Pajluwaja puraꞌakó Tupana waꞌaté, raꞌakáloje riñathé penaje yukuna marí
13
Tupana, ¿meketana júpika chi pipechu kapicháñaajika nuká?¿Kaja chi ñakeja pipechu kapicháñaajika nuká?
¿Meketana júpika pataꞌajiko nuliyá, pamaka piyá nuká?
2 ¿Meketana júpika chi piyuríjika nomaka chapú kaje yajwé?
¿Meketana júpika chi chapú nunaku péchuruna iphájika naꞌapiwá nojló?
3 Tupana, kaphí nupechu pichojé,
nuwakáraꞌajeri piká, ñakele pamá palá nuká.
Paꞌajipá nojló, paꞌá kaja pinakojó nupurákaꞌalo.
Paꞌá nujlujlo kamareji, nomákaloje raú palá wani penaje.
Unká wani nuwátala manaꞌí chiyó takaꞌakana.
4 Unká nuwátala chapú nunaku péchuruna kejátaka nuká,
unká kaja nuwátala nemaká nunaku:
“Weká cháꞌataño riꞌimaká michú ta”, ke.
Unká kaja nuwátala napechu laꞌakó puꞌují,
unká nakaje jáchoꞌolajo palá nojló wakajé.
5 Kaphí nupechu nujluwa, nuweꞌepíkale íkiꞌija piwátaka nuká.
Puꞌují kaja nupechu, nuweꞌepíkale piꞌimatájika nuká kapichákajo liyá.
6 Notaneje Tupánajlo, palá wani rilaꞌakale nuká.