Tupánajlo jataníkana, palá rilaꞌakale iná
33
Iká, palá laꞌajéñojlo numá: “Ipechu iꞌimá palá Tupana nakú”.Palá laꞌajeñó numá chiyá, palá nojé waja purákaꞌaloji jáchoꞌo Tupánajlo.
2 Imá rijló: “Palá pilaꞌaká weká”, ke, jataniko.
Iwaraꞌá kaja guitarra kaje nakú rijló.
3 Jataní rijló wajé jataníkaje.
Iwaraꞌá piyukeja keꞌiyapejé nakaje nakú, jataníjika rijló kewá.
4 Kewákaje Tupana purákaꞌalo.
Piyukeja nakaje wamákare aú waweꞌepí rilaꞌaká piyuke nakaje,
rimaká rinaku iꞌimaká chuwá.
5 Riwata piyukeja inaꞌukena marí ejaꞌawá chu iꞌimakaño laꞌaká palá.
6 Riká keñoꞌótari jeꞌechú, piyukeja nakaje richu iꞌimakare waꞌaté.
Ripurákaꞌalo, eyá rikaéjane aú ja, rikeñoꞌota piyuke nakaje iꞌimaká.
7 Juni jalomi jakojé waja rawakata piyukeja juni.
Rejé rilamáꞌata riká,
juni jalomi iꞌimakáloje raú juniphuni wani penaje.
8 ¡Iphá Tupana jaꞌapí piyukeja marí teꞌerí nakú iꞌimakaño!
¡Piyukeja ejaꞌawá chuwá iꞌimakaño iphare raꞌapí!
9 Ripurákaꞌalo aú ja riwakáraꞌa piyuke nakaje keñoꞌótako iꞌimaká.
Riwakáraꞌaka riꞌimaká, ke waja nakaje iꞌimaká piyukeja.
10 Unká weꞌepílaño Tupana nakojé, wátañojla nakaje laꞌakana,
eꞌiyonaja unká wani ráchoꞌolajo najló palá,
Tupana kapichátajikale naliyá riká.
11 Eyá nakaje Tupana wátakare laꞌakana,
rilaꞌajé ripechu nakú rilaꞌakana iꞌimaká chuwá.
12 Puꞌují wani, kaphí Tupana chojé iꞌimakaño pechu,
nachiꞌinárikana riꞌimakale.
Riꞌiwapakárena rijluwa, rileꞌejena inaꞌukena penájena neká.
13 Piyukeja Tupana amaka inaꞌuké, jeꞌechú chiyá iꞌimajemi.
14 Riꞌimaká eyá, ramá palá piyukeja inaꞌukena marí teꞌerí nakú iꞌimakaño. 15 Riká keñoꞌótari napechu iꞌimaká,
ñakele raꞌá kaja rinakojó piyuke nakaje nalaꞌakare.
16 Unká wani nawakáraꞌajeño nakiyana iꞌimatálajla nekó naleꞌejena suráana palamane;
unká kaja meke laꞌajé suráa katejmuni wani iꞌimatálajla rikó ritejmú aú.
17 Unká na penaje kawaruna neꞌejnakárena nakú nókajo iꞌimalá;
unká méñoꞌojo neꞌematala nanaku jaꞌapájeño kapichákajo liyá.
Katejmúruna neká, kaphí wani kaja nechoꞌokó,
eꞌiyonaja unká méñoꞌojo neꞌematala iná kapichákajo liyá.
18 Eyá Tupana aꞌarí rinakojó ñakeja wani kaphí richojé péchuruna, iphaño raꞌapí.
Kaphí napechu, íkiꞌija riwátakale neká.
19 Kaphí napechu richojé, riꞌimatákaloje neká takaꞌakaje chiyá,
raꞌakáloje najló iꞌimakaje, najñaꞌajika meꞌepijí panaku wakajé.
20 Kaphí wapechu Tupana chojé.
Kajrú raꞌaká wañathé.
Palá kaja ramaka weká.
21 Ñakele puꞌují wani wapechu, kaphí wapechu iꞌimakale richojé.
22 Tupana, piwata íkiꞌija weká ñakeja wani,
wapechu iꞌimaká kaphí pichojé lokópaꞌalaje.