞌepíkaloje pipurákaꞌalo kemaká ke laꞌakana penaje.
Nuwata nupéchuwa iꞌijnatákana palá wani nakaje pilaꞌakare nakú.
28 Kaja wani chapú kaje yajwé amákana cháꞌata nuká,
ñakele paꞌá nuñathé, nuꞌumakáloje paꞌapiyá jemaꞌajeri,
pimaká nunaku iꞌimaká ke.
29 Pamá kaja palá nuká, pajlakaje purákaꞌaloji liyá,
nulaꞌaká piyá puꞌuwaré.
Pilaꞌá nunaku palá, nakaje pewíñaꞌatajikare nakú nuká aú.
30 Nuwata kewákaje purákaꞌaloji jaꞌapiyá jemaꞌakana,
ñakele nuwata pipurákaꞌalo nakojé weꞌepíkana.
31 Tupana, kaja wani nomá pipurákaꞌalo nakojé,
ñakele piyuríniña nopáñaꞌataka nunakuwá kajrú wani.
32 Wechi nuwátaka pipurákaꞌalo kemaká ke laꞌakana,
puꞌují wani pilaꞌakale nupechu.
33 Tupana, pewíñaꞌata nuká, nulaꞌakáloje pipurákaꞌalo kemaká ke, nuwátakale rimaká ke laꞌakana, aꞌajná nuꞌumajika maare ejaꞌawá chu ketana.
34 Paꞌá nojló weꞌepíkaje, nuweꞌepíkaloje raú ñakeja,
palá nakaje pewíñaꞌatakare nakú iná nakojé.
Nuwata wani raꞌapiyá jemaꞌakana.
35 Paꞌá nuñathé, nulaꞌakáloje pipurákaꞌalo kemaká ke penaje,
rikaja kalé laꞌakale nupechu puꞌují.
36 Paꞌá nupechu ñathé, nuwátakaloje raú pipurákaꞌalo kemaká keja laꞌakana.
Rilanakiya nuwátaka piyá nakaje marí ejaꞌawá chu iꞌimakare.
37 Piyuríniña noꞌoká nunakojó nakaje, mapeja nemakárena nakú:
“Chiꞌinárikanaji neká”, ke.
Paꞌá nojló iꞌimakaje, nulaꞌakáloje piwátaka ke penaje.
38 Pilaꞌá marí pijwaꞌaté jápajerijlo nakaje pimakare nakú,
pilaꞌaká piyuke paꞌapí iphájeñojlo iꞌimaká ke kaja.
39 Paꞌapata nuliyá piyukeja chapú kaje nukeroꞌokaro piyá.
Piyuke nakaje piwakáraꞌakare iná laꞌaká, palani riká.
40 Kajrú nuwátaka piyukeja nakaje pimakare nakú.
Paꞌá nojló re joꞌó kaja iꞌimakaje, palá wani nakaje laꞌajeri piꞌimakale.
41 Tupana, paꞌá nojló puꞌuwaká íkiꞌija wani piwátaka nuká.
Piꞌimatá nuká kapichákajo liyá, pimaká wanaku iꞌimaká ke,
42 raú nuꞌumakáloje piyukuna puꞌuwaré nunaku puraꞌajéñojlo,
kaja kaphí wani nupechu iꞌimakale pipurákaꞌalo chojé.
43 Pikapichátaniña nunuma chojé kewákaje purákaꞌaloji,
kaja nulaꞌakale kaphí nupéchuwa pipurákaꞌalo chojé.
44 Ñakele pewíñaꞌataka nuꞌumaká, ke laꞌakanaja nuwata ñakeja wani,
45 raú unká na kalé itájeri nopu, nulaꞌaká piyá piwátaka ke.
Kaja nulaꞌá nakaje pipechu nakú riꞌimaká ke.
46 Nupuraꞌajó kaja pipurákaꞌalo nakú piyukeja wawakáraꞌajeño waꞌaté,
unká nopáñaꞌalajo pipurákaꞌalo yukuna iꞌimakana najló jaꞌapí.
47 Kaja kajrú wani nuwátaka pipurákaꞌalo,
rikaja kalé laꞌakale puꞌují iná pechu inajlo.
48 Kajrú wani nuwátaka pipurákaꞌalo;
kakámeꞌe wani nuká rinaku;
kajrú kaja nuꞌujnataka nupéchuwa nakaje piwátakare iná laꞌaká nakú.
49 Piweꞌepí re joꞌó kaja pipurákaꞌalo,
piyuríkare marí pijwaꞌaté jápajerijlo iꞌimaká.
Riká waꞌaté puraꞌakano laꞌarí kaphí wani nupechu,
50 rikaja kalé laꞌarino puꞌují nupechu,
kamuꞌují nupechu iꞌimaká wakajé.
Pipurákaꞌalo aꞌarí kaja nojló iꞌimakaje,
nuꞌumakáloje matajnako raú pijwaꞌaté jeꞌechú chu penaje.
51 Laꞌañó nanakuwá kajrú weꞌepíkaño ke napurákaꞌalo aú,
puraꞌañono nunaku ñakeja wani puꞌuwaré.
Eꞌiyonaja kalé unká wani nuyurila nuliyó nakaje,
pewíñaꞌatakare nakú nuꞌumaká jaꞌapiyá jemaꞌakana.
52 Nuweꞌepí kaja palá mékeka piwakáraꞌaka inaꞌuké laꞌaká nakaje
júpimi iꞌimaká nakojé.
Ilé kaje nakojé weꞌepikana palaꞌatari piño nojló nupechu palá.
53 Puꞌuwaré laꞌajeñó, kaja yuríkaño naliyó pipurákaꞌalo,
yúchaꞌataño kajrú wani nuká.
54 Jataníkaje keja nupechu nakú piyukeja nakaje piwakáraꞌakare walaꞌaká.
Ajopana teꞌeré eyaje keja nuká marí teꞌerí nuꞌumakare nakú.
55 Tupana, lapí keja nuꞌujnataka nupéchuwa palá pinaku.
Nuwata piyuke nakaje laꞌakana palá pewíñaꞌata nuꞌumaká rinaku ke.
56 Pipurákaꞌalo jaꞌapiyá jemaꞌakánaja kalé noꞌono nunakojó ñakeja.
57 Pikaja kalé, Tupana, nupechu iꞌimakare chojé kaphí.
Kaja numá pijló iꞌimaká: Nulaꞌajé piyuke pipurákaꞌalo kemaká ke.
58 Kaphí nupechu pichojé, nulaꞌakáloje palá, riꞌimakáloje palá pinaku penaje.
Pilaꞌá palá nunaku, pimaká paꞌapiyá jemaꞌajeño nakú laꞌakana iꞌimaká ke.
59 Nuꞌujnataka nupéchuwa nakaje nulaꞌakare iꞌimaká nakú,
kewá nuweꞌepika kaja puꞌuwaré laꞌajerí wani nuká,
ñakele nomaꞌá piño chuwa palá wani pipurákaꞌalo jaꞌapiyá.
60 Nuwata kiñaja pipurákaꞌalo kemaká ke laꞌakana,
kaja unká na maláraꞌatala nuká meꞌetení, nulaꞌaká piyá rimaká ke.
61 Puꞌuwaré laꞌajeñó wátaño nulaꞌakana chapú,
eꞌiyonaja kalé unká wani nupechu kapicháñaala nakaje
pewíñaꞌatakare nakú nuꞌumaká.
62 Lapí jenaje ke nopono, numakáloje pijló:
Palá wani pilaꞌaká nuká, ke, palani wani pipurákaꞌalo iꞌimakale.
63 Paꞌapí iphájeño, pipurákaꞌalo kemaká ke laꞌajeño wákeꞌewe kaja nuká.
64 Tupana, íkiꞌija piwátaka inaꞌuké marí ejaꞌawá chu iꞌimakaño,
pewíñaꞌata nuká palá pipurákaꞌalo nakú.
65 Tupana, palá wani pilaꞌaká marí pijwaꞌaté jápajeri nakú.
Pimaká paꞌapiyá jemaꞌajeño nakú iꞌimaká chuwá pilaꞌá nunaku palá.
66 Tupana, pewíñaꞌata nuká, raú nuweꞌepíkaloje palá, palá laꞌakaná nakojé,
nuweꞌepíkaloje kaja nakaje, laꞌarí apú chaje palaka iná, nakojé.
Kaja kaphí wani nupechu pipurákaꞌalo chojé.
67 Unká chiyó nuweꞌepí pinakojé, nulaꞌaké kajrú nakaje iꞌimajika,
nulaꞌajíkale nunakuwá kajrú wani weꞌepika ke.
Eyá meꞌetení kaja nomaꞌá pipurákaꞌalo jaꞌapiyá.
68 Palájneꞌeke wani piká, palá wani kaja pilaꞌaká iná nakú.
Pewíñaꞌata nuká pipurákaꞌalo nakú.
69 Napurákaꞌalo aú, naꞌapiwá iphájeño ajopánajlo, pajlaño mapeja nunaku, nawajákaloje nuká penaje.
Eꞌiyonaja kalé wechi nulaꞌaká piyukeja nakaje piwakáraꞌaka ke.
70 Kechíraꞌakeja ke piyukeja puꞌuwaré laꞌajeñó pechu,
eyá nupechu puꞌují nakaje pewíñaꞌatakare nuká nakú.
71 Palá pilaꞌaká nunaku, pipalamane nuweꞌepíkale unká nuliyá iꞌimalá nokó, nuꞌumatákaloje nokó penaje,
raú nuweꞌepí meꞌetení palá pipurákaꞌalo nakojé.
72 Liñeru kawemí nojé wani iꞌimakare,
chaje kawemika nojló piyuke nakaje pewíñaꞌatakare nakú nuká.
73 Piká keñoꞌótari nuꞌumaká, ñakele chuwa paꞌá nojló weꞌepíkaje, nuweꞌepíkaloje raú palá pipurákaꞌalo nakojé.
74 Piyukeja paꞌapí iphájeño pechu laꞌakono puꞌují namaka nuká kewá, nupechu iꞌimakale kaphí pipurákaꞌalo chojé.
75 Tupana, nuweꞌepí palani waja piyuke pipurákaꞌalo, ñakele piwajaka kewá nuká,
palá piweꞌepíkano na pachaka piwajákano nuká.
76 Nuweꞌepí kaja íkiꞌija piwátaka nuká, riká palaꞌatari nupechu nojló, pilaꞌakale nuká pimaká nunaku iꞌimaká ke.
77 Paꞌá nojló puꞌuwaká kajrú piwátaka nuká,
raú nuweꞌepíkaloje inaꞌuké wani piká nujwaꞌaté.
Piyurí nuꞌumaká re joꞌó kaja, kaja puꞌují wani nupechu nakaje pewíñaꞌatakare nuká nakú.
78 Nuwata iphaño naꞌapiwá napurákaꞌalo aú ajopánajlo nakú apañáꞌatakana, unká na pachá kalé nalaꞌakale nuká chapú,
pipurákaꞌalo nakuja nuwátakale nupéchuwa iꞌijnatákana.
79 Nuwata piyuke paꞌapí iphájeño, eyá palá pinakojé weꞌepéjeño,
kele awakako pajñakani nujwaꞌaté.
80 Nuwata nupechu iꞌimaká palá ñakeja pipurákaꞌalo jaꞌapiyá jemaꞌakana nakuja, raú unká na jaꞌapí kalé nopáñaꞌajo.
81 Nuwata piꞌimataka nuká kiñaja, kaphí nulaꞌakale nupéchuwa pipurákaꞌalo chojé.
82 Kaja nujlú jayaꞌó yakáꞌakajo nakú,
nomákaloje nakaje pimakare nakú iꞌimaká.
Raú numá pijló: ¿Mékechami chi piká waícha nupechu palaꞌataje?
83 Unká na penaje nuꞌumalá, kaja unká na aꞌalá rinakojó nuká chuwa.
Eꞌiyonaja kalé unká wani nupechu kapicháñaala
mékeka pipurákaꞌalo wakáraꞌaka walaꞌaká.
84 ¿Meketana júpika chi nuwátajika re joꞌó kaja?
¿Mékechami chi piwajájika chapú nulaꞌajeño?
85 Napurákaꞌalo aú naꞌapiwá iphájeño ajopánajlo,
unká wani jemaꞌalaño pipurákaꞌalo jaꞌapiyá.
Neká jaꞌañó nupé, nalaꞌakáloje nuká chapú penaje.
86 Paꞌá nuñathé, unká meke nulaꞌalá, eꞌiyonaja nawata nulaꞌakana chapú.
Kewaka piyuke nakaje pipurákaꞌalo kemakare nakú.
87 Kaja wani nukapichojla marí teꞌerí nakiyá iꞌimaká,
eꞌiyonaja kalé unká nuyurila nuliyó pipurákaꞌalo jaꞌapiyá jemaꞌakana.
88 Paꞌá nojló iꞌimakaje, kajrú piwátakale nuká,
raú nulaꞌajé piyuke pipurákaꞌalo kemaká ke.
89 Tupana, ñakeja wani pipurákaꞌalo iꞌimajika.
Kaja ñaké rinaku kemakana jeꞌechú chu: matajnako riꞌimajika, ke.
90 Pimaká nakaje laꞌakana nakú, ke pilaꞌakano riká.
Kaja keja pilaꞌaká nakaje ñakeja, júpimi iꞌimaká eyá maárejecha.
Júpimi eyá piyurí ejaꞌawá rapukuna chojé iꞌimaká,
eyá maárejecha ñakeja joꞌó riká meꞌetení.
91 Piyuke nakaje pilaꞌakare iꞌimaká
yuriko pimaká rinaku iꞌimaká ke maárejecha.
Pileꞌejé waja piyuke nakaje, pilaꞌakáloje rijwaꞌaté piwátaka ke.
92 Unkákela nakaje pewíñaꞌatakare nakú nuꞌumaká laꞌajla puꞌují nupechu, kamuꞌují nupéchuwa iꞌijnatákana nakuja nutajnojla.
93 Unká wani nupechu kapicháñaalaje nakaje pimakare nakú nojló, ripalamane paꞌakale nojló iꞌimakaje.
94 Piꞌimatá nuká kapichákajo liyá, pileꞌejena inaꞌukena nakiyá nuꞌumakale,
nulaꞌakale piyuke nakaje pipechu nakú riꞌimaká ke.
95 Ñakeja puꞌuwaré laꞌajeñó wátaka nulaꞌakana chapú,
eꞌiyonaja ñakeja nupechu nakú nakaje piwakáraꞌakare walaꞌaká.
96 Nomá kaja meke piyukeja nakaje marí ejaꞌawá chu iꞌimakare tajnako,
eyá pipurákaꞌalo unká wani tajnájlajo iꞌimajika.
97 Kajrú wani nuwátaka nakaje pewíñaꞌatakare nakú iná.
Weꞌechú ketana nuꞌujnataka nupéchuwa palá rinaku.
98 Ñakeja wani piyuke pipurákaꞌalo iꞌimajika nojló.
Ripalamane aú chapú nunaku péchuruna weꞌepika, chaje nuweꞌepikale nakaje nakojé.
99 Piyuke nowíñaꞌatajeño chaje nuweꞌepika nakaje nakojé,
nuꞌujnatákale kajrú wani nupéchuwa nakaje piwakáraꞌakare walaꞌaká nakú.
100 Pheñawilana weꞌepika nakaje nakojé chaje nuweꞌepika,
nulaꞌakale nakaje pipurákaꞌalo kemaká ke.
101 Kaja nuyurí nuliyó puꞌuwaré laꞌakaná,
nulaꞌakáloje pipurákaꞌalo kemaká ke penaje.
102 Unká nuyurila nuliyó nakaje laꞌakana piwakáraꞌaka ke,
pewíñaꞌatakale nuká palá rinaku.
103 Nakaje pimakare nakú, nulaꞌajé pimaká rilaꞌakana nakú ke.
Palani wani riꞌimakale, nakaje pumeni iꞌimaká inajlo ke nojló riká.
Munumunú jalá pumecha chaje ripumecha nojló.
104 Piyukeja nakaje pimakare nakú, walaꞌakáloje penaje
laꞌarí kapechú wani nuká.
Ñakele chapú nupechu, puꞌuwaré iná laꞌakare
mapeja iná pechu keja nakú.
105 Jepé lukúnaꞌakeja palá pataká iná kamaré
iñeꞌepú chuwá iná jaꞌapaka ewá,
ke kaja nojló pipurákaꞌalo,
rilaꞌakale puꞌuwaká nojló nakaje laꞌakana palani.
106 Numá nakaje nakú, nulaꞌakáloje riká numaká rinaku ke.
Ñakele nulaꞌajé numaká rinaku iꞌimaká chuwá;
nulaꞌajé piyuke pipurákaꞌalo kemaká ke.
107 Tupana, chuwa kaja chapú kaje yajwé
nomákare meꞌetení cháꞌataka nuká.
Paꞌá nojló iꞌimakaje, pimaká nunaku iꞌimaká ke.
108 Tupana, nuwakáraꞌajeri,
pemaꞌá noꞌopiyá nakaje numakare nakú pijló.
Pewíñaꞌata nuká pipurákaꞌalo nakú.
109 Takaꞌakaje chuja nuká ñakeja,
eꞌiyonaja unká wani nupechu kapicháñaala nakaje
pewíñaꞌatakare nakú nuꞌumaká.
110 Namichoꞌonoja puꞌuwaré laꞌajeñó wátaka nulaꞌakana chapú,
eꞌiyonaja unká nuyurila nuliyó nakaje laꞌakana piwakáraꞌaka ke.
111 Nakaje, nayuríkare inajlo natakaꞌaká ejomi,
ke kaja nojló nakaje piwakáraꞌakare iná laꞌaká.
Matajnako iꞌimajika yuríjiko nojló, rilaꞌakale puꞌují wani nupechu.
112 Kaphí nupechu, nulaꞌakáloje pipurákaꞌalo kemaká ke ñakeja wani,
aꞌajná nuꞌumajika marí ejaꞌawá chu ketana.
113 Chapú nupechu laꞌañó nekó mapeja,
palá laꞌajeñó ke ajopana ijlú chu nakú.
Eyá pipurákaꞌalo nuwata íkiꞌija wani.
114 Palá pimejñátaka nuká chapú kaje liyá,
palá kaja pamaka nuká.
Pipurákaꞌalo chojé nulaꞌá kaphí wani nupéchuwa.
115 Puꞌuwaré laꞌajéñojlo numá:
Iꞌijná nowaꞌayá yaꞌajnaje,
nuwátakale nakaje laꞌakana Tupana wakáraꞌaka iná laꞌaká ke.
116 Paꞌá nojló tejmuji, pimaká rinaku iꞌimaká ke,
nuꞌumakáloje re joꞌó kaja penaje.
Kaphí pichojé nupechu,
piyuríniña nupechu laꞌakó ujwí piliyá.
117 Paꞌá nuñathé, nuꞌumakóloje penaje,
raú nulaꞌajé nakaje piwakáraꞌaka ke.
118 Unká piwátala unká jemaꞌalaño pipurákaꞌalo jaꞌapiyá,
unká na penaje kalé nakaje neꞌejnatákare nakú napéchuwa.
119 Icheji ke pijló piyuke puꞌuwaré laꞌajeñó marí ejaꞌawá chu,
ñakele íkiꞌija wani nuwátaka nakaje laꞌakana piwakáraꞌaka ke.
120 Mapeja nunapona kurúkaka pijimaje,
nuphákale wani nakaje piwakáraꞌakare walaꞌaká jaꞌapí.
121 Unká wani nuyurila nuliyó palá laꞌakaná.
piyuríniña nuká chapú nulaꞌajeño kápeje,
nomaka piyá chapú kaje yajwé.
122 Paꞌá nuká pinakojó, nuꞌumakáloje palá penaje,
iphaño naꞌapiwá napurákaꞌalo aú ajopánajlo,
laꞌaká piyá nuká chapú.
123 Kaja nujlú jayaꞌó piꞌimataka nuká kapichákajo liyá wátakana nakú.
Nuwata piꞌimataka nuká, pimaká nunaku iꞌimaká ke.
124 Pilaꞌá nunaku palá, íkiꞌija piwátaka nuká lokópaꞌala.
Pewíñaꞌata nuká pipurákaꞌalo nakú.
125 Pijwaꞌaté jápajeri nuká, ñakele paꞌá nojló weꞌepíkaje;
nuwata nakaje piwakáraꞌakare inaꞌuké laꞌaká nakojé weꞌepíkana.
126 Tupana, kaja inaꞌuké nakiyana wajákana iphá rená chojé,
unká pachá nemaꞌalá nakaje, pewíñaꞌatakare neká nakú jaꞌapiyá.
127 Ñaké iꞌimakale, kajrú wani nuwátaka nakaje piwakáraꞌakare inaꞌuké laꞌaká;
oro, nakaje palá nojé wani iꞌimakare, chaje nuwátaka riká.
128 Ñakele nulaꞌá nakaje pipechu nakú riꞌimaká ke;
chapú nupechu piyuke puꞌuwaré laꞌakaná nakú.
129 Palani wani pipurákaꞌalo,
ñaké riꞌimakale, nomaꞌá palá raꞌapiyá.
130 Nemakachu inajlo meke kemakánaka pipurákaꞌalo,
palani inajlo riká, raꞌakale inajlo weꞌepíkaje.
Raú unká weꞌepílaño rinakojé iꞌimaká,
weꞌepíkaloje palá laꞌakaná nakojé.
131 Kakámeꞌe nuká pipurákaꞌalo nakojé weꞌepíkana nakú;
nuwata nakaje laꞌakana piwakáraꞌaka ke.
132 Pamá nuká, Tupana.
Piweꞌepí numuꞌují, piweꞌepika íkiꞌija piwátajeño muꞌují ke kaja.
133 Paꞌá nuñathé, nulaꞌakáloje pipurákaꞌalo kemaká ke;
piyuríniña puꞌuwaré laꞌakaná cháꞌataka nuká.
134 Chapú wani inaꞌuké nakiyana laꞌaká ajopana inaꞌukena,
piꞌimatá nuká ilé kajena liyá.
Nuwata nakaje laꞌakana, pipechu nakú riꞌimaká ke.
135 Pipechu iꞌimá marí pijwaꞌaté jápajeri nakú palá.
Pewíñaꞌata nuká nakaje, piwakáraꞌakare inaꞌuké laꞌaká nakú.
136 Kajrú wani nuyaka, unkale na iphala nakaje,
pewíñaꞌatakare nakú neká jaꞌapí.
137 Tupana, palá wani laꞌajeri piká;
palá waja kaja nakaje piyukeja piwakáraꞌakare inaꞌuké laꞌaká.
138 Piyukeja nakaje piwakáraꞌakare laꞌakana,
palá waja riká, kewákaje purákaꞌaloji chuwá riꞌimakale.
139 Íkiꞌija nuwátakale pipurákaꞌalo,
chapú nunaku péchuruna pechu kapicháñaa riká aú nuyúchaꞌo kajrú.
140 Nakaje pimakare nakú, pilaꞌakáloje wajló penaje,
iꞌimari nakaje nalaꞌakare imaꞌá wani ke,
nakapichátakaloje puꞌuwaré reꞌiyá iꞌimakare penaje.
Ñakele nuká, pijwaꞌaté jápajeri, wátari íkiꞌija nakaje pimakare nakú.
141 Ajopana jaꞌapejé nuká, unká kaja na aꞌalá rinakojó nuká,
eꞌiyonaja unká nupechu kapicháñaala nakaje pimakare nakú iꞌimaká.
142 Palani waja nakaje pilaꞌakare,
ñaké kaja nakaje pewíñaꞌatakare nakú, kewákaje riꞌimakale.
143 Kaja nomá kajrú chapú kaje yajwé,
eꞌiyonaja nakaje, piwakáraꞌakare inaꞌuké laꞌaká,
laꞌarí nupechu puꞌují.
144 Nakaje piwakáraꞌakare inaꞌuké laꞌaká, iꞌimajeri ñakeja palá.
Paꞌá nojló weꞌepíkaje, palá nuꞌumakáloje marí ejaꞌawá chu penaje.
145 Tupana, nupechu lokópaꞌalaja nupuraꞌono pijwaꞌaté.
Paꞌá pinakojó nuká,
kaja nuwata piyuke pipurákaꞌalo jaꞌapiyá jemaꞌakana.
146 Pijloja kalé numá, paꞌakáloje nuñathé penaje,
nuwátakale piwakáraꞌaka ke laꞌakana.
147 Lapiyami wajmeꞌetaka piyá, nopó pijwaꞌaté puraꞌajó.
Numá pijló, paꞌakáloje nuñathé penaje,
kaphí nupechu iꞌimakale nakaje parukákare wajló chojé.
148 Wajúwaꞌaka piyá, noꞌó piño pipurákaꞌalo jaꞌapejé,
nuꞌujnatákaloje nupéchuwa nakaje pimakare nakú, pilaꞌakáloje wajló penaje.
149 Pemaꞌá nupuraꞌakó pijwaꞌaté, íkiꞌija piwátakale nuká.
Paꞌá nojló iꞌimakaje, palá pilaꞌakale paꞌapiyá jemaꞌajeño nakú rejenowaja.
150 Kaja nowaꞌá wani chapú nulaꞌajeño;
eyá pipurákaꞌalo, pewíñaꞌatakare nakú inaꞌuké, nalaꞌakáloje ñaké penaje, juká wani neká riliyá.
151 Piká, Tupana, nowaꞌá wani piká.
Piyuke pipurákaꞌalo, piwakáraꞌakare chu inaꞌuké laꞌaká nakaje, kewaka riká.
152 Júpimi eyá, nuweꞌepí pipurákaꞌalo nakojé,
piwakáraꞌakare chu inaꞌuké laꞌaká nakaje.
Piká kemari rinaku iꞌimaká, matajnako riꞌimakáloje ñaké penaje.
153 Pamá mékeka nujñaꞌaká chapú kaje yajwé panaku, piꞌimatá nuká riliyá.
Unká nupechu kapicháñaalaje nakaje pewíñaꞌatakare nakú weká.
154 Pipuraꞌó nuchaya, nawajaka piyá nuká;
páchoꞌota nuká richiyá.
Paꞌá nojló iꞌimakaje,
pimakare nakú, paꞌajíkare paꞌapiyá jemaꞌajeñojlo ke.
155 Unká wani paꞌalá puꞌuwaré laꞌajeñó ñathé,
unkale nalaꞌalá nakaje piwakáraꞌaka ke.
156 Tupana, inaꞌuké wani piká iná waꞌaté;
paꞌá nojló iꞌimakaje, palá pilaꞌaká iná nakú lokópaꞌala.
157 Re kajrú chapú nunaku péchuruna.
Kaphí nawátaka nuwakáraꞌakana,
eꞌiyonaja unká nuyurila nuliyó nakaje laꞌakana piwakáraꞌaka ke.
158 Unká méñoꞌojo nujñaꞌalá panaku pajnoꞌoñó palá laꞌakaná liyá,
unkale nemaꞌalá nakaje, piwakáraꞌakare inaꞌuké laꞌaká, jaꞌapiyá.
159 Tupana, pamá meke íkiꞌika nuwátaka nakaje pimakare nakú.
Paꞌá nojló iꞌimakaje, íkiꞌija wani piwátakale nuká.
160 Pipurákaꞌalo awakátari piyukeja kewákaje purákaꞌaloji.
Nakaje piwakáraꞌakare inaꞌuké laꞌaká, palani riká,
rejenowaja inaꞌukejlo, matajnako riꞌimakáloje ñakeja penaje riká.
161 Unká na nulaꞌalá, eꞌiyonaja nawakáraꞌajeño nakiyana wátaño nulaꞌakana chapú.
Nupechu nakuja nuphá pipurákaꞌalo jaꞌapí.
162 Puꞌuwaká iná iphátaka palá nojé nakaje,
wakajé puꞌují iná pechu, ke kaja nupechu laꞌakó
puꞌují nakaje pimakare nakú, pilaꞌakáloje wajló penaje.
163 Unká wani nuwátala pajlakaje,
unká méñoꞌojo nujñaꞌalá panaku riká.
Eyá íkiꞌija nuwátaka nakaje pewíñaꞌatakare nakú weká,
walaꞌakáloje rimaká ke penaje.
164 Methú ke numaká pijló:
Palá pilaꞌaká nuká, ke,
nakaje piwakáraꞌakare walaꞌaká iꞌimakale palani wani.
165 Unká na nakú kalé íkiꞌija pipurákaꞌalo wátajeño kawílaꞌaño;
unká kaja na kalé laꞌarí ujwí napechu piliyá.
166 Tupana, nuwata piꞌimataka nuká kapichákajo liyá,
kaja nulaꞌá piyukeja nakaje piwakáraꞌaka inaꞌuké laꞌaká ke.
167 Nomaꞌá nakaje piwakáraꞌakare walaꞌaká jaꞌapiyá,
apú nakaje chaje wani nuwátaka riká.
168 Nomaꞌá kaja nakaje piwakáraꞌakare walaꞌaká jaꞌapiyá,
nulaꞌá kaja nakaje pipechu nakú riꞌimaká ke.
Piká weꞌepiri meke laꞌajérika nuká.
169 Nowíyoꞌoko nupuraꞌakó pijwaꞌaté,
nupurákaꞌalo numakare nakú pijló, iphari pinaku, Tupana.
Paꞌá nojló weꞌepíkaje, pipurákaꞌalo kemaká ke.
170 Pemaꞌá nupuraꞌakó pijwaꞌaté, piꞌimatákaloje nuká penaje,
pimaká paꞌapiyá jemaꞌajeño nakú iꞌimaká ke.
171 Notaneje pijló palá nojé jataníkaje,
pewíñaꞌatakale nuká palá wani
nakaje piwakáraꞌakare walaꞌaká nakú.
172 Notaneje pijló, palá pilaꞌakale weká
nakaje piwakáraꞌakare walaꞌaká aú.
173 Piꞌimá lamáꞌatakeja ke, paꞌakáloje nuñathé penaje,
palá pilaꞌakale weká piyuke nakaje piwakáraꞌakare walaꞌaká aú.
174 Tupana, nuwata piꞌimataka nuká.
Puꞌují wani nupechu nakaje pewíñaꞌatakare weká nakú.
175 Nuwata marí ejaꞌawá chu iꞌimakana,
palá nupuraꞌakóloje pinaku penaje.
Eo paꞌá nuñathé, pilaꞌakale palá iná nakú.
176 Oveja, mapeja kapichako raꞌapaka ewá,
keja kaja nukapichako iꞌimaká,
raú piꞌijná majó nukulaje iꞌimaká.
Unká nupechu kapicháñaalaje nakaje piwakáraꞌakare walaꞌaká.