1 SAMUEL
Ana, Samuel jaló, yukuna marí
1
Pajluwaja inaꞌuké iꞌimari, rií iꞌimari Elcaná. Riká iꞌimakeri Ramá teꞌeré nakú, ipuré eꞌiyowá. Nanámana iꞌimari Efraín. 2 Iyamá Elcaná luna iꞌimaká: pajluwájaru ií iꞌimari Ana, apaꞌawelo ií iꞌimari Peniná. Peniná waꞌateja kalé riyani iꞌimaké, eyá Ana waꞌaté unká wani riyani iꞌimaké. 3 Jarechí keja neꞌejnajíkano pajimila Siló ejo. Neꞌejnakeno rejo, nalaꞌakáloje puꞌují napéchuwa Tupana, weꞌepiri piyukeja nakaje laꞌakanajlo. Rejo kaja nenoke napirana nakiyana rijló puꞌuwaré nalaꞌajíkare chaya. Rewá kaja Elí iꞌimaké. Purákaꞌakaloji lamáꞌatajeri inaꞌukena chaya Tupana waꞌaté riꞌimaká. Riká yaní iꞌimaño iyamá: pajluwaja ií iꞌimari Hofní, eyá apú ií iꞌimari Finees. Purákaꞌaloji lamáꞌatajeño inaꞌukena chaya Tupana waꞌaté kaja neꞌemaká.4 Elcaná wakáraꞌajika pirájina nókana Tupánajlo, kewá rijñaꞌajíkano riꞌimi nakiyana, ritamákaꞌatakaloje riká rilúnajlo penaje. Raꞌaké kaja Peninajlo naleꞌejé paká, piyukeja ruyani waꞌaté. 5 Unká Tupana yurila riyani iꞌimaká Ana waꞌaté, eꞌiyonaja riwátake kajrú ruká. Ñakele raꞌaké rojló palá nojé riꞌimi nakiyana. 6 Mewakú ruꞌumajíkale, kajrú Peniná iphájika roꞌopiwá rojló; romákaja rulaꞌajika ruká. Mapéjaru keja rulaꞌajika ruká rujluwa.
7 Jarechí keja neꞌejnajíkano Siló ejo kewá, Peniná kawílaꞌajika Ana nakú, unkale ruyani iꞌimaké, raú rupechu iꞌimaké kamuꞌují. Unká kaja rojñake roꞌojnewá palá. Chapú kaje waꞌaté ruꞌujnaké rejo, neꞌejnajika rejo kewá. 8 Ilé ke Elcaná amájika aú rulaꞌaká rupéchuwa kamuꞌují, rimaké rojló: “Ana, ¿naje chi piyá? ¿Naje pilaꞌá pipéchuwa kamuꞌují wani? Unká kaja pajñala paꞌajnewá palá. Piweꞌepí marí: Iyamá théꞌela kele piyani iꞌimakela, puꞌují pipechu iꞌimakajla, eꞌiyonaja richaje palaka pijló nuká”.
9 E apú wakajé neꞌejná piño Siló ejo, iphaño rejo, re neꞌemá meketánaja. Najñaka naꞌajnewá ejomi, Ana mujlúkaꞌayo rokoja Tupana ñakaré chojé, rupuraꞌakóloje rijwaꞌaté penaje. Re rinumaná awaꞌá Elí yáꞌaro. 10 E rupuraꞌó Tupana waꞌaté, ruyako rumaká rijló: 11 “Tupana, piyuke nakaje laꞌajeri piká, pemaꞌá noꞌopiyá nupurákaꞌalo. Pijwaꞌaté jápajeyo keja nuká. Kajrú nomaka chapú kaje yajwé, piweꞌepí numuꞌují. Paꞌajika ee nojló nuꞌurí, nulamáraꞌaje riká pijló. Pijló nupaꞌataje riká, riweꞌepíkaloje ritukumó piwakáraꞌajika riká ke laꞌakana. Unká nupiroꞌolaje riká, ajopana weꞌepíkaloje raú pijló aꞌakanami riꞌimajika”.
12 Júpija ruyuriko Tupana waꞌaté puraꞌakano nakú. 13 Rupechu nakuwaja rupuraꞌó rijwaꞌaté. Elí amari runúmaja kalé kawitaka, raú ripechu iꞌimá runaku: “Mawerúkeꞌecha kaꞌajná ruká”, ke. 14 Raú riꞌijná rowaꞌajé rojló kemaje:
—¿Meketana júpika chi piꞌimajika maare yuwéraꞌakajo nakú? ¡Piyurí piliyó ilé kaje ta!
15 —Unká mawerúkeꞌecha kalé nuká; unká na kalé nuꞌurichá, riyuwéraꞌatakaloje nuká penaje. Tupana waꞌaté puraꞌakano nakuja nuká, chapú kaje yajwé nomákale. Chapú kaje yajwé nomákale, nuwajwé majákaꞌaro nojló maare. Riká yukuna nuꞌumá rijló. 16 Pipechu iꞌimaniña nunaku: “Unká inaꞌukélaru ta ruká”, ke. Kamuꞌují wani nupechu aú nupuraꞌó Tupana waꞌaté.
17 E rimá rojló:
—Ñaké riká, piꞌimá palá. Tupana aꞌajeri pijló kele pikejáꞌichaje riliyá.
18 —Palá piliꞌichaka nuká —ke rumaká rijló.
Raú rupaꞌó reyá, iphayo ajopana nakú. E rojñá roꞌojnewá najwaꞌaté. Reyá aꞌajná ñoꞌojó, unká rupechu jaꞌaló piño kamuꞌují kaje chojé.
19 E muní ke najmeꞌetaka ee, nalaꞌá piño napéchuwa puꞌují Tupánajlo. Rejomi napaꞌó nateꞌeré Ramá ejo. Nephá piño napumí chuwá, re neꞌemá meketánaja, rejéchami Tupana weꞌepika nakaje rumakare nakú rijló. 20 Ñakele ruꞌumá kanupá. Ruphaka roná chojé wakajé, ruꞌurí amó rojló. Roꞌó rií Samuel. (“Tupana liyá kejáꞌakanami”, ke kemakana rií.)
21 Jarechí keja Elcaná, riluna, riyani waꞌaté, iꞌijnajíkano Siló ejo. E rejo iꞌijnakana iphá piño rená chojé najló, nenókaloje pirájina nakiyana Tupánajlo, puꞌuwaré nalaꞌakare chaya. Riwata kaja nakaje rimakare nakú laꞌakana rejo. 22 Eꞌiyonaja riwakajé unká Ana iꞌijnalá najwaꞌaté rejo, rumá ruꞌurí jaraꞌapajlo:
—Marí wakajé unká nuꞌujnalaje ijwaꞌaté rejo, aꞌajná nuꞌurí ñani yuríjikaja nuchuꞌuchure iꞌirakana ejená. Rejomi nuwáꞌaje riká rejo, nuyuríkaloje riká re penaje, rijápakaloje Tupánajlo re riꞌimajika ketana.
23 Elcaná kemari rojló:
—Ñaké riká, pilaꞌá palá pipechu nakú riꞌimaká ke. Piyuró maare, aꞌajná riyuríjika pichuꞌuchure iꞌirakana ejená; rejómiko piwaꞌa riká rejo. Eko Tupana aꞌá piñathé, pilaꞌakáloje pimaká rinaku Tupánajlo iꞌimaká ke.
Raú ruyuró re ruꞌurí lamáraꞌakana nakú. 24 Kaja ewaja riyurí ruchuꞌuchure iꞌirakana. Riphaka rená chojé ejéchami, ruwáꞌaka riká najwaꞌató Tupana ñakaré ejo, Siló e iꞌimakare ejo. Kamuꞌujini joꞌó riꞌimaká riwakajé, eꞌiyonaja ruwaꞌa riká. Nawaꞌa kaja weji kele jémana pirakana achiñana rejo. Najñaꞌá kaja trigo icha pajlúwaꞌala kuwáꞌala puꞌuthé, eyá kajmú kaje jalá ñapátakanami raꞌarú chu, kaje najñaꞌá najwaꞌató. 25 Nephá rejo, e nenó pajluwaja jema pirakana Tupánajlo, puꞌuwaré nalaꞌakare chaya. Rejomi Ana iꞌijnayo Elijlo ruꞌurí yaꞌataje. 26 Ruphaka rinaku ee, rumá rijló:
27 —Apú wakajé, nuꞌumaká majó wakajé Tupánajlo, raꞌakáloje nuñathé nuꞌurí iꞌimakáloje penaje, penájerumi nuká. Remaꞌá noꞌopiyá, ñakele re nuꞌurí meꞌetení. 28 Palá nomaka riká, riꞌimakáloje Tupánajlo aꞌakanami ke penaje, riꞌimakáloje rijwaꞌaté jápajeri, riꞌimajika marí ejaꞌawá chu ketana.
Ilé ke rumaká aú rijló, rijlámaꞌo teꞌerí eꞌiyajé, ripechu iꞌimakale palá Tupana nakú.