—Oꞌowé, majó piꞌijná, piyáꞌicho majó nujwaꞌaté meketánaja, wapuraꞌachó.

—Je.

E riꞌijná rejo, riyaꞌo rijwaꞌaté. 2 Riká penájeja Booz wáꞌaka iyamá théꞌela kele pheñawilana pajimila eꞌiyowá iꞌimakárenajlo, nayáꞌakoloje najwaꞌaté penaje. E kaja nayaꞌo rejé rijwaꞌaté, 3 e rimá reꞌewejlo:

—Noemí paꞌayó piño majó, Moab teꞌeré eyá iꞌimaká. Ruká wátayo wailá Elimélec michú teꞌeremi aꞌakana riwemí aú. 4 Raú nuwata pemaꞌaká riyukuna. Piꞌimakale rilariꞌimi, pijló raꞌakana iꞌimajeri paineko. Piwátajika ee riwarúwaꞌakana, pimá nojló, mariruna pheñawilana, eyá ajopana maare iꞌimakaño, jemaꞌakáloje meke pimájika nojló penaje. Unkájika ee piwata riwarúwaꞌakana, pimá nojló, nuká warúwaꞌakaloje riká penaje.

E rimá rijló:

—Aꞌa, nuwarúwaꞌaje riká.

5 E Booz kemari rijló:

—Piweꞌepí kaja marí: piwarúwaꞌajika ee riteꞌeremi Noemí liyá, e piwáꞌakajo kaja ruꞌurí michú yajálomi waꞌaté. Moab eyájeru ruká. Ilé ke pilaꞌajika, riteꞌeremi yuríkoloje rejénamijlo penaje.

6 Ilé ke rimaká rijló aú, reꞌewé kemari:

—Ilé ke riꞌimajika ee, unká nuwarúwaꞌalaje riká. Nuwarúwaꞌakela riká, unká nuyurílajla riká nuyánijlo. Eyá piká wátajika ee riwarúwaꞌakana, piwarúwaꞌa riká. Nuyureje pijló rinakojeri —ke rimaká rijló.

7 Nawarúwaꞌajika teꞌerí wakajé, nalaꞌakeno marí ke: Teꞌerí yuríjikarojlo, rejena nakiyana riꞌimakale, kemakachu apujlo, riwarúwaꞌakaloje riká riliyá penaje, raꞌaké riwarúwaꞌajerijlo pajluwaja riꞌimaꞌulá. Ñaké nalaꞌajika ejomi, paminá aꞌaká riká teꞌerí. Raú naweꞌepike kaja nañapátaka rinaku puraꞌakano, riwarúwaꞌakaloje riká penaje.

8 Rimaká aú Boozjlo: “Piwarúwaꞌa riká”, ke, rikaꞌá pajluwaja riꞌimaꞌulá riꞌimá nakiyá, rejomi raꞌá rijló riká. 9 Raú Booz kemari pheñawilánajlo, ajopana re iꞌimakáñojlo waꞌaté:

—Kaja jemiꞌichá meke wapuriꞌichako pajwaꞌatéchaka. Kaja nuwarúwiꞌicha Noemí liyá ruyajná michú teꞌeremi, piyuke nakaje rileꞌejemi iꞌimakare waꞌató. Riyanimina michuna nánemi waꞌató kaja nuwarúwiꞌicha. 10 Waꞌató ruká Rut, Moab eyájeru, yuréjeyo kaja nojló nuyajálowa penaje, ruyajná Mahlón michú, teꞌeremi yuríkoloje rejénamijlo penaje, raú rejénami iꞌimakáloje ñakeja penaje. Unká kaja marí pajimila eyájena pechu kapicháñaalaje riká michú raú. Kaja jemiꞌichá meke wapuriꞌichako pajwaꞌatéchaka rinaku —ke rimaká najló.

11 Raú pheñawilana, ajopana re iꞌimakaño waꞌaté, kemaño:

—Aꞌa, kaja wemiꞌichá. Eko Tupana laꞌá palá ruká, piwáꞌajikareru. Eko ruꞌumá pijló Raquel micholo, Lía micholo, kele iꞌimajika Israel michujlo ke kaja. Najwaꞌaté kajrú Israel michú yaní iꞌimaká. Nalakénami weká. 12 Paꞌajuta michú, Fares michú, yaní iꞌimaño kaja kajrú iꞌimaká. Eko Tupana aꞌá pijló ñaké kaja, íkiꞌika piyani iꞌimakáloje rujwaꞌaté penaje —ke nemaká rijló.

13 Ilé ke Booz wáꞌakako Rut waꞌaté iꞌimaká. Rejomi ruꞌumaké rijwaꞌaté. Kaja ewaja Tupana palamane riꞌirí iꞌimari rujwaꞌaté. 14 Riꞌirí mothoꞌoká ejomi, ajopana inaana kemaño Noemijlo:

15 —Riká ñani laꞌajeri pipechu kaphí. Phíyuꞌukeru piꞌimajika wakajé, raꞌajé rinakojó piká, piꞌirínumi iꞌirí riꞌimakale. Íkiꞌija wani piꞌirínumi wátaka piká. Iyamá kuwáꞌata kele (7) piyani iꞌimakela achiñana, chaje puꞌujika pipechu iꞌimakajla runaku —ke nemaká rojló.

16 Rejomi Noemí wáꞌayo rulaké rukápojo. Palá roꞌojika raló ñathé rilamáraꞌakana aú. 17 Inaana, ruñakaré awaꞌá iꞌimakaño, amaka aú rulaké nemá:

—¡Re Noemí iꞌirí chuwaka!

Naꞌá rulaké ií Obed. Riyani iꞌimaká wakajé, pajluwaja nanakiyana ií iꞌimari Jesé. Rejomi pajluwaja Jesé yaní nakiyana iꞌimari David. Obed iꞌimari David aꞌajuta iꞌimaká.