Kaichama, Tupana purákaꞌalo iꞌimakare chu, yukuna marí
5
Kaja filistéona kaꞌá israelítana liyá kaichama, Tupana purákaꞌalo iꞌimakare chu. Rejomi najñaꞌá riká Eben-ézer eyá, ají ke najwaꞌató pajimila Asdod ejo. 2 Nephátaka rejo ee, nayáꞌata riká nachiꞌinárikana jenami ñakaré chojé. Dagón nachiꞌinárikana ií iꞌimaká. Riká jenami awaꞌajé nayáꞌata kaichama. 3 E muní ke lapiyami pajimila Asdod eyájena iphaka nachiꞌinárikana ñakaré chojé, amaño nachiꞌinárikana jenami toꞌokó kawaká kaichama awaꞌá. Raú náchoꞌota piño nachiꞌinárikana Dagón jenami rapumí chuwá. 4 Muní ke pajimila eyájenaja iphaka piño rejé, amaño nachiꞌinárikana jenami toꞌokó kawaká kaichama awaꞌá. Kaja yupaꞌakeja rinúrupi, raꞌanapitá waꞌaté iꞌimaká.6 Rejéchami Tupana wajaka piyuke pajimila Asdod eyájena, rewá iꞌimakaño waꞌató. Raú nalaꞌó piyukeja natámina, kajrú nanapona jenátako najló mapeja. 7 Reyájena amaka aú nalaꞌakó natámina rewá, nemá pajlokaka: “Unká wani paala kaichama, israelítana chiꞌinárikana purákaꞌalo iꞌimakare chu, iꞌimaká maare. Kajrú wani riwajaka weká wachiꞌinárikana Dagón waꞌaté”.
8 Raú nawakata piyuke filistéona wakáraꞌajeño, napuraꞌakóloje najwaꞌaté rinaku penaje. Nemá najló:
—¿Meke walaꞌajika kele kaichama, israelítana chiꞌinárikana purákaꞌalo iꞌimakare chu?
—Palani riꞌijnatákana pajimila Gat ejo.
Raú najñaꞌá riká. 9 Nephata riká rejo. Ñakeja kaja piyukeja rewá iꞌimakaño laꞌakó natámina raú. 10 Raú filistéona jaꞌapátaño piño riká, ají ke pajimila Ecrón ejo. Nephátaka riká rejo aú, kajrú pajimila eyájena awíyoꞌoka. Nawíyoꞌoko nemaká: “¡Ritajátakaloje weká penaje, iphátiya majó kele kaichama, israelítana chiꞌinárikana purákaꞌalo iꞌimakare chu!”
11 Kajrú Tupana wajájika neká, riká pajimila eꞌiyowá iꞌimakaño, raú keroꞌokajo nakuja neꞌemaké. Akuwaná nawaꞌa filistéona wakáraꞌajeño maná, nemakáloje najló napaꞌatákaloje kaichama israelítana iꞌimaká ejo. E kaja nephá nanaku, nemá najló: “Jáchoꞌota maare eyá kele kaichama, ipaꞌatá najló riká, rikapichátaka piyá weká piyukeja wani”.
12 Kajrú wani pajimila eyájena awíyoꞌojika, namájikale chapú kaje yajwé. Nachiꞌinárikanajlo waꞌató nawíyoꞌoke. Kaja kajrú wani natajnako rinaku. Eyá unká takaꞌakeño, yuríkeño kajrú nanapona nakuwá naphú ke.