Filisteo eyájena nókako israelítana waꞌaté yukuna marí
4
Riwakajé nókakajo nakú israelítana iꞌimaké filistéona waꞌaté. Afec ejé filistéona awakó iꞌimaká, nenókakoloje najwaꞌaté penaje. Eyá israelítana awakaño Eben-ézer awaꞌajé. 2 Reyá neꞌejná filistéona waꞌaté nókajo. Kaja ewaja filistéona cháꞌataño neká nókakajo aú. Riwakajé nenó cuatro mil israelítana nakiyana. 3 Ilé ke nenótaka nanakiyana kajrú wani aú, israelítana paꞌañó napajré iꞌimaká ejo. Nephaka ajopana nakú ee, neꞌemá najló nakapichako yukuna. Neꞌemaká aú riyukuna, pheñawilana kemaño pajlokaka: “¿Naje chi Tupana yuricha filistéona kapichátaka kajrú wani wanakiyana? Chuwa weꞌejnajika Siló ejo kaichama ñaꞌajé, Tupana purákaꞌalo iꞌimakare chu. Riká wajñaꞌajé wajwaꞌató, wenókajiko ee piño najwaꞌaté, Tupana iꞌimatákaloje weká chapú wanaku péchuruna liyá raú penaje”, ke napuraꞌakó pajwaꞌatéchaka.4 Raú israelítana nakiyana wakáraꞌaño naleꞌejena suráana nakiyana iꞌijnaká Siló ejo riká kaichama ñaꞌajé. Richu Tupana purákaꞌalo jipa nakú lanaꞌakéjami iꞌimari. Tupana, ajopana chaje iꞌimakare, piyukeja wani laꞌaká nakaje, purákaꞌalo iꞌimari richu. Kele kaichama ñaꞌajé neꞌejná. Elí yaní iyamá, Hofní, Finees, kele iꞌijnaño kaja najwaꞌaté rijñaꞌajé. 5 E kaja nephá rejo. Najñaꞌaká riká ejomi, napaꞌó piño napumí chuwá. Nephaka aú rijwaꞌaté napajré iꞌimaká ejo, puꞌují wani israelítana pechu laꞌakó, namaka aú nephátaka rejé Tupana purákaꞌalo. Puꞌují napechu iꞌimaká akuwaná nawíyoꞌo piyukeja kaphí wani. Teꞌerí ñakaꞌakó nawíyoꞌoka mejé aú ejé.
6 Filistéona jemaꞌañó nawíyoꞌoka kajrú wani, raú napechu iꞌimá: “¿Naje kaꞌajná nawíyoꞌo kajrú wani?” Kaja ewaja nemaꞌá nephátaka rejé kaichama, Tupana purákaꞌalo lanaꞌakéjami iꞌimakare chu yukuna. 7 Ilé kaje aú nakeroꞌó napiyá, nemá: 8 “¡Meke chapú wani riꞌimajika wajló! Piyukeja wani laꞌaká nakaje riká, nachiꞌinárikana. ¿Na kaꞌajná iꞌimatárijla weká riliyá? Riká kapichátari najló Egipto eyájena iꞌimaká”.
9 Eꞌiyonaja filistéona wakáraꞌajeri kemari najló: “Iyúchaꞌo naleꞌejé paká, inókakoloje najwaꞌaté penaje, nacháꞌataka piyá weká, weꞌemaká piyá mapeja najwaꞌaté jápajeño, neꞌemaká wajwaꞌaté iꞌimaká ke kaja”.
10 Raú nalaꞌá napéchuwa kaphí, nenókakoloje najwaꞌaté penaje. Rikaja náchoꞌoko najwaꞌaté nókajo. Yuriná wani neꞌemaká rejéchami, nenókakoloje israelítana waꞌaté penaje. Kajrú wani nacháꞌataka neká, raú neñaó napajré iꞌimaká ejo. Riwakajé kajrú wani nenótaka nanakiyana. Nenó 30.000 israelítana leꞌejena suráana nakiyana. 11 Riwakajé kaja nakaꞌá naliyá kaichama Tupana purákaꞌalo lanaꞌakéjami iꞌimakare chu. Nenó kaja riwakajé Elí yaní michuna iyamano, Ofni, Finees waꞌaté.
12 Pajluwaja israelítana leꞌejé suráana nakiyana ñaaró nenókako eyá. Rechoꞌó reyá ají ke pajimila Siló ejo. Kaja rijiyoꞌotá raꞌarumaká rinaku iꞌimakare, ramákale kajrú wani chapú kaje yajwé, raꞌatá kaja teꞌerí riwilá eꞌiyowá. 13 Riphá rejo. Re Elí iꞌimari yáꞌakajo nakú Tupana ñakaré numaná awaꞌá. Re riꞌimá nawátakana nakú, apala ramá inaꞌuké iphaka rejé, rikejáꞌakaloje riliyá kaichama, Tupana purákaꞌalo iꞌimakare chu yukuna penaje, kajrú wani riwó kaꞌakole rijwaꞌaté. E kaja ñaaró penájemi iphari pajimila eꞌiyajé. E paineko riꞌimá pajimila eꞌiyowá iꞌimakáñojlo mékeka filistéona kapichátaka neká kajrú wani yukuna. Raú kajrú wani nawíyoꞌoka.
14 Elí jemaꞌarí nawíyoꞌoka kajrú wani mejé aꞌajnare ke, raú ripechu iꞌimá: “¿Naje chi kajrú wani nawíyoꞌoka mejé?”. Riꞌimaká riyukuna najló ejomi, riꞌijná Elijlo riyukuna iꞌimajé. 15 Kaja noventa y ocho jarechí cha Elí iꞌimaká, kaja mejlurú wani riꞌimaká. E kaja riphá rinaku, 16 rimá rijló:
—Wajé nuphíchaka nókajomi, nukaja kalé iꞌimicharo kapichákajo liyá.
—¿Meke piꞌimichaka rejo? —ke Elí kemaká rijló.
17 —Piyukeja weká iíchaño filistéona liyá —ke rimaká—. Kajrú wani nenótiyaka wanakiyana, íkiꞌija wani. Piyani michuna iyamá, Hofní michú, Finees michú waꞌató, nenocha kaja. Rejomi najiꞌichá waliyá kele kaichama, Tupana purákaꞌalo lanaꞌakéjami iꞌimakare chu.
18 Ilé ke riꞌimaká rijló kaichama yukuna, eja rikojnoꞌó riyámojo riñákaꞌaro chiyá, Tupana ñakaré numaná awaꞌajé. Kaja phíyuꞌuke wani riꞌimaká, ñópoꞌojlo kaja riꞌimaká. Kachini wani riꞌimakale, rinúrupi yupaꞌaró, rikojnoꞌoká riñákaꞌaro chiyá aú. Raú ritakaꞌá rejeja. Cuarenta jarechí ketana riꞌimaká israelítana wakáraꞌajeri iꞌimaká.