JOSUÉ
Josué wáꞌaka israelítana juni Jordán paꞌanojo pitá yukuna marí
1
Kaja Tupana waꞌateje Moisés michú takaꞌá iꞌimaká. Rejomi Josué, Nun michú iꞌirimi, yuriro rapumí chojé. Moisés michú jaꞌapiyatéjemi riꞌimaká. Rijwaꞌaté Tupana puraꞌó piño, rimá rijló:2 “Kaja nujwaꞌaté jápajeri Moisés takaꞌá, ñakele piká wáꞌajeri chuwa pijwaꞌatéjena, israelítana (Israel lakénami), juni Jordán paꞌanojo pitá. Rejo pitari teꞌerí noꞌojé ijló iteꞌerewa penaje. 3 Kaja numá Moisesjlo rinaku iꞌimaká: Noꞌojé ijló riká, piyukeja teꞌerí rewá iꞌimakare, jaꞌapájikare nakuwá iꞌimajika. 4 Riká teꞌerí toꞌoró desierto, ipuré Líbano eyá, ají ke yenojo juni Éufrates ejená. Hitítana teꞌeré eꞌiyowá, juni jalomi Mediterráneo ejená ritoꞌó. 5 Unká na cháꞌatalaje piká piꞌimajika ketana. Noꞌojé piñathé, noꞌojika Moisés ñathé iꞌimajika ke kaja; unká wani nuyurílaje pichá. 6 Pilaꞌá pipéchuwa kaphí nochojé iꞌimakana aú; pitáraꞌo Nupurákaꞌalo chojé kaphí. Piká tamákaꞌatajeri ijluwa kele teꞌerí, numájikare nakú aꞌajútayajlo nakú iꞌimajika. 7 Marí kalé piweꞌepéjeno: Pilaꞌajé kaphí pipéchuwa, pitáraꞌajo kaja kaphí Nupurákaꞌalo chojé. Riká nakuja kalé numá pijló, pilaꞌakáloje ñaké penaje. Pemaꞌá piyukeja Nupurákaꞌalo, Moisés yuríkare ijló iꞌimaká jaꞌapiyá. Pilaꞌá nakaje piyukeja rimaká ke, raú piyukeja nakaje pilaꞌajíkare jáchoꞌojiko pijló palá. 8 Nakaje, Nupurákaꞌalo lanaꞌakéjami kemakare nakú, pipuraꞌó kaja ajopana waꞌaté. Rinaku piꞌijnatá pipéchuwa ñakeja, pilaꞌakáloje piyukeja rimaká ke penaje, raú piyukeja nakaje pilaꞌajíkare jáchoꞌojiko palá pijló. 9 Nuká kemari pijló, pilaꞌakáloje kaphí pipéchuwa, pitáraꞌakoloje kaja kaphí Nupurákaꞌalo chojé. Unká na piyá pikeroꞌolajo; pilaꞌaniña kaja pipéchuwa ujwí nakaje laꞌakana liyá, nuꞌumajíkale pijwaꞌaté paꞌapájika ewá”, ke Tupana kemaká Josuejlo.