Mékeka Tupana wátaka inaꞌuké iꞌimaká marí ejaꞌawá chu yukuna marí
15
Tupana, ¿meke laꞌajeri chi iꞌimarijla pijwaꞌaté ñakeja wani piñakaré chu?¿Na chi iꞌimarijla pijwaꞌaté ñakeja wani yenuri jiꞌiwata,
piꞌimakare nakú e?
2 Palá laꞌajeri, unká laꞌalá puꞌuwaré;
kewaka kaja puraꞌakó, rikaja kalé iꞌimarijla pijwaꞌaté.
3 Unká ripuraꞌaló ajopana nakú puꞌuwaré;
unká kaja rilaꞌalá chapú rijwákeꞌena, rawaꞌá iꞌimakaño waꞌaté.
4 Unká kaja riphala, unká Tupana iphálarena jaꞌapí.
Palá Tupana laꞌakárena nakú, nakú rilaꞌá kaja palá.
Rilaꞌá kaja nakaje, rimaká rilaꞌakana nakú ke.
Apala unká paala kaꞌajná nakaje rilaꞌakare jáchoꞌoko rijló,
eꞌiyonaja rilaꞌá riká.
5 Riyaꞌatá kaja liñeru ajopánajlo mapeja;
unká rimalá najló, naꞌakáloje rijló riyaꞌatákana najló wemí.
Ajopana wátakachu rijló liñeru aꞌakana mapeja,
rimakáloje apú unká laꞌalá puꞌuwaré nakú,
mapeja nawajákaloje riká penaje,
unká remaꞌalá naꞌapiyá, nawátaka kajrú liñeru aꞌakana rijló eꞌiyonaja.
Ilé ke iꞌimajika, iꞌimajeri ñakeja wani Tupana waꞌaté,
unká ráchoꞌolajo raꞌapiyá jemaꞌakana chiyá.