—Nuꞌurinumi, palani kaꞌajná nukulaka pijló achiñá, piwáꞌakakoloje rijwaꞌaté penaje. Nuwata piwáꞌakako pajluwaja laꞌajeri pipechu puꞌují wani waꞌaté. 2 Re Booz, nuyajná michú ejénami nakiyana. Rijwaꞌaté jápajeño inaana waꞌaté pijapa iꞌimaká. Chuwajá lapí riꞌijnajé rimena eꞌiyajé jápaje, trigo nakiyá raꞌarú kaꞌajé. 3 Ñakele pilaꞌajé marí ke: Paineko piꞌijnajé aꞌapitajé, rejomi paꞌajé pamawá palá puꞌumé amarí aú; rejomi paꞌajé pinakuwá paꞌarumaká palani iꞌimajika piyukeja paꞌarumaká eꞌiyayá; kéchami piꞌijnajika rijápajika ejo. Meꞌechú piꞌimajika re rawaꞌá, aꞌajná riñapátajika rijápakaꞌala laꞌakana ejomi, rajñájika raꞌajnewá ejená. 4 Rejomi pamaje palá mérejeka rikamátajiko. Rikamátajiko cháyomi, piꞌijnajé ritoꞌokó ejé; rejomi pikaꞌajé ripayétane riꞌimá nakiyá; rejomi pitoꞌojó riꞌimá awaꞌajé. Rapójika ee, rimaje pijló mékeka riwátajika pilaꞌaká.

5 —Pimíchaka nojló ke nulaꞌajika —ke Rut kemaká rojló.

6 Raú ruꞌujná ají ke Booz mená eꞌiyajé, rulaꞌakáloje Noemí kemaká rojló ke. 7 Ruphá rejo, meketana iꞌimajemi Booz yurí rijápakaꞌala laꞌakana. Rejomi rajñá raꞌajnewá; riꞌirá kaja raphena, e kaja palá ripechu iꞌimaká. Rejomi riꞌijná richa pitákeja iꞌimaká awaꞌajé kamátajo. Meketana iꞌimajemi, rikamátako cháyomi, Rut iphayo mamejeru rawaꞌajé, e rukaꞌá ripayétane riꞌimá nakiyá. Rejé rotoꞌó kamátajo riꞌimá awaꞌajé. 8 E lapí jenaji ke manaꞌí chiyó Booz apori. Ripajnoꞌokojla eꞌiyá riweꞌepí pajluwájaru inanaru toꞌokó riꞌimá awaꞌá.

9 —¿Na chi piká?

—Rut nuká, pijwaꞌaté jápajeyo. Nuyanaꞌajú michú ejénami nakiyana piká, ñakele nuwata paꞌaká pinakojó nuká —ke rumaká rijló.

10 —Nuwata Tupana laꞌaká piká palá —ke rimaká rojló—. Pimíchaje nojló aú nuweꞌepí piphaka wani piyajná michú ejénami jaꞌapí. Piwátakela, pikulákajla pijluwa apú nuchaje walijímakaka, kajrú liñéruteri kaꞌajná, kamuꞌují laꞌaká kaꞌajná, piwáꞌakakoloje rijwaꞌaté penaje. Eꞌiyonaja unká ñaké kalé pilaꞌaká. 11 Piweꞌepíniña pijluwa, kaja piyuke inaꞌuké maárowajena weꞌepika palá laꞌakayo piká. Kaja pamata ajopana palá laꞌakaná aú, ñakele nulaꞌajé pimíchaka nojló ke. 12 Eꞌiyonaja re apú piyanaꞌajú michú ejénami nakiyana, rejénami wani nakiyana riká. 13 Marí lapí piyuró maare, muní nuꞌujnajika rijwaꞌaté puraꞌajó. Riwátajika ee rinakojó paꞌakana, raꞌajé rinakojó piká. Unkájika ee riwata, nuká aꞌajeri nunakojó piká. Kewaka numaká pijló, Tupana jimaje ke. Ñaké chuwa pikamato, eko muní —ke rimaká rojló.

14 E Rut kamátayo re riꞌimá awaꞌá. E muní ke najmeꞌetaka ee, re joꞌó kaja kalajeruni iꞌimaká, unká Booz wátala ajopana amaka ruꞌumaká re, 15 raú rimá rojló:

—Paꞌá nojló paꞌarumaká nakiyana, payúmaꞌa riká maáreje.

E Booz akhoꞌorí cuarenta kilos cebada icha richojé. Rejomi repoꞌó richá; ráchoꞌota rojló riká, ronapíkaloje riká penaje. Rikaja rupaꞌakó pajimila ejo, 16 iphayo ruyajnérumi nakú.

—Yuka.

—Aꞌa, palani.

E Rut iꞌimayo riyukuna rojló mékeka ruꞌumaká rejo. 17 Rejomi rumá rojló:

—Marí cebada icha raꞌachá wajló, rimicha nojló: “Unká pipaꞌalajo piyajnérumi ñakaré ejo mapeja”.

18 E Noemí kemayo rojló:

—Nuꞌurinumi, chuwa piwata, wamáijla meke riꞌimajika pijló. Rikawílaꞌajo rinakojé, aꞌajná riweꞌepíjika mékeka rilaꞌajika ejená.