Tupana wáꞌakaka Samueljlo yukuna marí
3
Samuel jápakeri Tupánajlo; Elí iꞌimakeri riwakáraꞌajeri. Riwakajé unká Tupana puraꞌaló piño inaꞌuké waꞌaté, júpimi ripuraꞌakó najwaꞌaté iꞌimajika ke kaja. Unká kaja ripuraꞌaló najwaꞌaté natapú, apala keja ripuraꞌakono pajluwaja waꞌaté apú eyá ke. 2 Riwakajé Elí ijlú kamaré keñoꞌorí yakákaje. E kaja lapí neꞌemá kamátakajo nakú. Elí kamátaro rikapure chu, 3 eyá Samuel kamátaro kaja apaꞌalá ukapú chu, Tupana ñakaré chu. Richu kaichama iꞌimari, Tupana purákaꞌalo iꞌimakare chu. Lukúnaꞌatakeja kaja rikamaré iꞌimaká. 4 Rikamátako cháyomi Tupana wáꞌari rijló:—¡Samuel!
—Maare nuká.
5 Rejomi rechoꞌó Elí iꞌimaká ejo, rimá rijló:
—¿Piká chi wáꞌichari nojló? Maare nuká. ¿Na penaje piwata nuká?
—Unká nuwáꞌalacha pijló —ke rimaká—. Pipaꞌó papumí chuwá, pikamáchiyo.
—Je —ke rimaká.
—¡Samuel!
Raú rapó piño. Riꞌijná piño ají ke Elí iꞌimaká ejo, rimá piño rijló:
—¿Piká chi wáꞌichari nojló? Maare nuká, ¿na penaje piwata nuká?
—Unká nuwáꞌalacha pijló, pipaꞌó piño kamátajo.
—Je —ke rimaká.
7 Unká Samuel weꞌepila naka wáꞌaka rijló. Kaja paineko chiyó Tupana keñoꞌoká rijwaꞌaté puraꞌakano, ñakele unká riweꞌepila. 8 E meketánaja iꞌimajemi Tupana wáꞌari piño rijló. Kaja weji ke pe cha laꞌaká nakú. Raú ráchoꞌo piño, riꞌijná piño Elí awaꞌajé, rimá piño rijló:
—¿Piká chi wáꞌichari nojló iꞌimichaka? Maare nuká, ¿na penaje piwata nuká?
—Pipaꞌó piño papumí chuwá. Tupana wáꞌajika ee piño pijló, pimaje rijló marí ke: “Nuwakáraꞌajeri, pimá nojló piwátaka ke. Pijwaꞌaté jápajeri nuká, jemaꞌajeri paꞌapiyá”, ke pimájika rijló.
—Je —ke rimaká rijló.
—¡Samuel!
Raú raꞌajipá rijló, rimá rijló:
—Nuwakáraꞌajeri, pimá nojló piwátaka ke. Pijwaꞌaté jápajeri nuká, jemaꞌajeri paꞌapiyá.
11 Tupana kemari rijló:
12 —Rejéchami nulaꞌajika piyuke nakaje numakare Elí, riyani, kele nakú iꞌimaká. 13 Kaja numá rijló nuwajájika riká, rikáꞌana waꞌaté, puꞌuwaré riyani laꞌakare pachá. Wajákejana ke rikáꞌana iꞌimajika ñakeja wani. Kaja riweꞌepí mékeka riyani puraꞌakó puꞌuwaré wani nunaku iꞌimaká, eꞌiyonaja unká rakhaꞌalá neꞌemaká, nalaꞌaká piyá ñaké. 14 Ñakele numá, unká nomálajo nachaje, piyuke rikáꞌana waꞌaté; unká wani puꞌuwaré nalaꞌakare kapichálajo nupechu nakiyá. Nakáraꞌataje kaꞌajná nojló napirana nakiyana; naꞌajé kaja kaꞌajná nojló nakaje, eꞌiyonaja unká wani nupechu kapicháñaalaje puꞌuwaré nalaꞌakare —ke Tupana kemaká Samueljlo.
15 Ilé ke ripuraꞌakó Samuel waꞌaté, rejomi riꞌimá toꞌokajo nakú aꞌajná najmeꞌetaka ejená. Najmeꞌetaka ejomi, Samuel jáchoꞌoro, meꞌetari Tupana ñakaré numaná. Unká riwátala Elijlo mékeka Tupana kemaká rijló yukuna iꞌimakana, rikeroꞌokole ripiyá. 16 Eꞌiyonaja Elí wáꞌari rijló, rimá rijló:
—¡Samuel!
—Maare nuká.
17 —¿Meke chi Tupana kemíchaka pijló lapí? —ke rimaká rijló—. Pimichoꞌotániña nuliyá riká. Unkájika ee piꞌimá nojló riyukuna richuwá, Tupana wajájeri piká kaphí wani ripachá.
18 Raú Samuel iꞌimari riyukuna piyukeja rijló, unká na rimichoꞌotala riliyá. Raú Elí kemari:
—Tupana, wawakáraꞌajeri wani riká, reja rilaꞌare nakaje palá ripechu nakú riꞌimajika ke.
19 Ewá Samuel tawáꞌako iꞌimaká, kaja riñapá. Tupana aꞌakeri riñathé nakaje rilaꞌajíkare aú. Nakaje Samuel kemájikare nakú iꞌimakeri ñakeja. 20 Raú piyukeja israelítana, rewá iꞌimakaño, weꞌepíjika Tupana purákaꞌalo jaꞌapátajeri wani riꞌimaká. 21 Siló e riyuró, re Tupana puraꞌakó rijwaꞌaté iꞌimajika. Re rikeñoꞌó rijwaꞌaté puraꞌakano iꞌimaká. Pulapé rimájika nakaje nakú Samueljlo iꞌimajika, raꞌapátakaloje riyukuna piyuke israelítanajlo penaje.