Inaꞌuké yurika riliyó palá laꞌakaná, rilaꞌakáloje puꞌuwaré penaje yukuna marí
14
Unká iꞌijnatálaño napéchuwa palá nakaje nakú kemaño:“Unká Tupana iꞌimalá”, ke.
Nayurí kaja naliyó palá laꞌakaná,
rilanakiya nalaꞌakáloje puꞌuwaré penaje,
raú nalaꞌá puꞌuwaré wani.
Ñakele unká na iꞌimalá neꞌiyá laꞌarí palá nakaje.
2 Jeꞌechú chiyá iꞌimajemi, Tupana amári palá piyukeja inaꞌukena,
ramákaloje re kaꞌajná neꞌiyá pajluwaja iꞌijnatari ripéchuwa palá, wátari kaja kaꞌajná raꞌapiyá jemaꞌakana.
3 Eꞌiyonaja piyukeja wani inaꞌukena iꞌijnataka napéchuwa puꞌuwaré laꞌakana nakú.
Kaja nayurí naliyó piyukeja palá laꞌakaná,
kaja chuwa unká wani na iꞌimalá neꞌiyá wátari palá laꞌakana.
Unká wani pajluwaja ñani kaꞌajná iꞌimalá wátari palá laꞌakana.
4 Laꞌañó chapú Tupana jaꞌapiyá jemaꞌajeño,
unká kaja puraꞌalaño Tupana waꞌaté,
raú mapechúruna ke neká, puꞌuwaré laꞌajeñó kaja neká.
5 Kajrú nakurúkajika nakeroꞌojiko akuwaná,
raꞌapiyá jemaꞌajeño waꞌaté Tupana iꞌimakale.
6 Re kaꞌajná pajluwaja, unká laꞌalá rinakuwá ajopana cháꞌatajeri ke.
Raú kaꞌajná kajrú puꞌuwaré laꞌajeñó iꞌichaká nakaje riwátakare laꞌakana nakú,
eꞌiyonaja palá Tupana mejñátaka riká naliyá.
7 Ipuré Sión e kaꞌajná, pajluwaja Israel lakénami
iꞌimatájeri kapichákajo liyá iꞌimajé.
Riꞌimatájika neká ejomi, palá nakaje nalaꞌajíkare jáchoꞌojiko najló,
raú puꞌují piyukeja Israel lakénami pechu iꞌimajika.