Israelítana kuwáꞌaka juni Jordán paꞌanojo pitá yukuna marí
3
E muní ke lapiyami Josué jáchoꞌoko piyuke rijwaꞌatéjena waꞌaté Sitim eyá, neꞌejnakáloje juni Jordán turenaje. Nakuwáꞌaka riká piyá, nayuró weji ke kala ketana riturená. 2 Paꞌu ke kala laꞌaká wakajé, Josué wakáraꞌari raꞌapiyatéjena iꞌijnaká riyukuna iꞌimajé rijwaꞌatéjenajlo. 3 Nemá najló: “Purákaꞌaloji lamáꞌatajeño inaꞌuké chaja Tupana waꞌaté, Leví michú lakénami, iꞌijnajeño watukumá. Amájika ee nawákoꞌoka kaichama Tupana purákaꞌalo iꞌimakare chu, iꞌijnajé nápumi chu. 4 Palá iweꞌepíjika mérowaka iñeꞌepú jaꞌapaka, mamákanaru ijló riká iñeꞌepú. Iꞌijnaniña kalé nawaꞌajé wani, pajluwaja kilómetro ketana jukaka ichiraꞌajiko nápumichu”.5 E Josué kemari rijwaꞌatéjenajlo: “Ilamáꞌata chuwa ipéchuwa palá Tupánajlo, muní amájikale mékeka Tupana laꞌaká wajló nakaje rikaja kalé weꞌepíkare laꞌakana”.
6 Rimá purákaꞌaloji lamáꞌatajeño inaꞌuké chaya Tupana waꞌatejlo: “Chuwa iwákoꞌo kaichama, Tupana purákaꞌalo iꞌimakare chu. Jáchoꞌo watukumá”.
E náchoꞌota nawakúlaꞌapajo kaichama, rejomi neꞌejná natukumá. 7 E Tupana kemari Josuejlo: “Maare eyá aꞌajná ñoꞌojó, richaje, richaje ke, pijwaꞌatéjena pechu iꞌimajika pinaku: ‘Apú chaje riká’, ke, pilaꞌajíkale palá nanaku. Raú naweꞌepeje nuká iꞌimaká pijwaꞌaté, nuꞌumaká Moisés waꞌaté iꞌimaká ke kaja. 8 Pimá kaichama wákoꞌojeñojlo: ‘Iphájika juni turenaje ee, iwitúkaꞌare rakojé, re itáraꞌajo riturená’, ke pimájika najló”, ke Tupana kemaká Josuejlo.
9 E Josué kemari rijwaꞌatéjenajlo: “Majó iꞌijná piyukeja, numakáloje ijló nakaje Tupana kemakare inaku nakú ijló”.
10 Raú nephá ripurákaꞌalo jemaꞌajé. Rimá najló: “Iꞌijnajika itukumó kewá, Tupana jáchoꞌotajika ijló reyájena reyá: cananéona, hitítana, hevéona, ferezéona, gergeséona, amorréona, jebuséona, kele Tupana jáchoꞌotaje 11 Ajopana chaje wani wakáraꞌajeri Tupana. Riká purákaꞌalo nawákoꞌoje kaichama chu itukumá. 12 Chuwa iꞌiwapá iyamá iphata jiꞌimaji nakojé (12) kele achiñana pajluwano, pajluwano ke, nanámana eꞌiyayá. 13 Purákaꞌaloji lamáꞌatajeño inaꞌuké chaya Tupana waꞌaté, wákoꞌojeño riká. Nephájika juni turenaje ee, nawitúkaꞌaje junápeje. Waꞌató ke, juni Jordán meꞌetájiko, riwami iꞌimakáloje penaje. Juni, yenójoya akhoꞌokó, awakájero pajluwaja chojeja”, ke rimaká najló.
14-16 Riwakajé kajrú juni ñaká iꞌimaká. E kaja israelítana kajyaꞌataño napajré, nakuwáꞌakaloje juni Jordán paꞌanojo pitá penaje. Purákaꞌaloji lamáꞌatajeño inaꞌuké chaya Tupana waꞌaté wákoꞌoño kaichama natukumá. Nawitúkaꞌaka junápeje ejéchami, juni yenójoya akhoꞌokó, awakako pajluwa chojeja. Ilé kaje aú juni tamákaꞌataro paliyáaka, ñakele riwami chuwá nakuwaꞌa peꞌiyowá, reja natáraꞌo. Eyá ajopana kuwáꞌaño makajreni teꞌerí chuwá paꞌanojo pitá, pajimila Jericó lokoꞌopánejo.