Raú neꞌejná pajimila Jericó ejo, re nephá pajluwájaru nakú. Rahab ruí iꞌimaká, wapichá ruꞌumaká. Ruñakaré chojé natajnó, nakamátakoloje re penaje. 2 E lapí pajluwaja reyaje iꞌijnari neꞌemakana waꞌaté puraꞌajó, rimá rijló:

—Kaja maapami israelítana nakiyana iphicha majó wakejílaꞌaje.

3 Raú riwakáraꞌa raꞌapiyatéjena nakiyana iꞌijnaká Rahab ñakaré ejo. Neká kemaño rojló:

—Ileruna achiñana iphíchaño majó pinaku, iꞌijichaño majó wakejílaꞌaje, ñakele chuwa páchoꞌota neká ta majó.

4 Maapami ke ruwakáraꞌaka nataꞌakó ruñakaré jiꞌiwátaje, e rumá najló:

—Nephicha joꞌó nunaku iꞌimichaka, unká nuweꞌepílacha mere eyéjenaka neꞌemichaka. 5 Kamú jaꞌachako piyá, náchoꞌocho marí pajimila eyá. Unká chiyó netá pajimila numaná, náchoꞌocho iꞌimichaka, unká nuweꞌepila méñoꞌojoka neꞌejichaka. Kiñaja jechoꞌótajika ee neká, apala iphátaje neká —ke rumaká najló.

6 Mapeja rupajlaka najwaꞌaté, kaja maapami ke ruwakáraꞌaka nataꞌakó ruñakaré jiꞌiwátaje. Ruñakaré jiꞌiwata cha kajrú kuꞌumé kaje iꞌimaká, rimakáraꞌakoloje penaje. Riká aú napáraꞌata nekó, ajopana amaka piyá neká.

7 E neꞌemakana jaꞌapiyatéjena paꞌañó riyukuna iꞌimajé rijló. Raú riwakáraꞌa suráana nakiyana nechoꞌótaje. Namujlúkaꞌa pajimila kurárane chiyá, rejomi netá piño rinumaná. Reyá neꞌejná ají ke pajimila yámojo, juni Jordán lokoꞌopánejo, nakulákana nakú.

8 E nakejílaꞌajeño kamátako yámona, Rahab iꞌijrayo ruñakaré jiꞌiwátaje najwaꞌaté puraꞌajó, rumá najló:

9 —Nuweꞌepí Tupana aꞌajika ijló wateꞌeré iteꞌerewa penaje. Tupana aꞌarí iñathé, wakeroꞌokóloje ipiyá penaje; piyukeja weká, maárowa iꞌimakaño, keroꞌokajo nakuja weká. 10 Kaja neꞌemá wajló mékeka Tupana aꞌaká iñathé kajrú wani yukuna. Jáchoꞌoko Egipto teꞌeré eyá iꞌimaká wakajé, Tupana tamákaꞌatari ijló juni jalomi Kerálani, ikuwáꞌakaloje riwami chuwá makajreni chuwá penaje. Wemaꞌá kaja mékeka juni Jordán paꞌanojo pitá ikapichátaka amorréona michuna yukuna. Neꞌemakánana michuna Sihón, Og, kele waꞌatéjena michuna neꞌemaká. 11 Wemaꞌaká riyukuna aú piyukeja wapojloꞌokó. Wakeroꞌokole, unká na wátala ijwaꞌaté nókakajo. Tupana, riká ipechu iꞌimakare chojé kaphí, piyukeja wani minárikana riká. Nakaje jeꞌechú chu iꞌimakare minárikana riká; nakaje marí ejaꞌawá chu iꞌimakare minárikana kaja riká. 12 Ñakele chuwa numá ijló, ilaꞌakáloje nojló marí ke: Ikapichátajika inaꞌuké marí pajimila eyájena wakajé, ikapichátaniña nuká, nuchiꞌiná, nojena, kele najwaꞌaté. Ilaꞌá wanaku palá, nulaꞌaká iká palá ke kaja. Chuwa ilaꞌá nakaje, nuweꞌepíkaloje raú ñaké ilaꞌajika weká. 13 Eko amó wachaje piyukeja: noraꞌapá, noló, nojena, kele waꞌaté. Iꞌimatá weká kapichákajo liyá, wanane waꞌaté —ke rumaká najló.

14 Nemá rojló:

—Unkájika ee piꞌimá wayukuna ajopánajlo, waweꞌepeje pimuꞌují, pejena waꞌaté. Palá walaꞌajika iká, Tupana aꞌajika wajló marí teꞌerí wateꞌerewa penaje wakajé. Wawata Tupana kapichátaka weká, unkájika ee wemá pijló kewaka.

15 Curara, jipa nakiyana waja, chipúkaꞌari yenoje pajimila nakojé. Riká kurara nakú Rahab ñakaré iꞌimá. E ventana chiyá ruwitúkaꞌata tupajuma, rinakuwá nakejílaꞌajeño witúkaꞌakaloje pajimila yámojowa penaje. Rumá najló:

16 —Chuwa iꞌijná ají ke ipuré ejo, ikulájeño iphátaka piyá iká. Rejé jataꞌajó weji ke kala ketana, napaꞌajiko majó napumí chuwá ketana. Rejómiko ipaꞌó inakiyana ejo.

17 Nemá rojló:

—Kaja wemicha pijló: Unká wakapichátalaje piká, pichiꞌiná, pejena, kele waꞌaté. Pimíchaka wajló iꞌimachaka, ke walaꞌajika piká palá. 18 Ñakele marí ke pilaꞌajika: Wephájika majó ijwaꞌaté nókajo wakajé, pepoꞌojé marí inimú kerani pileꞌejé ventana nakojé, riká wawitúkaꞌakare chiyá nakojé. Riwakajé kaja pawakátaje pichiꞌiná, pejena, kajena piñakaré chojé. Nekaja kalé, piñakaré chu iꞌimajíkaño, unká wakapichátalaje. 19 Unkájika ee neꞌemá pijwaꞌaté piñakaré chu, napachoja nakapichajo. 20 Ilé ke walaꞌajika piká palá, unkájika ee piꞌimá wayukuna ajopánajlo. Eyá piꞌimajika ee wayukuna ajopánajlo, unká walaꞌalaje piká, pejena, kele palá, wemíchaka pijló iꞌimichaka ke —ke nemaká rojló nawitúkaꞌaka venta chiyá yámona.

21 —Je, ñaké riká —ke rumaká.

E neꞌemá nayukuno, rejomi nawitúkaꞌa kurara nakiyá tupajuma nakuwá, ají ke teꞌerí eꞌiyajé. E neꞌejná reyá, rejomi ropoꞌotá inimú kerani ventana nakojé, nemaká rojló ke.

22 E kaja nakejílaꞌajeño iꞌijnaño ají ke ipuré, rumakare nakú najló ejo, yuriño weji ke kala ketana reꞌiyowá. Ketana suráana iꞌimaká nakulákana nakú apú eyá, apú eyá ke, eꞌiyonaja unká nephátala neká. Kaja ewaja napaꞌó napumí chuwá pajimila Jericó ejo. 23 Rejéchami nakejílaꞌajeño witúkaꞌaka ipuré nakiyá. Rejomi nakuwaꞌa juni Jordán paꞌanojo pitá; reyá napaꞌó, iphaño Josué nakú. 24 Nemá rijló:

—Tupana aꞌajeri wajló piyukeja nateꞌeré wateꞌerewa penaje. Kaja rewá iꞌimakaño pojloꞌoñó kajrú wani, nakeroꞌokole wapiyá.