Mékeka Ana puraꞌakó Tupana waꞌaté yukuna marí
2
Ana puraꞌayó Tupana waꞌaté, rumá rijló:“Tupana, puꞌují nupechu pinaku, pilaꞌakale nupechu kaphí.
Nuñathé aꞌajeri piꞌimakale, kaphí nupechu,
nupuraꞌakóloje chapú nunaku péchuruna nakú penaje.
¡Puꞌujija nupechu!
2 Unká na apú iꞌimalá piká ke, palá laꞌajerí.
Unká na iꞌimalá, weꞌepiri inaꞌuké mejñátakana chapú kaje liyá, piká ke.
Unká na apú iꞌimalá piká ke kaja.
3 Mapeja puraꞌakaño nanakuwá palajlo numá:
Tupánaja kalé weꞌepiri mékeka nakaje.
Riká kemájeri mékeka rijló piyukeja nakaje inaꞌuké laꞌakare.
4 Piká, Tupana, kapichátarijla nalekare, kaphí napechu iꞌimakare chojé naliyá.
Eyá paꞌá kaja maliyáruna iꞌimakaño ñathé, kaphí péchuruna neꞌemakáloje penaje.
5 Ñóꞌope aꞌajnejí iꞌimajíkarenajlo jápajeño chuwa ajopánajlo,
ñaké kaja aꞌajnejí iꞌimakáloje najló penaje.
Eyá meꞌepijí ñaꞌajeño panákujlo, re aꞌajnejí chuwa pipalamane.
Piká aꞌarí inaana mayanikéruna ñathé, nayani iꞌimakáloje kajrú.
Eyá inaana, kajrú yaní iꞌimakaño, yaní yurikáloje iꞌimakana.
6 Piká aꞌarí inajlo kajmuchaji;
piká kaja kaꞌarí iná liyá riká.
Iná takaꞌaká wakajé, piká kaja iꞌimatari iná liri chiyá.
7 Piká laꞌarí weká, weꞌemakáloje kamuꞌují laꞌakaño kaꞌajná, kajrú leꞌejepeláruna kaꞌajná.
8 Piweꞌepí kaja kamuꞌují laꞌakaño jáchoꞌotakana chapú kaje chiyá,
neꞌemakáloje palá, ajopana inaꞌukena pechu iꞌimakárena nakú waꞌaté.
Ejaꞌawá minárikana piká, Tupana.
9 Palá paꞌaká pinakojó paꞌapiyá jemaꞌajeño;
eyá puꞌuwaré laꞌajeñó kapichájeño kalajeruni chojé,
unkale na iꞌimatálaje rikó ritejmú aú.
10 Piká, Tupana, weꞌepiri chapú pinaku péchuruna kapichátakana.
Pichaní aú pikapichátaje neká jeꞌechú chiyá.
Pimaje kaja piyukeja inaꞌukena, ejaꞌawá chu iꞌimakaño nakú,
mékeka nakaje nalaꞌakare iꞌimaká pijló.
Piká kaja kemájeri nanaku mékeka nalaꞌakana iꞌimajika,
nakaje unká paala nalaꞌakare pachá.
Riká, paꞌajíkare inaꞌuké wakáraꞌajeri penaje, cháꞌatajeri ajopana pipalamane”,
ke Ana puraꞌakó Tupana waꞌaté.
11 Re neꞌemá meketánaja, rejomi napaꞌó piño nateꞌeré ejo. Rikaja kalé ruꞌurí ñani yuriro re, rijápakaloje Elí waꞌaté Tupana ñakaré chu.
Unká inaꞌukélaruna Elí yaní iꞌimaká yukuna marí
12 Unká wani inaꞌukélaruna Elí yaní iꞌimajika; unká wani naꞌaké nanakojó Tupana wátaka ke laꞌakana. 13 Purákaꞌaloji lamáꞌatajeño inaꞌukena chaya Tupana waꞌaté neꞌemajika, eꞌiyonaja unká wani nalaꞌaké najápakaꞌala Tupana purákaꞌalo lanaꞌakéjami kemaká ke. Apú kaꞌajná nójikachu ripirana nakiyana Tupánajlo, puꞌuwaré rilaꞌakare chaya, riká iꞌimi rimothoꞌoké. Ilé ke namájika ee, nawakáraꞌake najwaꞌaté jápajeño nakiyana richaje, kajruni ripatajona nakapi ke namothoꞌojika riká ejo raú. 14 Rimothoꞌojika ketana najoꞌojika riꞌimi eꞌiyajé ripatajona aú, náchoꞌotakaloje najló riꞌimi penaje. Piyuke neká iphákeño Siló ejo; ñakeja kaja nakaꞌajika riꞌimi naliyá Elí yanijlo penaje. 15 Nawátajika kewá rijilami káraꞌatakana altar nakú, Elí yaní waꞌaté jápajeño iphákeño rejé, nemaké najló:
—Aꞌá wajló riꞌimi nakiyana, waꞌamitakáloje riká purákaꞌaloji lamáꞌatajeño inaꞌukena chaya Tupana waꞌatejlo penaje. Unká nawátala riꞌimi mothoꞌokéjami; nawata riká kajmuni.
16 Apala nemaké jápaño Elí yanijlo:
—Paineko nukáraꞌataje rijilá Tupana wakáraꞌaka ke, rejomi pijñaꞌajé najló nawátakare kaje.
Raú nemaké najló:
—¡Unká! Meꞌetení paꞌajika ta wajló riká. Unkájika ee paꞌá wajló riká, wajñaꞌajé iliyá riká tejmuji aú.
17 Ilé ke Elí yaní laꞌajika puꞌuwaré wani, unká wani Tupana wátalare kaje. Tupana wakáraꞌakeri inaꞌuké noka napirana nakiyana rijló, puꞌuwaré nalaꞌakare chaya, eꞌiyonaja kajrú wani nephájika naꞌapiwá Tupánajlo.
18-19 Jarechí keja Samuel jaló iꞌijnajíkano rejo ruyajná waꞌaté, nenókaloje napirana nakiyana Tupánajlo, puꞌuwaré nalaꞌakare chaya. Riwakajé romákeno ruꞌurí, ruphátake kaja rijló aꞌarumakaji rukujípaꞌakare rijló penaje. 20 Re neꞌemaká wakajé, Elí puraꞌaró Tupana waꞌaté Elcaná, riyajalo Ana, kele chaya, raꞌakáloje nañathé nayani iꞌimakáloje piño, roꞌokare Tupánajlo apumí chojé. Ilé ke ripuraꞌakó nanaku ejomi, napaꞌó piño nañakajela ejo.
21 Re neꞌemá. E kaja Tupana laꞌarí Ana palá, ruyani iꞌimakáloje piño penaje. Ilé kaje aú ruyani iꞌimaño pajluwa théꞌela kele. Weji kele achiñana iꞌimaká, eyá inaana iꞌimaño iyamá. Ewá Samuel tawáꞌajiko nakaje laꞌakana nakú Tupánajlo.
22 Eyá Elí, kaja phíyuꞌuke wani riꞌimaká. Remaꞌaké mékeka riyani laꞌajika israelítana waꞌaté yukuna. Nalaꞌaké kaja namanaicho inaana waꞌaté, jápakeño Tupana ñakaré numaná chu waꞌaté. Remaꞌaké kaja riyukuna, 23 raú rimá riyánijlo: “Unká wani paala nakaje nemakare nakú nojló inaku. 24 Unká wani paala ilaꞌaká Tupana leꞌejena inaꞌukena waꞌaté, raú napuraꞌó nakaje puꞌuwaré ilaꞌakare nakú nujwaꞌaté. 25 Iná laꞌakachu kaꞌajná chapú apú inaꞌuké, Tupana aꞌajla iná ñathé, iná lamáꞌatakaloje riká rijwaꞌaté. Eꞌiyonaja iná laꞌakachu nakaje unká Tupana wátalare kaje, unká na apú iꞌimalá, iná ñathé aꞌajeri rejéchami”, ke rimaká najló. Eꞌiyonaja unká naꞌalá nanakojó naraꞌapá purákaꞌalo, kaja Tupana pechu nakú nakapichátakana iꞌimakale.
26 Eyá Samuel tawáꞌakero palá. Palá wani remaꞌajika Tupana jaꞌapiyá. Palá Tupana pechu iꞌimajika rinaku; ñaké kaja inaꞌuké pechu iꞌimajika rinaku palá.
27 E kaja apú wakajé, pajluwa Tupana purákaꞌalo jaꞌapátajeri iphari Elí nakú, rimá rijló: 28 “Marí ke Tupana kemaká: ‘Nuꞌuwapá nujluwa piyuke israelítana eꞌiyayá nanakiyana, neꞌemakáloje purákaꞌaloji lamáꞌatajeño inaꞌukena chaya nujwaꞌaté penaje, nakáraꞌatakaloje nojló napirana nakiyana, puꞌuwaré inaꞌuké laꞌakare chaya penaje. Nakáraꞌatakaloje kaja nojló aꞌawaná iká, penaje nuꞌuwapá neká. Apoꞌojó kaja naꞌaká naꞌarumaká, ajopana inaꞌukena liyá, neꞌejnakáloje nujwaꞌaté puraꞌajó richu penaje. Numá kaja najló iꞌimaká, riꞌimi nakáraꞌatajikare nojló nakiyana yuríkoloje najló, najñákaloje riká penaje. 29 Ilé ke nuwakáraꞌaka neꞌemaká. Eꞌiyonaja piká, piyani waꞌaté: ¿Naje iphá jaꞌapiwá najló, ikaꞌakale naliyá napirana, nakáraꞌatakare nojló nakiyana? ¿Naje piwata íkiꞌija wani piyani nuchaje, piyuríkale najñaꞌaká palá nojé riꞌimi najluwa, napitakóloje raú penaje? 30 Kaja noꞌó piká inaꞌukena chaya purákaꞌaloji lamáꞌatajeri nujwaꞌaté penaje. Neká, nuꞌuwapakárena paineko iꞌimaká, lakénami nakiyana piꞌimakale, rikaja kaja nakú piyani, pilakena, kele jápañojla. Eꞌiyonaja unká riꞌimalaje ñaké marí pumí chiyó, puꞌuwaré ilaꞌakale pachá. Palá nulaꞌaká noꞌopí iphajeño nakú, eyá unká iphálaño noꞌopí, nomaje chapú. Nuká Tupana kemari ilé ke. 31 Marí pumí chiyá unká piyani, pilakénami, kele nakiyana iꞌimalaje purákaꞌaloji lamáꞌatajeño inaꞌukena chaya nujwaꞌaté. Riká numakare nakú aꞌajútayajlo, neꞌemakáloje papumíchojeka ke, papumíchojeka ke, purákaꞌaloji lamáꞌatajeño inaꞌukena chaya nujwaꞌaté penaje, tajnájero chuwa ijwaꞌaté. Unká piyani jáchaꞌalajo. 32 Kiñaja pilakena tajnájiko, unká najáchaꞌalajo iꞌimajika. Palá nulaꞌajika ajopana israelítana nakú. Marí kaje amákana aú pipechu iꞌimajé kamuꞌují pijluwa, unkale ñaké riꞌimalaje pijló. 33 Pajluwaja pejena nakiyánaja kalé iꞌimajero, riꞌimakáloje purákaꞌaloji lamáꞌatajeri inaꞌukena chaya nujwaꞌaté meketánaja penaje. Riꞌimajé, rilaꞌakáloje pipechu kamuꞌují penaje. Eyá ajopana pilakena, nakapichátaje. 34 Piyani Hofní, Finees waꞌaté, kapichájeño pajñakani riká weꞌechú kaꞌalá japi waja. Ilé ke riꞌimajika ee, piweꞌepeje kewaka numaká pijló. 35 Rejomi noꞌojé apú purákaꞌaloji lamáꞌatajeri inaꞌukena chaya nujwaꞌaté penaje, piká, piyani, kele apumí chojé. Riká laꞌajeri rijápakaꞌala nuwátaka ke, kaje noꞌojé rilaꞌajeri penaje. Rilakénami jápajeño rinákuja papumíchojeka, papumíchojeka ke. Nalaꞌajé ñakeja nakaje nawakáraꞌajeri, nuꞌuwapakare ajopana inaꞌukena eꞌiyayá, wakáraꞌajika neká ke. 36 Eyá pilakénami, wejápaja iꞌimajíkaño, iꞌijnajeño richaje, nakejáꞌakaloje riliyá liñeru, aꞌajnejí kaje wemí penaje. Nakejáꞌaje kaja riliyá jápakaje, najápakaloje rijwaꞌaté penaje, liñeru iꞌimakáloje najló aꞌajnejí warúwaꞌajona penaje’, ke Tupana kemaká pinaku”, ke Tupana purákaꞌalo jaꞌapátajeri kemaká Elijlo.