Puꞌuwaré iná laꞌakare yukuna iná iꞌimá Tupánajlo, ramákoloje iná chaje penaje
32
Puꞌují wani péchuri inaꞌuké, kaja Tupana amákaro chaje,piyuke puꞌuwaré rilaꞌakare liyá.
2 Puꞌují wani péchuri inaꞌuké,
unká iꞌijnatala ripéchuwa meke apú waꞌaté pajlákana nakú.
Puꞌují kaja, unká Tupana kemalare nakú:
“Puꞌuwaré laꞌajerí riká”, ke pechu rijló.
3 Unká nuꞌumalá puꞌuwaré nulaꞌakare yukuna Tupánajlo ketana, kajrú wani nuwajaꞌatako,
kaja iyakaje nakuja nuꞌumajíkale weꞌechú kaꞌalá keja.
4 Kaja weꞌechú, eyá lapí waꞌató, nomake riwajájika nuká yajwé.
Jarechí wakajé, kiñaja kamú kamaré wijíñoꞌotaka aꞌawaná iwí,
ke kaja nuweꞌepíjika nunapona tajnájiko nojló kiñaja.
5 Eyá nuꞌumaká aú pijló piyuke wani puꞌuwaré nulaꞌakare yukuna,
unká na numichoꞌotala piliyá, raú piká, Tupana, amaro nuchaje iꞌimaká.
6 Ñakele pipurákaꞌalo kemaká ke laꞌajeñó amájika wakajé chapú kaje yajwé,
napuraꞌajó pijwaꞌaté rinaku, paꞌakáloje nañathé penaje.
Kajrú wani kaꞌajná namájika chapú kaje yajwé,
eꞌiyonaja unká chapú kaje namájikare yajwé cháꞌatalaje neká.
7 Pichojé numejñata nokó, palá pimejñátakale nuká chapú kaje liyá.
Kaphí pawíyoꞌoka wátaño nulaꞌakana chapujlo,
nalaꞌaká piyá nuká chapú.
8 Tupana kemari nojló: “Nujlú chuwaja piká;
nuká kaja kemájeri pijló mékeka pilaꞌajika nakaje nakú.
Nuká iꞌimajeri penakú laꞌajeri.
Nowíñaꞌataje kaja piká, pilaꞌakáloje palá nakaje penaje.
9 Piꞌimaniña kawarú ke.
Unká riweꞌepila mékeka iná wátaka rilaꞌaká nakaje.
Pejruꞌuwá, iná aꞌakare rinuma chojé aú,
iná pajnoꞌotaka riká iná wátaka ejo.
Unkachu iná aꞌalá pejruꞌuwá rinuma chojé,
unká meke laꞌajé iná chiraꞌátala riká”, ke pimaká.
10 Kajrú wani puꞌuwaré laꞌajeñó amájika chapú kaje yajwé.
Eyá kaphí Tupana chojé iꞌimakaño iꞌimajeño palá,
kajrú wani riwátakale neká.
11 Iká, palá Tupana laꞌakárena nakú, palá laꞌajeño iꞌimakale,
pechu iꞌimaré puꞌují Tupana nakú.
¡Awíyoꞌo kaja kajrú, puꞌují ipechu iꞌimakale!