2
Tupana waꞌatéjeri, jeꞌechú chiyaje, iꞌijnari pajimila Guilgal eyá, ají ke apú pajimila Boquim ejo. Re rimá israelítanajlo Tupana nakú: 2 “Kaja rimá inaku iꞌimaká: ‘Iꞌimajika teꞌerí, numakare ijló iꞌimaká nakú wakajé, unká nuwátala ipuraꞌakó nakaje laꞌakaná pajwaꞌatéchaka nakú rewá iꞌimakaño waꞌaté, riyuríkoloje ñaké penaje’. Numá kaja iꞌimaká, ikapichátakaloje naliyá pukunaji nalaꞌakare nachiꞌinárikanajlo penaje. Eꞌiyonaja unká jemaꞌalá noꞌopiyá. ¡Amá chuwa mékeka ilaꞌaká apoꞌojó! 3 Ñakele numá ijló meꞌetení: unká nóchoꞌotalaje ijló keleruna inaꞌukena iléreya. Kamejérina kapichako napatajona chojé, ke kaja neká, nachiꞌinárikana waꞌaté, apichátajika ipechu, jemaꞌaká piyá noꞌopiyá”, ke Tupana waꞌatéjeri, jeꞌechú chiyaje, kemaká najló.4 Ilé ke nemaꞌaká rimaká najló aú kajrú neyaka. 5 Ñakele naꞌá riká pukunaji ií Boquim ke (Iyakaje pukuna, ke kemakánaka riꞌimaká). Rejomi nenó napirana nakiyana Tupánajlo puꞌuwaré nalaꞌakare chaya.
10 Kaja ewaja piyuke pheñawilana, Josué michú waꞌaté iphákaño michuna takaꞌatako. Rejomi nayanimínami yuró. Neká unká weꞌepíkeño Tupana nakojé; unká kaja naweꞌepike mékeka Tupana aꞌajika nachiꞌiná michuna ñathé iꞌimajika.
11 Unká paala Tupánajlo nakaje israelítana laꞌajíkare iꞌimajika, nalaꞌajíkale nakaje unká riwátalare kaje, nakeñoꞌokale keꞌiyapejena Baal jenami jaꞌapí iphákana. Napechu iꞌimaké rinaku: “Wachiꞌinárikana jenami riká”, ke. 12 Kaja nayurí naliyó Tupana, nachiꞌiná michuna pechu iꞌimajíkare chojé kaphí, jáchoꞌotari neꞌemaká piyuke Egipto teꞌeré eyá iꞌimaká. Nayurí raꞌapiyá jemaꞌakana, nephákaloje rewá nawaꞌó iꞌimakaño waꞌaté nachiꞌinárikana jaꞌapí. Ilé kaje pachá Tupana yúchaꞌaro íkiꞌija wani nachá. 13 Nayurí kaja napéchuwa laꞌakana puꞌují Tupánajlo. Lanakiya nalaꞌaké puꞌují napéchuwa Baal, Astarté waꞌaté jenámijlo. 14 Ilé kaje pachá Tupana yúchaꞌo wani nachá, raú riyurí jataꞌakáchina rewá iꞌimakaño jataꞌataka nanane naliyá piyuke. Riyurí kaja chapú nanaku péchuruna cháꞌataka neká nókakajo aú. Kaja unká meke nalaꞌaké neká. 15 Israelítana iꞌijnajika kewá nókajo ajopana waꞌaté, ajopana cháꞌatakeño neká, Tupana aꞌajíkale nañathé nacháꞌatakana aú. Chapú riꞌimajíkano najló. Kaja Tupana kemá júpimi ke najló iꞌimaká: “Unká jemaꞌalaje noꞌopiyá, wakajé amaje chapú kaje yajwé”. Rimaká najló iꞌimaká keja riꞌimaká najló, nayuríkale raꞌapiyá jemaꞌakana.
16 Tupana yuriri namaka chapú kaje yajwé, eꞌiyonaja raꞌaké nañathé. Raꞌá najló nawakáraꞌajeño, naꞌakáloje nañathé, namejñátakaloje nekó ajopana liyá penaje. 17 Eꞌiyonaja unká nemaꞌaké nawakáraꞌajeño jaꞌapiyá, unká kaja nemaꞌaké Tupana jaꞌapiyá. Kaja napechu iꞌimaké ajopana chiꞌinárikana nakú: “Wachiꞌinárikana kaja neká”, ke. Palá nachiꞌiná michuna jemaꞌaká Tupana purákaꞌalo jaꞌapiyá iꞌimaká, eꞌiyonaja neká unká jaꞌapala nachuwá. 18 Methú ke Tupana apiyákajika najló nawakáraꞌajeño; neká iꞌimajika ketánaja kalé Tupana mejñátajikano neká chapú nanaku péchuruna liyá. Kamuꞌují Tupana weꞌepíjika nanaku, namájikale kajrú chapú kaje yajwé. 19 Eꞌiyonaja nawakáraꞌajeri tajnáñaajika neká ejomi, napaꞌajiko piño puꞌuwaré laꞌajé. Nachiꞌiná michuna laꞌajika puꞌuwaré, chaje wani nalaꞌajíkano puꞌuwaré. Ajopana nakuja napechu iꞌimaké: “Neká wachiꞌinárikana”, ke. Unká nayurila naliyó puꞌuwaré laꞌakaná, kaja nawátaka ke wani nalaꞌajika.
20 Ilé kaje pachá Tupana yúchaꞌaro wani nachá, rimá nanaku: “Kaja mariruna inaꞌukena apichata nakaje wapuraꞌakaro nakú nachiꞌinami waꞌaté iꞌimaká, riyuríkoloje ñaké penaje. Numá nanaku iꞌimaká: Palá nulaꞌajika nanaku, ke, eꞌiyonaja unká wani nawátala noꞌopiyá jemaꞌakana. 21 Ilé ke nalaꞌaká pachá, unká nóchoꞌotalaje najló inaꞌuké lupemí yuriño maárowa, unká Josué jáchoꞌotalarena iꞌimaká, ritakaꞌakale, unká chiyó ráchoꞌota neꞌemaká”, ke Tupana kemaká nanaku. 22 Tupana yuriri ajopana rewá iꞌimakaño iꞌimaká najwaꞌaté, ramákaloje mékeka israelítana laꞌaká. Nawata kaꞌajná raꞌapiyá jemaꞌakana, nachiꞌiná michuna jemaꞌajika raꞌapiyá iꞌimajika ke kaja; unká kaꞌajná nawátala raꞌapiyá jemaꞌakana. Ramákaloje mékeka nalaꞌaká penaje riyurí ajopana yuriko najwaꞌaté. 23 Ñaké iꞌimakale, unká Tupana aꞌalá nañathé, náchoꞌotakaloje neká reyá penaje. Riyurí neꞌemaká rewá najwaꞌaté.