Tupana, piweꞌepí numuꞌují
51
Tupana, kajrú wani piwátakale paꞌapiyá jemaꞌajeño, piweꞌepí numuꞌují.Inaꞌuké muꞌují weꞌepéjeri piꞌimakale,
pikaꞌá nupechu nakiyá puꞌuwaré nulaꞌakare. a
2 ¡Palaka nupechu nakiyá puꞌuwaré nulaꞌakare;
paꞌá nojló wajé péchuji!
3 Nuweꞌepí unká wani nulaꞌalá nakaje piwátaka ke;
unká wani nupechu kapicháñaala puꞌuwaré nulaꞌakare.
4 Puꞌuwaré wani nulaꞌaká.
Nakaje, unká wani piwátalare, kaje nulaꞌá.
Ñakele puꞌuwaré iná laꞌakare chona piwajá iná.
Palani ñaké puꞌuwaré laꞌajeñó wajákana,
unká na kemalajla pinaku:
“Mapeja riwajaka puꞌuwaré laꞌajeñó”, ke.
5 Kewaka, puꞌuwaré laꞌajerí nuká.
Numothoꞌoká iꞌimaká eyá, ñakeja nuká.
Puꞌuwaré laꞌajeri nuká, noló wo chu nuꞌumaká iꞌimaká eyá.
6 Kewaka íkiꞌija piká, Tupana, wátaka wátaño napechu iꞌimaká puꞌuwaká pijló,
unká na kalé namichoꞌojnoja napechu nakú.
Kaja paꞌá najló péchuji iꞌimaká.
7 Pikaꞌá nupechu nakiyá puꞌuwaré nulaꞌakare,
nupechu iꞌimakáloje wajé ke piño penaje.
Juni juwákaꞌala, palani iná amákare, jareni wani, ke,
kaja nupechu yuríkoloje nojló penaje.
8 Kaja paꞌá nuꞌumaká chapú kaje yajwé amájeri penaje iꞌimaká,
eꞌiyonaja kalé pilaꞌá piño puꞌují nupechu.
10 Tupana, paꞌá piño nojló wajé péchuji,
nulaꞌakáloje palá raú penaje,
nulaꞌaká piyá piño puꞌuwaré.
Paꞌá nojló wajé péchuji,
nuꞌujnatákaloje raú nupéchuwa piwátaka ke laꞌakana nakuja.
11 Pipechu kapicháñaaniña nuká;
pipaꞌatániña kaja nuliyá Pipechu.
12 Piꞌimataka nuꞌumaká kapichákajo liyá wakajé,
puꞌují wani nupechu iꞌimaká.
Pilaꞌá piño ñaké nupechu, puꞌují nupechu iꞌimakáloje piño,
piꞌimatákale nuká kapichákajo liyá.
Pipechu aú ja pilaꞌano palá wani inaꞌuké nakú.
Piyurí nuká, nuyuríkoloje Pipechu jaꞌapiyá penaje,
13 raú nowíñaꞌatakaloje unká wátalaño paꞌapiyá jemaꞌakana,
nakaje piwátakare iná laꞌaká nakú,
napajnoꞌotákaloje napéchuwa piká ejo raú.
14 Tupana, nuꞌumatájeri piká, pamá nuká palá,
nulaꞌaká piyá chapú ajopana.
Raú notaniko nuꞌumajika ajopánajlo palá wani pilaꞌaká inaꞌuké yukuna.