Unká liñeru palamáneja kalé iná iꞌimajla yukuna marí
49
Jemaꞌá palá marí, piyuke inaꞌukena marí teꞌerí nakú iꞌimakaño.2 Jemaꞌá palá riká piyukeja: kajrú liñérutena, eyá kamuꞌují laꞌakaño, inaꞌuké wakáraꞌajeño, eyá mapeja iꞌimakaño,
kajena jemaꞌare marí piyukeja.
3 Kapechúruna purákaꞌalo numaje nakú ijló.
Kajrú wani nakaje nakojé weꞌepéjeño purákaꞌalo numaje kaja nakú ijló.
4 Purákaꞌaloji, palá laꞌaká iná jenakú, nakuja nuꞌujnataje nupéchuwa.
Nakaje, meꞌechuje iꞌimakare inaꞌukejlo nakú waꞌató, numaje kaja ijló, nuwaraꞌajika guitarra kaje nakú ketana.
5 ¿Naje chi nukeroꞌó chapú kaje yajwé nojló penaje iꞌimakájikare piyá?
Apala riwakajé kaꞌajná, chapú nunaku péchuruna wátaje nulaꞌakana chapú.
6 Kaphí puꞌuwaré laꞌajeñó pechu naliñérute chojé.
Raú nalaꞌá nanakuwá ajopana cháꞌatajeño ke wani,
kajrú leꞌejepelaji iꞌimakale nakapi.
7 Unká na iꞌimatálaje rikó chapú kaje yajwé amákana liyá,
unká kaja na kalé aꞌajeri riwemiwa Tupánajlo,
riꞌimatákaloje riká kapichákajo liyá penaje.
8 Unká iná warúwaꞌalajla liñeru aú inajluwa iꞌimakaje,
9 iná takaꞌaká piyá, iná iꞌimakáloje matajnako penaje.
10 Kaja wamano ñaké waja inaꞌuké takaꞌaká piyuke:
kapechúruna iꞌimakaño,
eyá mapechúruna iꞌimakaño waꞌató, takaꞌañó ñaké waja.
Natakaꞌaká ejomi, kajrú nanánemi yuriko ajopánajlo.
11 Kajrú liñérutena warúwaꞌaño najluwa kajrú teꞌerí,
rejomi naꞌá riká teꞌerí ií neí nakojé.
Eꞌiyonaja kalé liri iꞌimajeri nañakajela penaje ñakeja wani,
richu natami iꞌimajikale ñakeja.
12 Unká inaꞌuké iꞌimalaje matajnako,
eꞌewakale kajrú wani riliñéruteri riꞌimajika eꞌiyonaja.
Ritakaꞌajé kaja, piyuke kamejérina takaꞌaká ke kaja.
13 Nachojoja péchuruna iꞌimakaño kaphí,
puraꞌañó palá nanakuwaja kalé,
ilé kaje pachá nakapichajo.
14 Riwakajé kapichákajo iꞌimajé najló namájeri keja.
Ovéjana amájeri wáꞌaka rileꞌejena ovéjana riwátaka ejo,
ke kaja kapichákajo wáꞌajika neká liri chojé.
Palá laꞌajeñó cháꞌatajeño neká, kaja kapichákaño keja, puꞌuwaré laꞌajeñó.
Ñakele liri iꞌimajeri nañakajela ke najló ñakeja wani.
15 Eyá nuká, Tupana iꞌimatájeri nuká kapichákajo chiyá, nukapichako piyá.
Rejomi riwáꞌaje nuká, nuꞌumakáloje rijwaꞌaté penaje.
16 Ñakele pikawílaꞌaniño apú nakojé,
pamájika ee rilaꞌaká rinakuwá kajrú liñéruteri ke,
richaje, richaje ke, nakaje palá nojé iꞌimakale riñakaré chu.
17 Ritakaꞌajika wakajé, unká na rijñaꞌalaje rijwaꞌató liri chojé.
Nakaje, palá nojé rikapi iꞌimakare nakiyana,
unká kaja rijñaꞌalaje rijwaꞌató riwakajé.
18 Kajmuni riꞌimajika ketana, palá ripechu iꞌimajika rinane nakú.
Kajrú leꞌejepelari riꞌimakale, palá inaꞌuké puraꞌajiko rinaku.
19 Eyá ritakaꞌajika ejomi, unká ramálaje piño mejámaꞌatani.
20 Unká inaꞌuké iꞌimalaje matajnako,
eꞌewakale kajrú wani naliñérute riꞌimajika eꞌiyonaja.
Natakaꞌajé waja, piyuke kamejérina takaꞌaká ke kaja.