3 E meketánaja neꞌemaká re ejéchami, Elimélec takaꞌañáaka riyajalo Noemí, raú ruyuró rokó iyamá ruyani achiñana waꞌaté. 4 Júpichami riyanimínami wáꞌakako inaana, Moab eyájena waꞌaté: pajluwájaru ií iꞌimari Orfá, apaꞌawelo ií iꞌimari Rut. 5 Iyamá théꞌela kele jarechí ketana cha neꞌemaká naluna waꞌaté ejéchami, Mahlón, Quilión waꞌaté, takaꞌañáaka piño neká. Raú nalomi Noemí pechu laꞌaró ujwí wani, rokoja wani ruyuríkole mayajnaru, eyá mayanikeru kaja.

6 Rejomi Noemí jemaꞌayó nemaká rewá ruñakajélami nakú: “Tupana weꞌepiri piño chuwa rileꞌejena inaꞌukena muꞌují, ñakele unká najñaꞌalá meꞌepijí panaku rewá”, ke. 7 Raú rupechu iꞌimá: “Nupaꞌajó chuwa rejo”, ke. E róchoꞌo ruꞌumaká eyá, rupaꞌakóloje ají ke Judá teꞌeré ejo piño penaje. Ruꞌurinúnami iꞌijnaño kaja rujwaꞌaté. E náchoꞌo reyá, neꞌejnakáloje ají ke rejo. 8 Yaꞌajná neꞌemaká iñeꞌepú chuwá ee, rumá ruꞌurinúnamijlo:

—Nuꞌurinúnami, ipaꞌó chuwa iꞌimakáloje jaló waꞌaté. Eko Tupana laꞌá iká palá wani, ilaꞌaká weꞌemaká nuyani michuna waꞌaté iꞌimaká ke kaja. 9 Eko raꞌá iñathé, iwáꞌakakoloje piño ajopana waꞌaté, puꞌují ipechu iꞌimakáloje iyani iꞌimajíkaño waꞌaté.

Raú Noemí chiñoꞌoyó najimá chiyá, ruꞌumakáloje najló ruyukuna, eꞌiyonaja naꞌó iyaje rujwaꞌaté. 10 Nemá rojló:

—Unká wapaꞌalajo, weꞌejnajé pijwaꞌaté piteꞌeré ejo.

11 Eꞌiyonaja rumá piño najló ñakeja kaja:

—Nuꞌurinúnami, ipaꞌoja, ¿na penaje chi iwata nujwaꞌaté iꞌijnakana? Kaja unká nuyani iꞌimalaje piño, iwáꞌakakoloje najwaꞌaté penaje. 12 Ñakele ipaꞌoja iñakajela ejo, kaja phíyuꞌukeru nuká, nuwáꞌakakoloje piño. Chuwajá nuwáꞌakakelo kaꞌajná, nuyani iꞌimajla piño. 13 Eyá iꞌimajla nawátakana nakú, aꞌajná natawáꞌako ejená. Ilé ke riꞌimakela, unká iwáꞌakalojla ajopana waꞌaté. Unká wani paala, ilé ke riꞌimakela. Kaja Tupana wakáraꞌa nomaka kajrú wani chapú kaje yajwé. Amákela chapú kaje yajwé nujwaꞌaté, e richaje wani nupechu laꞌakojla kamuꞌují raú —ke Noemí kemaká najló.

14 Rejéchami neyaka rujwaꞌaté, iyakaje nakuja neꞌemá. Kaja ewaja Orfá iꞌimayo ruyukuno ruyajnérumijlo. Ruchiñoꞌó rujimá chiyá, rejomi rupaꞌó ruñakajela ejo. Eyá Rut unká wani wátalayo paꞌakajo, rujwaꞌateja ruyuró. 15 Raú Noemí kemayo rojló:

—Pamá Orfá piꞌichako ruteꞌeré ejo, ruchiꞌinárikana iꞌimaká ejo. Pipaꞌó kaja rujwaꞌaté rejo.

16 Eꞌiyonaja Rut kemayo rojló:

—Pimaniña nojló, nupaꞌañáakoloje piká penaje. Unká wani nuwátala piyuríkana. Piꞌijnajika ejo, nuꞌujnajé pijwaꞌaté; piñakajela iꞌimajeri nuñakajela ke kaja; pikáꞌana iꞌimajeño nukáꞌana ke kaja nojló; eyá pichiꞌinárikana iꞌimajeri kaja nuchiꞌinárikana ke. 17 Teꞌerí pitakaꞌajíkare nakú, rinaku kaja nuwata takaꞌakaje, rejé kaja nuwata najaꞌaká nutami. Eyá nuꞌujnañáajika ee piká méñoꞌojo kaꞌajná, nuwata Tupana wajaka nuká kaphí wani piyuríkana pachá. Takaꞌakájeja kalé tamákaꞌatajeri weká paliyáaka.

18 Noemí amaka aú Rut wátaka wani rujwaꞌaté iꞌijnakana, unká rumalá piño rojló, rupaꞌakóloje penaje. 19 Raú naꞌapá pajñakani rujwaꞌaté ají ke Belén ejo. Kaja ewaja nephá pajimila eꞌiyajé. Noemí iphaka rejé ee, kajrú Belén eyájena iꞌijnaká romaje. Inaana nakiyana kemaño rojló:

—¿Noemí chi piká?

20 Raú rumá najló:

—Imaniña chuwa nojló Noemí, ke. Mará, ke imájika nojló. (Ipijini ke kemakana Mará; eyá Noemí, ke kemakana pumeni, ke, hebréona puraꞌakó chu). 21 Nóchoꞌoko maare eyá iꞌimaká wakajé, kajrú nakaje iꞌimaká nukapi. Eyá nupaꞌó majó mapeja, kaja unká nakaje iꞌimalá nukapi meꞌetení. Kaja keja Tupana wátaka nuꞌumaká. Unká naje kalé imá nojló Noemí, ke. Kaja Tupana wajari nuká, nomákaloje chapú kaje yajwé penaje, raú chapú kaje yajwé amájeyo nuká —ke rumaká najló.

22 Ilé ke Noemí paꞌakó piño ruꞌurinumi Rut waꞌaté, Moab teꞌeré eyá, ají ke ruteꞌeré, júpimi ke róchoꞌokaro eyá iꞌimaká ejo. Nephaka pajimila Belén ejo wakajé, kajrú rewájena keñoꞌoká cebada icha ñaꞌakana namena eꞌiyayá.