Filistéona paꞌataka kaichama rapumí chuwá yukuna marí
6
Iyamá kuwáꞌata keri ketana kaichama, Tupana purákaꞌalo iꞌimakare chu, iꞌimaká filistéona teꞌeré nakú. 2 Kaja ewaja neꞌemá riyukuna keꞌiyapejena mariꞌichúnajlo, nakejáꞌakaloje naliyá mékeka nalaꞌajika riká kaichama yukuna. Nemá najló:—¿Meke walaꞌajika riká kaichama? Imá wajló mékeka walaꞌakajla riká, wapaꞌatákaloje najló riká penaje.
3 Raú nemá najló:
—Aꞌa, palani ilé kaichama, Tupana purákaꞌalo lanaꞌakéjami iꞌimakare chu, paꞌatákana najló. Paineko aꞌajé Tupánajlo nakaje palani, ripechu palaꞌakóloje ijwaꞌaté raú penaje, raú kaja itejmoꞌotajo itami kaje chiyá. Rejéchami iweꞌepíjika nájeka riwajaka iꞌimaká.
7 Nemá piño najló:
—Iwakáraꞌa nalaꞌaká peꞌiyowa jaꞌapaka wajé. Nañapátajika rilaꞌakana ejomi, iwáꞌaje iyamá jémana pirakana neꞌiyayá, unká joꞌó wani chíraꞌalaño nakaje. Nanakojé jepoꞌojé peꞌiyowa jaꞌapaka, nachíraꞌakaloje riká penaje. Unká jémana yaní iꞌijnalaje najwaꞌaté, jémana pirakana ñakarela chu nayurejo. 8 Rejomi ijñaꞌajé ilé kaichama, israelítana chiꞌinárikana purákaꞌalo iꞌimakare chu, iyáꞌatakaloje riká peꞌiyowa jaꞌapaka, jémana chíraꞌajikare chojé. Rawaꞌá kaja iyáꞌataje nakaje aꞌajíkare Tupánajlo, ripechu palaꞌakóloje ijwaꞌaté penaje. Rejomi jémana pirakana chíraꞌajeño riká nawátajika ejo.
9 Nemá piño najló:
—Eko amá palá wani méñoꞌojoka jémana pirakana chíraꞌajika riká. Puꞌuwaká nachíraꞌajika ee riká Bet-semes ejo, iweꞌepeje israelítana chiꞌinárikanaka wajaka weꞌemaká. Eyá unkájika ee nachíraꞌa riká rejo, e kaja iweꞌepeje mapeja ilaꞌakó itami iꞌimaká.
10 —Je —ke nemaká.
11-21 E nayáꞌata riká peꞌiyowa jaꞌapaka chojé. Rejomi jémana pirakana iꞌijnataño riká, ají ke puꞌukuja israelítana leꞌejé pajimila Bet-semes ejo. Ají keja napaꞌataka riká rapumí chuwá iꞌimaká.